Որոշումները պետք է կայացվեն կոլեգիալ մտածողության արդյունքում. Գալուստ Սահակյան

Որոշումները պետք է կայացվեն կոլեգիալ

մտածողության արդյունքում. Գալուստ Սահակյան

Ազգային ժողովում Սահմանադրության նախագծի վերաբերյալ քննարկումների ընթացքում բարեփոխման կարիք ունեցող հոդվածները կենթարկվեն փոփոխությունների: Ինչպես հաղորդում է «Արմենպրես»­ը, այս մասին լրագրողների հետ զրույցում ասաց ՀՀ ԱԺ նախագահ Գալուստ Սահակյանը: Անդրադառնալով դիտարկմանը, թե կարծիքներ կան, որ Սահմանադրության նախագծում տեղ գտած կայուն մեծամասնության վերաբերյալ դրույթը պետք է տեղափոխվի ընտրական օրենսգիրք, Գալուստ Սահակյանը պատասխանեց. «Այո’, ես էլ եմ այդ կարծիքին: Ընդհանրապես կայուն մեծամասնություն ապահովելու համար տարբեր եղանակներ կան: Ես կարծում եմ, որ Վենետիկի հանձնաժողովն էլ կմտածի և տարբերակներ կառաջարկի, այստեղ էլ քննարկումների ընթացքում կգանք համաձայնության: Իսկ կայուն մեծամասնությունն անհրաժեշտ է ցնցումներից խուսափելու համար: Եթե Ազգային ժողովը չի ունենում կայուն մեծամասնություն, անընդհատ կառավարություն պիտի փոխվի: Ես կարծում եմ, որ մեր պետությունն այն վիճակում չէ, որ մենք նման բան թույլ տանք»:

ԱԺ նախագահը չհամաձայնեց հնչող տեսակետների հետ, թե Հանրապետական կուսակցությունը սահմանադրական փոփոխությունները նախաձեռնել է իշխանությունը պահելու համար: «Ենթադրենք Սահմանադրությունը չի փոխվում և մեզ մոտ մնում է կառավարման գործող մոդելը, Հանրապետական կուսակցությանն ի՞նչ է եղել, որ չկարողանա պահպանել իշխանությունը: Յուրաքանչյուր քաղաքական ուժի իրավունքն է իր տեսակետը հայտնել այս կամ այն հարցի վերաբերյալ, սակայն այս փոփոխությունները միտված չեն Հանրապետական իշխանությունը պահելուն: Եթե նման նպատակ լիներ, կարելի էր ԱՊՀ շատ երկրների նման Սահմանադրությունից հանել այն հոդվածը, որն արգելում է մեկի անձին երկրորդ պաշտոնավարման ժամկետից հետո առաջադրվել նախագահի պաշտոնում: Կարծում եմ, որ դա ավելի հեշտ է, քան մարդկանց բացատրել, որ պետք է լինի կոլեգիալ մտածողություն, որ ամեն ինչի կենտրոնում պետք է լինի մարդը, և որոշումները կայացվեն կոլեգիալ մտածողության արդյունքում»,­ շեշտեց ԱԺ նախագահը:

Հարցին, թե ի՞նչն էր պատճառը, որ Բարգավաճ Հայաստան կուսակցությունը փոխեց դիրքորոշումը սահմանադրական բարեփոխումների հարցում, Սահակյանը պատասխանեց, որ դեռևս ծանոթ չէ այդ կուսակցության դիրքորոշմանը: Դիտարկմանը, թե ԲՀԿ­ում, ըստ էության, արդեն կողմ են սահմանադրական բարեփոխումներին, Սահակյանն ասաց. «Ես կարծում եմ, որ ԲՀԿ­ի դիրքորոշումը մենք կիմանանք քննարկումների և քվեարկության ժամանակ: Բայց նաև կարող եմ ասել, որ փետրվարյան իրադարձություններից հետո քաղաքական իրավիճակ է փոխվել երկրում և դիրքորոշումների փոփոխությունները կարող են պայմանավորված լինել դրանով»: Դիտարկմանը, թե ընդդիմությունը պատրաստվում է «ոչ»­ի շարժում սկսել՝ ընդդեմ սահմանադրական բարեփոխումների, նա ընդգծեց, որ իրեն մտահոգում է այդ «ոչ»-­ը: «Գիտեք այս վերջին տարիների ընթացքում հասարակության մեջ մի կերպ ամրագրվեց, թե ինչ բան է ընդդիմությունը: : Հիմա էլ հասարակությունը պետք է կարողանա կռահել, թե ինչ բան է «ոչ»­ը: Դրա համար այդ «ոչ»­ի համար ես իսկապես մտահոգվում եմ»,­ ընդգծեց ԱԺ նախագահը:

Բաժանորդագրվե՛ք https://t.me/iravunk

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝