ՍԱՀՄԱՆԱԴՐԱԿԱՆ ԲԱՐԵՓՈԽՈՒՄՆԵՐԻ ՀԱՆՁՆԱԺՈՂՈՎԻ ԱՆԴԱՄԸ ԴԵՄ ՉԷ ԱՅԼԸՆՏՐԱՆՔԱՅԻՆ ԶԻՆԾԱՌԱՅՈՒԹՅԱՆԸ

ՍԱՀՄԱՆԱԴՐԱԿԱՆ ԲԱՐԵՓՈԽՈՒՄՆԵՐԻ ՀԱՆՁՆԱԺՈՂՈՎԻ

ԱՆԴԱՄԸ ԴԵՄ ՉԷ ԱՅԼԸՆՏՐԱՆՔԱՅԻՆ

ԶԻՆԾԱՌԱՅՈՒԹՅԱՆԸ

ՀՀԿ պատգամավոր Վահրամ Մկրտչյանն այսօր  խորհրդարանում հարց հնչեցրեց  այլընտրանքային զինծառայության մասին: Պատգամավորը հիշեցրեց, որ բազմաթիվ աղանդներ կրոնի ու խղճի ազատության հասկացությունների ներքո են գործում, իսկ մենք սրան զուգահեռ սահմանում ենք այլընտրանքային զինվորական ծառայությունը: Արդյոք  այս դրույթի ամրագրումը մեզ համար մարտահրավեր չէ:

Վարդան Պողոսյանը հիշեցրեց, որ գործող օրենքով ամրագրված է այլընտրանքային զինվորական ծառայությունը: Բացի այդ`այլընտրանքային զինվորական ծառայությունը համապատասխանում է մարդու իրավունքների կոնվենցիային, որին միացել է նաեւ Հայաստանը: Հետեւաբար, այդ կոնվենցիայի պահանջները պարտավոր ենք կատարել: «Ինչու նման իրավունք չպետք է ամրագրել  նաեւ սահմանադրության մակարդակով»,- ասաց Վարդան Պողոսյանը այսօր ԱԺ ամբիոնից:

Ինչ վերաբերում է քայքայիչ աղանդներին, սահմանադրական բարեփոխումների հանձնաժողովի անդամի պարզաբանմամբ օրենսդիրն անզոր չէ այդ հարցը լուծել: Եթե նման երեւույթներ կան, որոնք խաթարում են հանրային շահերը, որոնք վնասակար ներգործություն են ունենում մարդկանց առողջության ու բարոյականության վրա, ապա ո՛չ սահմանադրությունը ո՛չ կոնվենցիան չի զրկում պետությանը կիրառել համապատասխան  միջոցներ: «Իսկ այլընտրանքային զինծառայության իրավունքը  համընդհանուր արդարացված իրավունք է, հետեւաբար արդարացված է դրա ամրագրումը»:

ՀՀԿ պատգամավորի այն մտահոգությանը, թե մեր քաղաքացիները կդառնան աղանդավոր այլընտրանքային զինծառայությունից օգտվելու բանակ չգնալու համար,  Վարդան Պողոսյանը ասաց, որ պետությունը զրկված չէ միջոցներից պարզելու, թե տվյալ անձը զինծառայությունից  խուսափել է կրոնական համոզմունքներից ելնելով, թե դա  պատրվակ է խուսափել զինծառայությունից:

ՍՈՆԱ ԴԱՎԹՅԱՆ

Բաժանորդագրվե՛ք https://t.me/iravunk

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝