ՀԱՅԱՍՏԱՆԻ ԱԶԱՏ ՈՃԻ ԸՄԲՇԱՄԱՐՏԻ ՀԱՎԱՔԱԿԱՆԸ ՆԵՐԿԱՅԱՑԵԼ Է ՄԱՐՏԱԿԱՆ ԿԱԶՄՈՎ

ՀԱՅԱՍՏԱՆԻ ԱԶԱՏ ՈՃԻ ԸՄԲՇԱՄԱՐՏԻ ՀԱՎԱՔԱԿԱՆԸ ՆԵՐԿԱՅԱՑԵԼ Է ՄԱՐՏԱԿԱՆ ԿԱԶՄՈՎ

Լաս Վեգասի աշխարհի առաջնությանը թեեւ Հայաստանի հունահռոմեկան ոճի ըմբշամարտի հավաքականը մասնակցեց լավագույն կազմով, սակայն ասել, թե մրցաշարը հաջող էր մեզ համար, սխալ կլինի:

Այսպես՝ մեր հավաքականը ներկայացրեցին Ռոման Ամոյանը (59 կգ), Միհրան Հարությունյանը (66 կգ), Վարշամ Բորանյան (71 կգ), Արսեն Ջուլֆալակյանը (75 կգ), Էդուարդ Սարգսյանը (80 կգ), Մաքսիմ Մանուկյանը (85 կգ), Արթուր Ալեքսանյանը (98 կգ) եւ Էդգար Խաչատրյանը (125 կգ): Այսպիսով՝ ակնկալիքներ կային թե՛ Ռոման Ամոյանից, թե՛ Արսեն Ջուլֆալակյանից, թե՛ Միհրան Հարությունյանից: Այսինքն՝ մասնագիտական գնահատականներով՝ թիմից կարելի էր առնվազն չորս մեդալ ակնկալել, սակայն բավարարվեցինք մեկով. այս անգամ եւս Արթուր Ալեքսանյանը պարզապես փայլեց:
Ճիշտ է՝ դժվար է մեղադրել նաեւ Միհրան Հարությունյանին: Ի դեպ, վերջինս գտնվում էր հիանալի մարզավիճակում, ինչն ապացուցեց դեռ Բաքվի Եվրոպական խաղերում՝ հաղթելով ոչ միայն մրցակիցներին, այլեւ այնտեղի խայտառակ մրցավարությանը: Բայց ահա Լաս Վեգասի էլ ավելի խայտառակ մրցավարությունն իր «ծանրակշիռ» խոսքն ասաց՝  կիսաեզրափակչում Միհրանի ակնհայտ հաղթանակը կորեացի Հանսու Ռյուի նկատմամբ սարքելով պարտություն: Ճիշտ է՝ հետո մրցավարներից 5-ը որակազրկվեցին, բայց գողացված հաղթանակը մնաց գողացված:
Սակայն հավաքականի մյուս ըմբիշները առանց մրցավարական միջամտության էլ, զիջեցին մրցակիցներին, եւ այս անհաջողության պատճառները դեռ հասկանալ է պետք:
Իսկ ամենավատն այն էր, որ թիմային այս անհաջողության արդյունքում հայ ընբիշներից օլիմպիական ուղեգիր, բացի Արթուր Ալեքսանյանից, նվաճեց միայն Միհրան Հարությունյանը:
Այսպիսով` մրցագորգը արդեն ազատ ոճայիններինն է: Արայիկ Բաղդադյանի գլխավորած թիմի կազմում մրցահարթակում կլինեն Գարիկ Բասեղյանը (57 կգ), Վոլոդյա Ֆրանգուլյանը (61 կգ), Դավիթ Սաֆարյանը (65 կգ), Գրիգոր Գրիգորյանը (74 կգ), Մուսա Մուրթազալիեւը (86 կգ), Էդգար Ենոքյանը (97 կգ) եւ Լեւան Բերիանիձեն (125 կգ):
Այստեղ եւս ավելի քան մարտական կազմ է, մեդալներ ակնկալվում են գրեթե բոլոր ըմբիշներից: Դավիթ Սաֆարյանը, ով 2013 թվականին արդեն ճանաչվել է աշխարհի չեմպիոն, այս տարի հիանալի հնարավորություն ունի կրկնելու հաջողությունը: Հայ ըմբիշը «Ստեփան Սարգսյանի գավաթ» 20-րդ հոբելյանական միջազգային մրցաշարում նվաճելով հաղթողի կոչումը` ցույց տվեց, որ վերադարձել է իր նախկին լավ մարզավիճակին: Լեւան Բերիանիձեն նույն մրցաշարում եւս լավագույնն էր իր քաշային կարգում: Իսկ Վոլոդյա Ֆրանգուլյանը այս տարի արդեն հասցրել է իր խոսքն ասել Եվրոպայի մինչեւ 23 տարեկանների առաջնությունում՝ նվաճելով չեմպիոնի կոչումը: Այսպիսով՝ սպասելիքները շատ են, բայց թե ինչ կունենանք, դեռ կտեսնենք...

ՔՐԻՍՏԻՆԵ ՊԵՏՐՈՍՅԱՆ

Բաժանորդագրվե՛ք https://t.me/iravunk

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝