Ավարտվեց Մարալիկի համայնքի ղեկավարի ընտրությունները. հայտնի են նախնական արդյունքները

ԱՎԱՐՏՎԵՑ ՄԱՐԱԼԻԿԻ ՀԱՄԱՅՆՔԻ ՂԵԿԱՎԱՐԻ ԸՆՏՐՈՒԹՅՈՒՆՆԵՐԸ. ՀԱՅՏՆԻ ԵՆ ՆԱԽՆԱԿԱՆ ԱՐԴՅՈՒՆՔՆԵՐԸ

Քիչ առաջ Շիրակի մարզի Մարալիկ քաղաքում ավարտվեց համայնքի ղեկավարի ընտրությունները, որտեղ իրենց թեկնածությունն էին առաջադրել ԲՀԿ-ական Արտակ Ավդալյանը եւ ՀՀԿ անդամ, համայնքի գործող ղեկավար Արտակ Գեւորգյանը: «Իրավունքին» հաջողվեց րոպեներ առաջ կապ հաստատել Մարալիկում գտնվող ԱԺ ԲՀԿ խմբակցության քարտուղար ՎԱՀԵ ԷՆՖԻԱՋՅԱՆԻ հետ ու պարզել ընտրությունների նախնական արդյունքների մասին որոշակի տեղեկություններ.

- Նախ տեղեկացնեմ, որ ժամը 20:00-ին Մարալիկ քաղաքի բոլոր երեք տեղեմասերը փակվել են: Այս պահի դրությամբ որոշակի թվեր արդեն հայտնի են. 36/1 ընտրատեղամասում ընտրություններին մասնակցել է 1089 քաղաքացի, 36/2-ում` 1035, եւ 36/3-ում` 1030, որն ընդհանուր հաշվարկով կազմում է 3154 (Մարալիկն ունի 5498 ընտրող-Հ. Ս.): Սա առաջին տեղեկությունն էր, որը րոպեներ առաջ ենք ստացել: Թե ինչ պատկեր կլինի քիչ անց, ու թե ինչքան քվե է ստացել ժողովրդի վստահությունը Արտակ Ավդալյանը կամ Արտակ Գեւորգյանը կարծում եմ` առաջիկայում արդեն բոլորիս հայտնի կլինի:

- Ամեն դեպքում, նախնական հաշվարկներով ԲՀԿ թեկնածուն շանսեր ունի՞, ըստ Ձեզ:

- Իհարկե: Թեպետ վերջնական հաշվարկը դեռ չի եղել եւ կարծում եմ` նախապես նման բան հայտարարել կամ հրապարակելը ճիշտ չի լինի: Ամեն դեպքում, առաջիկա ժամերի ընթացքում` հաշվի առնելով, որ ընդամենը երկու թեկնածու է, կարճ ժամանակ անց արդեն տեղեկություններ կունենանք:

- Իսկ ինչպե՞ս կգնահատեք ընտրությունների ընթացքը:

- Ընտրողների մասնակցությունը բավականին մեծ էր: Իհարկե, առավոտվա ժամերին եղան խնդիրներ նույնականացման քարտերի հետ կապված, ընտրատեղամասի առաջ եղան կուտակումներ, եղավ խնդիր  արկղի հետ կապված, որովհետեւ այն տեսանելի վայրում էր գտնվում, ինչը շտկվեց է եւ նմանատիպ այլ խնդիրներ եւս եղան:

- Այնուամենայնիվ, այդ խոչընդոտները որեւէ կերպ կարո՞ղ են ազդել արդյունքների վրա:

- Կարծում եմ` ոչ:

ՀՐԱՆՏ ՍԱՐԱՖՅԱՆ

Բաժանորդագրվե՛ք https://t.me/iravunk

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝