Տ. Գարեգին աբեղա Համբարձումյանը նշանակվել է Մայր Աթոռի Գեւորգյան հոգեւոր ճեմարանի տեսուչ

Տ. ԳԱՐԵԳԻՆ ԱԲԵՂԱ ՀԱՄԲԱՐՁՈՒՄՅԱՆԸ ՆՇԱՆԱԿՎԵԼ Է ՄԱՅՐ ԱԹՈՌԻ ԳԵՎՈՐԳՅԱՆ ՀՈԳԵՎՈՐ ՃԵՄԱՐԱՆԻ ՏԵՍՈՒՉ

Ն.Ս.Օ.Տ.Տ. Գարեգին Բ Ծայրագույն Պատրիարք եւ Ամենայն Հայոց Կաթողիկոսի հայրապետական տնօրինությամբ Մայր Աթոռ Սուրբ Էջմիածնի միաբան Հոգեշնորհ Տ. ԳԱՐԵԳԻՆ աբեղա ՀԱՄԲԱՐՁՈՒՄՅԱՆԸ, ազատվելով Մայր Աթոռ Սուրբ Էջմիածնի Քրիստոնեական դաստիարակության կենտրոնի փոխտնօրենի պաշտոնից, նշանակվել է Մայր Աթոռի Գեւորգյան հոգեւոր ճեմարանի տեսուչ: Այս մասին տեղեկացանք Մայր Աթոռի տեղեկատվական համակարգից:

Անդրադառնալով Հոգեշնորհ Տ. Գարեգին աբեղա Համբարձումյանի կենսագրությանը` նշենք.

1992-2002 թթ. սովորել է Մոսկվայի թիվ 249, ապա Երեւանի թիվ 148 դպրոցներում: Դպրոցական տարիներին հաճախել է նաեւ Արաբկիրի Հայորդյաց տուն:

2002-2008 թթ. սովորել է Մայր Աթոռ Ս. Էջմիածնի Գեւորգյան հոգեւոր ճեմարանում:

2006 թ. դեկտեմբերի 25-ին, ձեռամբ Մայր Աթոռի լուսարարապետ Գերաշնորհ Տ. Արարատ եպիսկոպոս Գալթագճյանի, ձեռնադրվել է սարկավագ:

2008 թ. ծառայության է անցել Մայր Աթոռի դիվանատանը` նախ որպես Եկեղեցի-պետություն բաժնի գործավար-քարտուղար, ապա որպես նույն բաժնի պատասխանատու:

2008 թ. Գեւորգյան հոգեւոր ճեմարանում գերազանցությամբ պաշտպանել է ավարտաճառ «Հայաստանյայց Առաքելական Սուրբ Եկեղեցու կանոնաիրավական փոխհարաբերություններըե թեմայով:

2009 թ. հուլիսի 19-ին, ձեռամբ ԱՄՆ Արեւելյան հայոց թեմի առաջնորդ Գերաշնորհ Տ. Խաժակ արքեպիսկոպոս Պարսամյանի, ձեռնադրվել է կուսակրոն քահանա` վերանվանվելով Գարեգին աբեղա:

2010-2014 թթ. սովորել է Մեծ Բրիտանիայի Շեֆֆիլդի համալսարանում` միաժամանակ ուսանելով եւ պարբերաբար դասախոսելով Օքսֆորդի համալսարանում: Ուսումնառության ավարտին ստացել է աստվածաբանության դոկտորի (PhD) աստիճան:

Ուսման տարիներին որպես այցելու հոգեւոր հովիվ իր ծառայությունն է բերել Լոնդոնի Ս. Եղիշե եւ Մանչեսթրի Ս. Երրորդություն հայկական եկեղեցիներում, ինչպես նաեւ հիմնել է Օքսֆորդի համալսարանական առաքելության ծուխը:

2014 թ. նոյեմբերից, որպես փոխտնօրեն, ծառայության է կոչվել Մայր Աթոռ Ս. Էջմիածնի Քրիստոնեական դաստիարակության կենտրոնում:

Մաղթենք Հայր Սուրբին ուժ եւ կորով, որպեսզի իր հոգեւոր լույսով եւ գիտելիքներով` նոր շունչ հաղորդի ճեմարանականներին եւ կրթի Հայ Առաքելական Սուրբ եկեղեցուն նվիրված եւ քրիստոնեական հավատքով զինված իսկական հոգեւորականներ:

ՀՐԱՆՏ ՍԱՐԱՖՅԱՆ

Բաժանորդագրվե՛ք https://t.me/iravunk

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝