ԱՐԱՄ ԱՎԱԳՅԱՆ. «ԱՄԵՆ ԻՆՉ ԿԱՆԵՄ ՕԼԻՄՊԻԱԿԱՆ ՈՒՂԵԳԻՐ ՆՎԱՃԵԼՈՒ ՀԱՄԱՐ»

ԱՐԱՄ ԱՎԱԳՅԱՆ. «ԱՄԵՆ ԻՆՉ ԿԱՆԵՄ ՕԼԻՄՊԻԱԿԱՆ ՈՒՂԵԳԻՐ ՆՎԱՃԵԼՈՒ ՀԱՄԱՐ»

Բուլղարիայի Սամոկով քաղաքում կայացած բռնցքամարտի Եվրոպայի առաջնությունում Հայաստանի բռնցքամարտի հավաքականի միակ մեդալը նվաճել է 56 կգ քաշային կարգում հանդես եկող Արամ Ավագյանը. հայ բռնցքամարտիկը կանգնեց պատվո հարթակի 3-րդ աստիճանին: Բացի նվաճած բրոնզե մեդալից, Ավագյանը ձեռք բերեց նաեւ Քաթարի մայրաքաղաք Դոհայում հոկտեմբերին կայանալիք Աշխարհի առաջնության ուղեգիր: Եվրոպայի առաջնության արդյունքի, աշխարհի առաջնության եւ օլիմպիական ուղեգիր նվաճելու գերխնդրի մասին զրուցեցինք Եվրոպայի եռակի մրցանակակիր ԱՐԱՄ ԱՎԱԳՅԱՆԻ հետ:

-Եվրոպայի առաջնության բրոնզե մեդալը, իհարկե, Ձեր ուժերի բարձրակետը չէր: Այնուամենայնիվ, այս մեդալն ապացուցեց, որ 56 կգ քաշային կարգին վերադառնալը ճիշտ որոշում էր: Բացի այն, որ նվաճեցիք մեդալ եւ Աշխարհի առաջնության ուղեգիր, Եվրոպայի առաջնությունն էլ ի՞նչ ձեռքբերումներ տվեց:

- Բավականին ծանր եւ անհաջող 2014 թվականից հետո, երբ հանդես էի գալիս 60 կգ քաշային կարգում եւ չկարողացա հարմարվել ու դարձյալ վերադարձա 56 կգ-ին, գերխնդիր էր դարձել առաջին հերթին վերգտնել ինձ: Դա, կարծում եմ, կարողացա անել հենց Եվրոպայի առաջնությունում:

- Աշխարհի առաջնությունը սարերի հետեւում չէ, եւ այն կրկնակի կարեւորվում է, քանի որ կարող է ճանապարհ բացել դեպի Ռիո-2016: Ինչպե՞ս է ընթանում նախապատրաստական փուլը:

- Արդեն սկսել եմ պարապմունքներս: Հիմնականում շեշտը դրված է ֆիզիկական աշխատանքի վրա, քանի որ այժմ այդ փուլն է: Այնուհետեւ կունենանք ուսումնամարզական հավաք եւ մեկ շաբաթ շուտ կմեկնենք Դոհա՝ շարունակելու մեր հետագա պարապմունքներն այնտեղ, որպեսզի հասցնենք ադապտացվել եղանակային պայմաններին:

- Աշխարհի առաջնությունից ի՞նչ սպասելիքներ ունեք: Հաշվի առնելով նաեւ, որ Հայաստանի պատվիրակությունը բավականին փոքրիկ է լինելու:

- Ներդնելու եմ ողջ ուժերս, սպասելիքներս մեծ են: Պետք է ամեն ինչ անեմ օլիմպիական ուղեգիր նվաճելու համար: Իսկ եթե Դոհայում չհաջողվի, ապա այդ նպատակիս համար թե՛ Ադրբեջանում եւ թե՛ Թուրքայիում կպայքարեմ:

- Մրցակիցներին անակնկալի բերելու մարտավարություն մշակե՞լ եք:

- Առայժմ ոչ մի մարտավարության ծրագիր չենք մշակում, քանի որ չգիտեմ, թե ում հետ կմրցեմ: Վիճակահանությունից հետո պարզ կլինի, մրցակիցներիս մեծ մասին ճանաչում եմ, իսկ նրանց անակնակալի բերելու մասին կմտածեմ արդեն մրցելու ժամանակ:

- Եթե Դոհայում չհաջողվի նվաճել օլիմպիական ուղեգիր, ապա պետք է փորձել Թուրքիայում եւ Ադրբեջանում: Գիտեմ, որ դա Ձեզ չի անհանգստացնում, բայց հաշվի առնելով Եվրոպական խաղերի խայտառակ մրցավարությունը՝ մտավախություն չկա՞, որ պատկերը կարող է կրկնվել:

- Մտավախություն իհարկե կա, բայց ես ինքս իմ մեջ չեմ թերանում ու միշտ ռինգ եմ մտնում հավատով:

- Թեեւ դեռ շատ երիտասարդ եք, բայց հասցրել եք աչքի ընկնել ոչ միայն նվաճումներով, այլեւ նպատակասլացությամբ: Ի՞նչ սկզբունքներով եք առաջնորդվում կյանքում եւ սպորտում:

- Տեսնել հպարտություն հորս աչքերում. դա իմ կյանքի նպատակն է, նաեւ սկզբունքը, որով առաջնորդվում եմ թե՛ կայնքում, թե՛ սպորտում:

ՔՐԻՍՏԻՆԵ ՊԵՏՐՈՍՅԱՆ

Բաժանորդագրվե՛ք https://t.me/iravunk

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝