ԿԻՄ ԲԱԼԱՅԱՆ. «ԻՆՉՈ՞Ւ ՊԵՏՔ Է ԳՈՐԾԱԴԻՐԸ ՍԴ ԱՆԴԱՄԻՆ ՊԱՇՏՈՆ ՏԱ, ԵԹԵ...»

ԿԻՄ ԲԱԼԱՅԱՆ. «ԻՆՉՈ՞Ւ ՊԵՏՔ Է ԳՈՐԾԱԴԻՐԸ ՍԴ

ԱՆԴԱՄԻՆ ՊԱՇՏՈՆ ՏԱ, ԵԹԵ...»

Սահմանադրական դատարանի անդամ Կիմ Բալայանն այսօր լրագրողների հետ զրույցում իր մասնագիտական կարծիքը ներկայացրեց նոր Սահմանադրության վերաբերյալ: Բալայանը դրական է գնահատում  կառավարման  խորհրդարանական համակարգին անցումը, դրական է, որ իշխանությունը վերադարձվում է ժողովրդին`  հանրաքվեի միջոցով:  Բայց դրա հետ մեկտեղ կան թերություններ, որոնց մասին բարձրաձայնեց բ ՍԴ անդամը:  Օրինակ, ՍԴ դատավորների տարիքային ցենզը: Մինչեւ 2005 թ-ի սահմանադրական փոփոխությունները նշված էր 70 տարի: 2005 թ-ին դարձավ 65 տարեկան: Ինչո՞ւ, որովհետեւ  մտավախություն կար, որ իրավապահ համակարգի աշխատողները  թոշակի գնալուց հետո կվերադառնան  Սահմանադրական դատարան: Նոր Սահմանադրությամբ ՍԴ դատավորի տարիքը դարձավ 70 տարեկան: Բա ո՞ւր մնացին 2005 թ-ի հիմնավորումները:

Կիմ Բալայանի մյուս մտահոգությունը վերաբերում է նախագահի հրամանագրերին: Նոր Սահմանադրության նախագծով առաջին ատյանի դատավորներին նշանակում է նախագահը մինչեւ իրենց լիազորությունների ավարտը: Առաջարկվում է  նախագահի լիազորությունների ավարտից հետո` վեց ամսվա ընթացքում,  բարձրագույն խորհուրդը դատարանի նախագահների նշանակումներ անի:

Որպես իրավաբան` Կ. Բալայանը մեկ այլ խնդիր եւս տեսնում է: Խոսքը վերաբերում է  ՍԴ անդամ-գործադիր մարմին հակադրությանը: «Եթե ՍԴ  անդամ կարող է դառնալ  40 տարեկանից սկսած, սա նշանակում է, որ մարդն այնպես պետք է աշխատի, որ իշխանությունը  գոհ լինի իրենից եւ նշանակի ՍԴ անդամ: 12 տարի աշխատելուց հետո  ՍԴ անդամը դարձավ 52 տարեկան: Նա պետք է գնա գործադիր մարմնի դուռը, որ իրեն  աշխատանք տան: Իսկ եթե  ՍԴ անդամը սահմանադրության գերակայությունն է ապահովել, ոչ թե գործադիրի շահերն է սպասարկել, գործադիր մարմինն ինչու պետք է նրան պաշտոն տա: Այսինքն` նորմեր կան, որոնք ներմուծել են` առանց հաշվի առնելու մեր սովորույթները, մտածելակերպը»,-  մանրամասնում է  ՍԴ անդամը

Կիմ Բալայանի խոսքով` նոր Սահմանադրությամբ դատական իշխանության անկախության երաշխիքների նվազեցում է տեսնում: «Դատական ամբողջ համակարգի ձեւավորումը  տրվում է  բարձրագույն դատական խորհրդին:  Իսկ այդ խորհուրդն ինչպես է ընտրվում: Տասն անդամից հինգին ձեւավորում է  դատական իշխանությունը,  մյուս հինգը տրվում է ԱԺ-ին` քաղաքական մարմնին: Մինչդեռ ճիշտ կլիներ, որ  բարձրագույն  դատական խորհրդի տասը տեղից երեքը տային փաստաբանների պալատին, որոնք  շփվում են դատարանների հետ, կարող են գնահատել դատավորների աշխատանքը, երկուսը տային մարդու իրավունքների պաշտպանին: Սրա շնորհիվ նաեւ մարդու իրավունքների ինստիտուտի հեղինակությունը կբարձրանար: Որեւէ երկրում  օրինականություն չի կարող լինել, եթե փաստաբաններն իրենց պատշաճ տեղը չունեն»,-եզրափակեց Կիմ  Բալայանը:

ՍՈՆԱ ԴԱՎԹՅԱՆ

Բաժանորդագրվե՛ք https://t.me/iravunk

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝