«ՀԱՅԱՍՏԱՆԸ ՊԵՏՔ Է ՓԱԿԻ ԱԼԻԵՎԻ ՃԱՆԱՊԱՐՀԸ ԴԵՊԻ ԴՈՒՐՍ»

«ՀԱՅԱՍՏԱՆԸ ՊԵՏՔ Է ՓԱԿԻ ԱԼԻԵՎԻ ՃԱՆԱՊԱՐՀԸ ԴԵՊԻ ԴՈՒՐՍ»

Պետական կառույցների մասով ավարտվեց սեպտեմբերի 3-ից Հայաստանում մեկնարկած «Շանթ 2015» ռազմավարական հրամանատարաշտաբային զորավարժությունները: Համապետական նշանակություն ունեցող այս զորավարժությունները պլանային բնույթի էին եւ նպատակաուղղված էին պաշտպանությանը պետության անմիջական նախապատրաստության եւ ագրեսիայի հետմղման ընթացքում պետական ու ռազմական կառավարման մարմինների զորահավաքային նախապատրաստությանը, պատրաստականության բարձր աստիճանների բերման ունակության վերստուգմանը, փոխգործակցության եւ գործողությունների ներդաշնակության մակարդակի բարձրացմանը: Ավելին` հաշվի առնելով Հայաստանի շուրջ եւ տարածաշրջանում տիրող ռազմաքաղաքական իրադրությունը, զորավարժության սցենարում առկա էր մտացածին հակառակորդ: Սակայն մեր իրական հակառակորդն էլ այս օրերին պակաս ակտիվ չէր սահմանում: Ու հենց այս ամենի շուրջ էլ ծավալվեց «Իրավունքի» զրույցը ՀՀ պաշտպանության նախկին փոխնախարար ՎԱՀԱՆ ՇԻՐԽԱՆՅԱՆԻ հետ, ով պատասխանեց բացառապես զորավարժություններին ու սահմանին տիրող իրավիճակին վերաբերող հարցերին` խոստանալով ներքաղաքական խնդիրներին անդրադառնալ հետո:

«ՊԱՇՏՊԱՆՈՒԹՅԱՆ ՆԱԽԱՐԱՐԸ ՊԵՏՔ Է ՏԵՍՆԻ, ԹԵ ԻՆՉ ՆԵՐՈՒԺ ԿԱ ՄԵՐ ԵՐԿՐՈՒՄ»

–Պարոն Շիրխանյան, այսպիսի լայնածավալ զորավարժություններ Հայաստանում դեռեւս չէին եղել: Որքանո՞վ էր կարեւոր այս շրջանում իրականացնել «Շանթ 2015» ծրագիրը:
– Համարում եմ, որ խիստ անհրաժեշտ միջոցառում է եղել եւ ժամանակին: Հայաստանը պետք է իր ամբողջ մոբիլիզիացիոն ներուժը ցույց տա, եւ պաշտպանության նախարարը պետք է տեսնի, թե ինչ ներուժ կա մեր երկրի ներսում, ինչքանով են նրանք պատրաստ արտակարգ իրավիճակների, պատերազմական գործողությունների: Այնպես որ, խիստ կարեւոր եմ համարում այս զորավարժություններն ու ճիշտ:
– Հետեւե՞լ եք զորավարժություններին եւ ամփոփելով այն` ի՞նչ կասեք պետական կառույցների պատրաստվածության մասին:
– Ինչքանով որ մամուլից տեղյակ եմ` հաջող է անցել, դրված խնդիրը կարողացել են լուծել: Կարեւորն այն է, որ հիմնարկների ղեկավարները, պետական ծառայողները, կառույցները, հիվանդանոցները, ուժային նախարարությունները... բոլորը սկսեն ավելի լուրջ եւ խորը մտածել նման զարգացումների մասին, որպեսզի երբեք անակնկալի չգանք: Մենք 1990-91 թվականներին հանկարծակի հայտնվեցինք փախստականների մի մեծ հատվածի առաջ, դրան գումարած կային պատերազմական գործողություններ, բազմաթիվ վիրավորներ: Հետեւաբար, այս միջոցառումն իսկապես անհրաժեշտություն է այսօր:

«ՊԱՐԶԱՊԵՍ ԱՀԱԲԵԿՉԱԿԱՆ ԳՈՐԾՈՂՈՒԹՅՈՒՆՆԵՐ ԵՆ»

–Ի դեպ, արդեն մամուլում տեղեկություններ կան, որ Ադրբեջանն էլ է նույնպիսի լայնամասշտաբ զորավարժությունների անցնում: Ըստ Ձեզ` սա նախապատերազմական պատրաստություննե՞ր են, թե՞ պարզապես պատասխանն է մեր զորավարժությունների:
– Ադրբեջանը կոնֆլիկտի մեջ գտնվող երկիր է, եւ ինքն էլ իրավունք ունի նման զորավարժություններ անցկացնելու: Հետեւաբար, սա բոլորովին զարմանալի չէ: Ինչ վերաբերում է նրան, թե նախապատերազմական պատրաստություններ են, ես չէի ասի: Ուղղակի, կոնֆլիկտը գնալով սրվում է, եւ ժամանակն է այն վերջնականապես լուծել:
– Ինչպիսի՞ կուլմինացիա եք տեսնում:
– Իհարկե, քաղաքական: Բայց, միեւնույն ժամանակ, հակառակորդը պետք է  համոզված լինի, որ ռազմական ճանապարհով խնդիրներ լուծելու ոչ մի հնարավորություն չունի, որպեսզի քաղաքական լուծման գնա: Իսկ սահմանին տիրող լարվածությունը պարզապես ահաբեկչական գործողություններ են: Ուստի` Հայաստանը պետք է դիմի համապատասխան մարմիններին եւ փակի Ալիեւի ճանապարհը դեպի դուրս: Նա տեռորիստ է, որովհետեւ զինադադարի պայմաններում` իր ստորագրության առկայությամբ, տարիններ շարունակ իրականացնում է ահաբեկչական գործողություններ Հայաստանի վրա:

ՀՐԱՆՏ ՍԱՐԱՖՅԱՆ

Բաժանորդագրվե՛ք https://t.me/iravunk

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝