Հ. Բիշարյանը` Գ. Իսագուլյանին. «Բացարձակապես բնորոշ է Կոմայգու «տղամարդկանց» բառապաշարին»

Հ. Բիշարյանը` Գ. Իսագուլյանին. «ԲԱՑԱՐՁԱԿԱՊԵՍ ԲՆՈՐՈՇ Է ԿՈՄԱՅԳՈՒ «ՏՂԱՄԱՐԴԿԱՆՑ» ԲԱՌԱՊԱՇԱՐԻՆ»

Օրերս կայացած ասուլիսի ժամանակ «Ազգային անվտանգություն» կուսակցության նախագահ Գառնիկ Իսագուլյանը, ով ժամանակին չէր հերքում, որ տարօրինակ կապերի մեջ է «Մհերի դուռ»` իրենց սարսափ-արարողակարգերով հայտնի, մութ կազմակերպության հետ, հայտարարություն է արել «Օրինաց երկիր» կուսակցության նախագահի հասցեին` մասնավորապես նշելով. «Արթուր Բաղդասարյանին ե՛ւ ֆիզիկապես, ե՛ւ մարմնապես, ե՛ւ բարոյապես, ե՛ւ հոգեպես տանել չեմ կարողանում, բայց նույնիսկ իր հետ պատրաստ եմ նստել ու քննարկել Սահմանադրության նախագիծը»: Վերջինիս կոպիտ քննադատության մասին, ինչը լայնորեն տեղ է գտել լրատվամիջոցներում, «Իրավունքը» պարզեց ԱԺ «Օրինաց երկիր» խմբակցության ղեկավար ՀԵՂԻՆԵ ԲԻՇԱՐՅԱՆԻ կարծիքը.

–Երբ քաղաքական գործիչը, չնայած Իսագուլյանին քաղաքական գործիչ համարելը շռայլություն է, իջնում է նման ցածր մակարդակի, ապա նույնիսկ անիմաստ է անդրադառնալ գրեթե ոչ մեկին չհետաքրքրող մարդու ասածներին: Դժվար է հավատալ, որ Գառնիկը սթափ վիճակում է արտահայտվել: Դրա մասին գրառումներ էին արել նաեւ բազմաթիվ օգտատերեր: Մարդը, որն իր ողջ կենսագրության մեջ պարբերաբար աչքի է ընկել հակասական արտահայտություններով, ով արդեն չես հասկանում` ում, այսպես ասած, դուդուկի տակ է պարում, ով իր իրարամերժ, անհասկանալի ու խառնակչական հայտարարություններով, դիրքորոշումներով պղտորում է քաղաքական դաշտը` իրեն իրավունք է վերապահում խոսել քաղաքական լրջագույն գործընթացներից, որոնցում ներգրավված են ազդեցություն եւ ասելիք ունեցող ուժեր եւ գործիչներ: Ինչ վերաբերում է Իսագուլյանի արտահայտած վերոնշյալ մտքին, ապա ողջ համացանցը ծաղրում, հեգնում էր նրան նման անհեթեթություններով շրջակա միջավայրն աղտոտելու համար: Ինձ համար, որպես կին, խիստ անհասկանալի է, որ տղամարդը կարող է մեկ այլ տղամարդու մասին նման արտահայտություններ անել, ինչը բացարձակապես բնորոշ է Կոմայգու «տղամարդկանց» բառապաշարին: Եվ վերջում առավել եւս, որ նա նաեւ ինքնախոստովանում է. «Կներեք, Արթուր Բաղդասարյանն ինձ վատություն չի արել…»: Ինչ ասեմ, սա յուրօրինակ մի ինքնախոստովանություն է մարդու բարոյական նկարագրի մասին:
– Եվս մեկ հարց. Բաղրամյան պողոտան սեպտեմբերի 1-ին կրկին կաթվածահար արվեց: Ինչպե՞ս եք վերաբերվում նրան, որ առաջին հայացքից չքաղաքականացված ակտիվիստներն այսօր արդեն սահմանադրական բարեփոխումների դեմ հայտարարություններ են անում ու ոստիկանության հետ սկսել են խոսել բռունցքների ու հայհոյանքների ոճով:
– Ի սկզբանե ասեմ, որ ոստիկանությունն այդքան թույլ չէ, որ իր հետ  խոսեն բռունցքներով ու հայհոյանքներով, իսկ ինչ վերաբերում է սահմանադրական բարեփոխումների դեմ հայտարարություններին, ապա դա նրանց իրավունքն է: Ես առիթ ունեցել եմ մի քանի անգամ հրապարակավ իմ դրական վերաբերմունքն արտահայտել քաղաքացիական ակտիվիստների պայքարին, ովքեր եւս ուզում են, որ մեր երկրում խնդիրները լուծվեն, ինչ-որ մի բան դեպի լավը փոխվի: Բայց ցանկացած պայքար` լինի քաղաքական, թե քաղաքացիական, պետք է դուրս չգա այն սահմաններից, որից այն կողմ հայհոյանքն է, բռունցքները, ուժի կիրառումը եւ այլն: Իհարկե, պայքարը մնում է պայքար, այնտեղ քաղցրավենիք չեն բաժանում, բայց եւ պետք է հնարավորինս զերծ մնալ բախումներից եւ նմանատիպ ոչ ցանկալի երեւույթներից: Ինչ վերաբերում է սահմանադրական փոփոխություններին, ապա համարում եմ, որ ՀՀ յուրաքանչյուր քաղաքացի` անկախ նրանից ակտիվիստ է, թե պետական պաշտոնյա, իրավունք ունի արտահայտել տեսակետներ, քարոզել գաղափարներ եւ այլն: Դրա մեջ արգահատելի բան չկա, ընդհակառակը` առնվազն անհասկանալի կլիներ, եթե ակտիվ, պայքարող մարդու տեսակն անհաղորդ լիներ այդ գործընթացի հանդեպ:

ՀՐԱՆՏ ՍԱՐԱՖՅԱՆ

Բաժանորդագրվե՛ք https://t.me/iravunk

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝