Վարչապետ Հովիկ Աբրահամյանը հանդիպել է մի խումբ մտավորականների հետ

ՎԱՐՉԱՊԵՏ ՀՈՎԻԿ ԱԲՐԱՀԱՄՅԱՆԸ ՀԱՆԴԻՊԵԼ Է ՄԻ ԽՈՒՄԲ ՄՏԱՎՈՐԱԿԱՆՆԵՐԻ ՀԵՏ

ՀՀ վարչապետ ՀՈՎԻԿ ԱԲՐԱՀԱՄՅԱՆԸ ՀՀ մշակույթի նախարար ՀԱՍՄԻԿ ՊՈՂՈՍՅԱՆԻ ուղեկցությամբ այցելել է անվանի գրող Պերճ Պռոշյանի Աշտարակում գտնվող տուն-թանգարան: Կառավարության ղեկավարը շրջել է թանգարանով՝ ծանոթացել գրողի կյանքն ու գործունեությունը ներկայացնող ցուցանմուշներին:

Այնուհետեւ վարչապետ Հ. Աբրահամյանը հանդիպել է մի խումբ մտավորականների՝ գրողների, երաժիշտների, նկարիչների, թատրոնի եւ կինոյի գործիչների հետ, որոնց թվում էին Կոմպոզիտորների միության նախագահ ԱՐԱՄ ՍԱԹՅԱՆԸ, Նկարիչների միության նախագահ ԿԱՐԵՆ ԱՂԱՄՅԱՆԸ, Համազգային թատրոնի տնօրեն ՎԱՐԴԱՆ ՄԿՐՏՉՅԱՆԸ, բանաստեղծ, հասարակական գործիչ ՌԱԶՄԻԿ ԴԱՎՈՅԱՆԸ, Եղիշե Չարենցի անվան գրականության եւ արվեստի թանգարանի տնօրեն ԿԱՐՈ ՎԱՐԴԱՆՅԱՆԸ, Երեւանի Կամերային թատրոնի գեղարվեստական ղեկավար ԱՐԱ ԵՐՆՋԱԿՅԱՆԸ, Գ. Սունդուկյանի անվան ազգային ակադեմիական թատրոնի գեղարվեստական ղեկավար ԱՐՄԵՆ ԷԼԲԱԿՅԱՆԸ, Հ. Պարոնյանի անվան երաժշտական կոմեդիայի պետական թատրոնի գեղարվեստական ղեկավար ԵՐՎԱՆԴ ՂԱԶԱՆՉՅԱՆԸ, Գրողների միության նախագահ ԷԴՎԱՐԴ ՄԻԼԻՈՏՆՅԱՆԸ, Մատենադարանի արխիվային բաժնի վարիչ, միջազգային նախագծերի ղեկավար, թատերագետ ԱՐԱ ԽԶՄԱԼՅԱՆԸ, Հեռուստատեության եւ ռադիոյի ազգային հանձնաժողովի նախագահի տեղակալ, Երեւանի մնջախաղի պետական թատրոնի գեղարվեստական ղեկավար ԺԻՐԱՅՐ ԴԱԴԱՍՅԱՆԸ եւ այլք:

Տարածված հաղորդագրության համաձայն, անմիջական զրույցի ընթացքում արվեստագետները խոսել են իրենց բնագավառներում իրականացվող ծրագրերի եւ հուզող խնդիրների մասին: ՀՀ վարչապետը պատասխանել է նաեւ մտավորականներին հետաքրքրող մի շարք

հարցերի, որոնք վերաբերել են ինչպես մշակույթի բնագավառին, այնպես էլ կառավարության առաջնություններին եւ իրականացվող ծրագրերին:

Հ. Աբրահամյանը կարեւորել է նման ձեւաչափով հանդիպումների անցկացումը եւ նշել, որ դրանք կկրեն շարունակական բնույթ:

Հավելենք, որ թանգարանը համարվում է Աշտարակի ամենագործուն մշակութային օջախներից մեկը։ Այստեղ ոչ միայն պահպանվում է Պռոշյանի հիշատակը եւ պրոպագանդվում է նրա ստեղծագործությունը, այլեւ այդ ստեղծագործության հիման վրա կազմակերպվում են միջոցառումներ, որոնք ոգեկոչում են Պռոշյանի ապրած ժամանակը, կենցաղն ու գրական-մշակութային կյանքը:

ՀՐԱՆՏ ՍԱՐԱՖՅԱՆ

Բաժանորդագրվե՛ք https://t.me/iravunk

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝