ՄԵԿՆԱՐԿՈՒՄ Է ԵՐԵՎԱՆՅԱՆ 9-ՐԴ ՄԻՋԱԶԳԱՅԻՆ ԵՐԱԺՇՏԱԿԱՆ ՓԱՌԱՏՈՆԸ` ՆՎԻՐՎԱԾ ՖԻԼՀԱՐՄՈՆԻԿ ՆՎԱԳԱԽՄԲԻ 90-ԱՄՅԱԿԻՆ

ՄԵԿՆԱՐԿՈՒՄ Է ԵՐԵՎԱՆՅԱՆ 9-ՐԴ ՄԻՋԱԶԳԱՅԻՆ ԵՐԱԺՇՏԱԿԱՆ ՓԱՌԱՏՈՆԸ` ՆՎԻՐՎԱԾ ՖԻԼՀԱՐՄՈՆԻԿ ՆՎԱԳԱԽՄԲԻ 90-ԱՄՅԱԿԻՆ

ՀՀ նախագահի տիկին Ռիտա Սարգսյանի բարձր հովանու ներքո եւ ՀՀ մշակույթի նախարարության աջակցությամբ սեպտեմբերի 10-ից կմեկնարկի Երեւանյան 9-րդ միջազգային երաժշտական փառատոնը`նվիրված  Ազգային ֆիլհարմոնիկ նվագախմբի 90-ամյակին եւ Հայոց ցեղասպանության 100-րդ տարելիցին: Այս տարի փառատոնային ծրագիրն հագեցած է. տեղի կունենա 8 սիմֆոնիկ եւ 6 կամերային համերգներ: Փառատոնին իրենց մասնակցություն են բերել ասպարեզում հայտնի 30 հրավիրյալներ տարբեր երկրներից, ինչպես նաեւ հայաստանցի արտիստներ: Փառատոնի հանդիսավոր բացմանը հանդես կգա ռուս հանրաճանաչ ջութակահար Վադիմ Ռեպինը`ներկայացնելով Բրուխի ջութակի կոնցերտը: Փառատոնի գեղարվեստական ղեկավար ԷԴՈՒՐԱԴ ԹՈՓՉՅԱՆԻ խոսքով` Երեւանյան 9-րդ միջազգային երաժշտական փառատոնը դարձել է երաժշտական աշխարհի եւ ընդհանրապես արվեստի աշխարհի կարեւոր իրադարձություններից մեկը.«Այս տարվա փառատոնը շատ յուրահատուկ է, քանի որ նվիրված է Հայոց ցեղասպանության 100-րդ տարելիցին եւ ֆիլհարմոնիկ նվագամբի ստեղծման 90-ամյակին: Ինչպես յուրաքանչյուր տարի, այս տարի եւս փորձել ենք հանրաճանաչ երաժիշտների ընդգրկել փառատոնում, այս առումով կարծում եմ շատ ձեռքբերումներ ունենք: Բոլոր համերգներում էլ երաժիշտները բացառիկ են, մեկ համերգ նախատեսված է նաեւ սեպտեմբերի 15-ին, որով էլ հույս ունենք կբացվի Արամ Խաչատրյան համերգասրահը: Փառատոնին լավ նախապատրաստվել ենք, հուսամ ամեն ինչ լավ կանցնի»,-նշեց Է. Թոփչյանը:

Ջութակահար ՎԱԴԻՄ ՌԵՊԻՆԸ, ով նվագում է Գվարների դել Ջեզուի 1743 թ.-ին կերտած ջութակով, ընդգծեց, որ առաջին հերթին փառատոնը տոն է, որը ինչպես ցանկացած տոն, մարդկանց պետք է պարգեւի դրական լիցքեր.«Ջութակ առաջին անգամ տեսել եմ 5 տարեկանում, երբ մայրս որոշեց ինձ ուղարկել երաժշտական դպրոց, մինչ այդ ջութակ չեմ տեսնել, նույնիսկ իմ մանական խաղալիքների մեջ այն չկար: Երբ սկսեցի ծանոթանալ ջութակի հետ հասկացա, որ այն երաժշտական յուրահատուկ գործիք է, իսկ 11 տարեկանում ամբողջովին արդեն նվիրվեցի գործիքին»,-շեշտեց ջութակահարը:

Երեւանյան 9-րդ միջազգային երաժշտական փառատոնը կտեւեի մինչեւ հոկտեմբերի 28-ը:

Նշենք, որ նոյեմբերին ֆիլհարմոնիկ նվագախումբը Հայոց ցեղասպանության 100-րդ տարելիցի հանրայնացման առաքելությամբ «Հիշում եւ պահանջում» խորագրի ներքո հյուրախաղային համերգներով հանդես կգա Լեհաստանում եւ Գերմանիայում:

ԶՎԱՐԹ ԽԱՉԱՏՐՅԱՆ

Բաժանորդագրվե՛ք https://t.me/iravunk

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝