««ԸՆՏԱՆԻՔ» ՁԵՎԱԿԵՐՊՈՒՄԸ ՊԵՏՔ Է ԼԻՆԻ ՀԱՍԱՐԱԿՈՒԹՅԱՆ ԸՆԴՀԱՆՈՒՐ ԸՆԿԱԼՈՒՄՆԵՐԻՆ ՀԱՐԻՐ»
Արխիվ 12-16
««ԸՆՏԱՆԻՔ» ՁԵՎԱԿԵՐՊՈՒՄԸ ՊԵՏՔ Է ԼԻՆԻ ՀԱՍԱՐԱԿՈՒԹՅԱՆ ԸՆԴՀԱՆՈՒՐ ԸՆԿԱԼՈՒՄՆԵՐԻՆ ՀԱՐԻՐ»
Երեկ գործադիրի նիստից հետո լրագրողների հետ ճեպազրույցում Մարդու իրավունքների պաշտպան ԿԱՐԵՆ ԱՆԴՐԵԱՍՅԱՆԸ նշեց, որ ընդամենն օրեր առաջ է պաշտոնապես ստացել սահմանադրական բարեփոխումների նախագիծը, եւ մինչեւ շաբաթվա վերջ ՄԻՊ գրասենյակը մաս-մաս կհրապարակի իր դիտողությունները. «Կտանք հստակ մասնագիտական եզրակացություն, հատկապես այն գլուխների եւ հոդվածների վերաբերյալ, որոնք առնչվում են մարդու իրավունքներին, եւ դրա մեջ կլինեն թե՛ դրական, թե՛ բացասական երեւույթներ կամ փոփոխություններ, որոնք մենք կտեսնենք կամ կարձանագրենք»: Այնուամենայնիվ, «Իրավունքին» հաջողվեց սահմանադրական բարեփոխումների նախագծում տեղ գտած աղմկահարույց դրույթների մասին պարզել Կ. Անդրեասյանի տեսակետը, ինչը ներկայացնում ենք ստորեւ:
–Պարոն Անդրեասյան, կա՞ մտավախություն, որ մարդու իրավունքների պաշտպանի եզրակացությունը սահմանադրական բարփոխումների վերաբերյալ նույնպես սվիններով կընդունվի, ինչպես եղավ Վենետիկի հանձնաժողովի եզրակացության դեպքում:
– Կարծում եմ` իմ եզրակացությունները կարող են սվիններով ընդունվել, բայց իմ նպատակը սվիններով քննարկում հրահրելը չէ: Ես կասեմ այն, ինչ օբյեկտիվորեն կարծում եմ այս նախագծի մասին, մնացածը կքննարկեն մարդիկ: Այնպես որ, չեմ կարող կանխատեսել իրենց ռեակցիան իմ առաջարկներին:
– Վենետիկի հանձնաժողովն առաջարկում էր սահմանադրության մեջ փոփոխել «ընտանիք» հասկացության ձեւակերպումը, քանի որ, ըստ նրանց, այն ոչ թե կնոջ եւ տղամարդու միասնության արդյունք է, այլ երկու անձերի` անկախ սեռից: Հետաքրքիր է, թե ո՞րն է «ընտանիք» ձեւակերպումը` ՄԻՊ գրասենյակի համար:
– Ըստ իս, «ընտանիք» ձեւակերպումը, որն ամենասուր խնդիրներից մեկն է Հայաստանում, պետք է լինի հասարակության ընդհանուր ընկալումներին հարիր: Արագացնել ցանկացած գործընթացներ մեզ մոտ, որոնք կարող են առաջացնել հասարակության արժեհամակարգի լուրջ ցնցումներ, անտեղի են: Այն ավելի մեծ վնաս կլինի բոլոր մարդկանց հանդուրժողականության պաշտպանության եւ այլ խնդիրների լուծման համար: Այսինքն` չափից դուրս արագացնել Հայաստանում որոշակի գործընթացներ` կարող են վտանգ ստեղծել հենց նույն իրավունքների պաշտպանության եւ առանձին խմբերի պաշտպանության համար:
– Ի վերջո, կո՞ղմ եք, ի հեճուկս Վենետիկի հանձնաժողովի, մեր սահմանադրագետների կողմից «ընտանիք» ձեւակերպման մեջ շեշտադրված կնոջ եւ տղամարդու միասնություն գաղափարին:
– Ես կողմնակից եմ այն ընդհանուր արժեհամակարգին, որն այսօր կիսում է մեր հասարակությունը, իհարկե, ծայրահեղություններին դեմ լինելով:
ՀՐԱՆՏ ՍԱՐԱՖՅԱՆ
Բաժանորդագրվե՛ք https://t.me/iravunk
1
31107 դիտում
2
19189 դիտում
3
1750 դիտում
4
1649 դիտում
5
1537 դիտում
3
17693 դիտում
4
11364 դիտում
5
8086 դիտում
5
8286 դիտում
