«ՔԱՂԱՔԱՑԻԱԿԱՆ ՊԱՅՄԱՆԱԳՐԻ» ՖԵՅՍԲՈՒՔՅԱՆ ՊԱՏԻ ՏԱԿԻ ԽՈՍԱԿՑՈՒԹՅՈՒՆՆԵ՞Ր

«ՔԱՂԱՔԱՑԻԱԿԱՆ ՊԱՅՄԱՆԱԳՐԻ» ՖԵՅՍԲՈՒՔՅԱՆ ՊԱՏԻ ՏԱԿԻ ԽՈՍԱԿՑՈՒԹՅՈՒՆՆԵ՞Ր

Ամենաընդդիմադիրի կեցվածք ընդունած ԱԺ ՀԱԿ խմբակցության պատգամավոր ՆԻԿՈԼ ՓԱՇԻՆՅԱՆԸ զարմանալիորեն չի շտապում իր իսկ կողմից ստեղծված նորաթուխ «Քաղաքացիական պայմանագիր» կուսակցության անունից պաշտոնական հայտարարություն տարածել, թե, ի վերջո, պատրաստվո՞ւմ են սահմանադրական բարեփոխումների վերաբերյալ մտնել բովանդակային քննարկման մեջ կամ արդյոք կհամալրե՞ն «Ոչ»-ի ճամբարը: Մինչդեռ այս ընթացքում Ն. Փաշինյանն ու յուր կուսակցությունն ակտիվորեն աշխատում են արտաքին ուժերի հետ, մասնավորապես` Գլենդելում սեպտեմբերի վերջին նա հավաք է կազմակերպել, ըստ մամուլում տարածված տեղեկությունների, նոր կուսակցության համար ֆինանսական հանգանակություն կազմակերպելու հույսով: Ի դեպ, նրա օգնական ՀԱԿՈԲ ՍԻՄԻԴՅԱՆԻՑ մեզ հաջողվեց պարզել, որ Ն. Փաշինյանը ԱՄՆ կմեկնի սեպտեմբերի 23-ին, այսինքն` այնպես չէ, որ երկրում չլինելն է պատճառը` սահմանադրական բարեփոխումների վերաբերյալ կուսակցական դիրքորոշում արտահայտելու համար: Ուշագրավ էր նաեւ «Իրավունքի» բարձրացրած հարցի վերաբերյալ «Քաղաքացիական պայմանագիր» կուսակցության մամլո պատասխանատու ԱԼԵՆ ՍԻՄՈՆՅԱՆԻ մեկնաբանությունը.

– Մենք մեր դիրքորոշումը բազմիցս ասել ենք` սահմանադրական բարեփոխումների հետ կապված: Այն մեզ համար կեղծ օրակարգ է, եւ դրա հետ կապված մեր վարչության անդամ Նիկոլ Փաշինյանը մեծածավալ հոդված է հրապարակել, որի բովանդակությանը կարող եք ծանոթանալ, նույնիսկ իր ֆեյսբուքյան պատին կա:
– Այնուամենայնիվ, այդ մասին կուսակցության անունից որեւէ հաղորդագրություն կամ հայտարարություն կլինի՞:
– Բազմիցս մեր հարցազրույցներում, ինչպես նաեւ ես` որպես մեր կուսակցության խոսնակ, լրատվամիջոցներից մեկի հարցին պատասխանել եմ, որ մեր օրակարգում նման հարց չկա: Հրավերի հետ կապված մեր դիրքորոշումն ասվել է: Մի խոսքով` մեր դիրքորոշման մեջ բաներ չեն փոխվել: Մեզ համար տարբերություն չկա երկրում սահմանադրության բարեփոխում կլինի, հանրաքվե կլինի, «այո» կլինի, «ոչ» կլինի, մենք պատրաստ չենք այն քննարկել ո՛չ իշխանության, ո՛չ ընդդիմության հետ: Մեզ համար օրակարգային նման հարց չկա:

ՀՐԱՆՏ ՍԱՐԱՖՅԱՆ

Բաժանորդագրվե՛ք https://t.me/iravunk

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝