ՔՆՆԱՐԿՈՒՄ. «ԲԱ ՈՐ ԶՈՔԱՆՉԻ ԿԵՆՍԱԳՐՈՒԹՅՈՒՆԸ ԿՈՒՍԱԿՑՈՒԹՅԱՆ ԿԱՆՈՆԱԴՐՈՒԹՅԱՆ ՄԵՋ ՏԵՂ ԳՏՆԻ»

ՔՆՆԱՐԿՈՒՄ. «ԲԱ ՈՐ ԶՈՔԱՆՉԻ ԿԵՆՍԱԳՐՈՒԹՅՈՒՆԸ

ԿՈՒՍԱԿՑՈՒԹՅԱՆ ԿԱՆՈՆԱԴՐՈՒԹՅԱՆ ՄԵՋ ՏԵՂ

ԳՏՆԻ».

Կուսակցությունների մասին օրինագիծն այսօր քննարկվեց  մարդու իրավունքների պաշտպանության հարցերի մշտական հանձնաժողովում: Նիստին մասնակցում էին  օրենսդիր մարմնի ներկայացուցիչներ եւ  արդարադատության փոխնախարար Արսեն Մկրտչյանը: Նիստում քննարկվեց ԲՀԿ խմբակցության պատգամավոր, «Ալյանս»  կուսակցության ղեկավար  Տիգրան Ուրիխանյանի առաջարկն ու օրինագիծը ԱԺ լիագումար նիստ մտցնելը:

Ուրիխանյանի առաջարկը վերաբերում էր  կուսակցությունների գրանցմանը ոչ բովանդակային վրիպակների պատճառով:

Բանն այն է, որ  արդարադատության նախարարությունը հրաժարվել է գրանցել «Ալյանս» կուսակցությունը հիմնադիր համագումարի արձանագրության էջերը չհամարակալված լինելու պատճառով: Կուսակցությունը  ստիպված երկրորդ համագումարը պետք է  անցկացնի, ինչն էլ տեղի ունեցավ օրերս` փակ ձեւաչափով:

Տիգրան Ուրիխանյանը  փոխնախարարից հետաքրքրվեց` ինչո՞ւ օրենքից չի հանվում այն անհեթեթությունը, որը վերաբերում է կուսակցության գրանցումը  հիմնադիր համագումարի արձանագրության էջերը համարակալված լինելու դեպքում: Արսեն Մկրտչյանի խոսքով` այդ պահանջը չի կարող հանվել իրավական հիմք չունենալու պատճառով, հատկապես որ կան վարչարարության հիմունքներ:

Փոխնախարարի պատասխանը, ըստ Ուրիխանյանի, այսպես կարելի է հասկանալ` կուսակցությունների գրանցման մերժումը չհամարակալված էջերի պատճառով  կարգավորելն անէական է ու ծանրակշիռ նշանակություն փոփոխություն չունեցող:

Ի դեպ,Ուրիխանյանը հիշեցրեց, որ առաջին անգամ չէ, որ ինքը կանգնում է նման խնդրի առաջ: Առաջադիմական կուսակցությունը գրանցելիս եւս նման արհեստական խոչընդոտներ են եղել: Միայն չորրորդ համագումարից հետո գրանցվեց այդ կուսակցությունը:

Մարդու իրավունքների պաշտպանության հարցերի մշտական հանձնաժողովի փոխնախագահ Մարգարիտ Եսայանն էլ ասաց, որ որպես մարդ` լիովին հասկանում է Տիգրան Ուրիխանյանի դժգոհությունը: «Բայց  եթե կուսակցությունների մասին օրենքում գրված է, որ ցանկացած փոփոխություն կուսակցության կանոնադրության մեջ պետք է տեղի ունենա  համագումարի որոշմամբ, ապա օրենքը պետք է պահպանել: Ինչպես լուսահոգի իրավաբան Վլադիմիր Նազարյանն էր ասում, գուցե տարիներ անց որեւէ կուսակցության ղեկավար ցանկանա իր կուսակցության կանոնադրության մեջ մտցնել իր զոքանչի կենսագրությունը: Այնպես որ համագումարի արձանագրությունների էջերի համարակալումն էդքան էլ երկրորդական բան չէ»,- ասաց տիկին Եսայանը:

Տիգրան Ուրիխանյանն էլ հակադարձեց Մարգարիտ Եսայանին, ով, ըստ Ուրիխանյանի, շփոթում է կուսակցությունների մասին օրենքն ամբողջությամբ համագումարի իրավասությունների մասի գլխի հետ:

Պատգամավորը վստահ է` «Ալյանս» կուսակցության չգրանցելը  քաղաքական խնդիր է. իշխող մեծամասնությունը ճնշում է ընդդիմությանը:

«Չէ, չէ, նման բան չկա»,- հակադարձեց  ՀՀԿ պատգամավորը:

Ի վերջո,Տիգրան Ուրիխանյանի առաջարկն ու օրինագիծը ԱԺ լիագումար նիստ մտցնելը դրվեց քվեարկության եւ ընդունվեց ձայների առավելությամբ:

ՍՈՆԱ ԴԱՎԹՅԱՆ

Բաժանորդագրվե՛ք https://t.me/iravunk

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝