«ԽՈՍԵԼ ՄԻԱԿՈՂՄԱՆԻ ԶԻՋՈՒՄՆԵՐԻ ՄԱՍԻՆ, ՈՒՂՂԱԿԻ, ՏԱՐՕՐԻՆԱԿ Է»

«ԽՈՍԵԼ ՄԻԱԿՈՂՄԱՆԻ ԶԻՋՈՒՄՆԵՐԻ ՄԱՍԻՆ, ՈՒՂՂԱԿԻ, ՏԱՐՕՐԻՆԱԿ Է»

Մամուլում օրեր շարունակ շրջանառվում են տեղեկություններ, թե Ղրիմի ղեկավար Սերգեյ Ակսյոնովը պաշտոնական այցով օրերս կլինի Հայաստանում: Ի վերջո, այս չարչրկված թեման որքանո՞վ է համապատասխանում իրականությանը, երեկ գործադիրի նիստից հետո լրագրողներս փորձեցինք պարզել ՀՀ արտաքին գործերի նախարարի տեղակալ ՇԱՎԱՐՇ ՔՈՉԱՐՅԱՆԻՑ, ինչպես նաեւ անդրադարձանք ԵՏՄ-ում ու ՀԱՊԿ-ում ՀՀ մասնակցությանը.

–Հայաստան գալը ցանկացած քաղաքացու համար, որն ունի Ռուսաստանի Դաշնության անձնագիր, ազատ է: Ինչ վերաբերում է նրան, ինչ մամուլից ինքս էլ եմ լսել, թե իբր հրավիրվել է, ապա ասեմ, որ, ինչքանով ես տեղյակ եմ, որեւէ հրավեր չի եղել:
– Պարոն փոխնախարար, ՀՀ նախագահը ՌԴ նախագահի հետ հանդիպման ժամանակ նշել էր, որ սեպտեմբերի 15-ին կայանալիք ՀԱՊԿ գագաթնաժողովին մանրամասն կանդրադառնա սահմանին տիրող իրավիճակի: Ի՞նչ է այսօր Հայաստանն ակնկալում ՀԱՊԿ-ից:
– Պաշտպանության հարցում առաջին հերթին` մեր հույսը պետք է դնենք մեզ վրա: Իսկ ինչ վերաբերում է դաշնակից երկրների աջակցությանը, պայմանագրային պարտավորությունների կատարմանը, սա այլ հարց է: Այնուամենայնիվ,  պետք է ունենանք այն գիտակցումը, որ եթե որեւէ երկիր իր պաշտպանության հույսը դնում է ուրիշի վրա, ներողություն, սա կարող է շատ տխուր ավարտ ունենալ:
– Բայց չէ՞ որ ՀԱՊԿ-ը նաեւ ՀՀ անվտանգության երաշխավորն է:
– Ինչպես ասացի, մեր հույսն առաջին հերթին` մեզ վրա պետք է դնենք, բայց սա չի նշանակում, որ արտաքին մթնոլորտը չպետք է ձեւավորվի` կանխելու համար մեր հարեւանի հնարավոր արկածախնդրությունը: Եվ երկրորդ` Աստված չանի, եթե այդպիսի վիճակ լինի, բնական է, առաջին հակահարված տվողը մենք ենք լինելու մեր արկածախնդիր հարեւանին, բայց մեզ համար նաեւ կարեւոր է յուրաքանչյուր երկրի դերակատարությունը եւ առաջին հերթին այն երկրները, որոնց հետ մենք պայմանագրային հարաբերությունների մեջ ենք:
– Ի դեպ, այս օրերին տեսակետ է շրջանառվում, թե ՀԱՊԿ գագաթնաժողովին կարող է առաջարկ լինի Հայաստանին` զիջումների գնալու:
– Ի՞նչ զիջման մասին կարող է խոսք լինել, երբ կա մադրիդյան գործընթաց, կան ԵԱՀԿ Մինսկի խմբի համանախագահների հայտարարությունները, եւ այդ ամենը մենք ընկալում ենք որպես մեկ միասնական փաթեթ, որտեղ կա ե՛ւ կարգավիճակի հարցը, ե՛ւ անվտանգության երաշխիքները: Ավելին` կան հարցեր, որոնք առաջին հերթին պետք է հետաքրքրեն Ադրբեջանին: Այնպես որ, խոսել միակողմանի զիջումների մասին, ուղղակի, տարօրինակ է:
– Անդրադառնանք նաեւ ԵՏՄ-ին. որքանո՞վ եք հավանական համարում առաջիկայում ԵՏՄ-Իրան ազատ առեւտրային հարաբերությունների ստեղծումը:
– Այդ հարցը հենց Հայաստանն է նախաձեռնել: Մենք մոտավորապես երեք ամիս կլինի, ինչ դիմել ենք Եվրասիական տնտեսական հանձնաժողովին եւ առաջարկել, որպեսզի ԵՏՄ անդամ պետությունների եւ Իրանի միջեւ լինի ավելի արտոնյալ առեւտրային ռեժիմ: Նշեմ նաեւ, որ Իրանը մշտապես հետաքրքրված է եղել այս շուկայով, ու նրա համար նույնպես կարեւոր քայլ կլինի սա:

ՀՐԱՆՏ ՍԱՐԱՖՅԱՆ

Բաժանորդագրվե՛ք https://t.me/iravunk

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝