ՆՈՒՅՆԻՍԿ ՏԵԽՆԻԿԱՆ ՉԴԻՄԱՑԱՎ ՎԱՐԴԱՅԻ ԿՐՔՈՏ ՇՈՈՒԻՆ (Տեսանյութ)

Արխիվ 12-16 29 Օգոստոս, 2015 18:38

ՆՈՒՅՆԻՍԿ ՏԵԽՆԻԿԱՆ ՉԴԻՄԱՑԱՎ ՎԱՐԴԱՅԻ ԿՐՔՈՏ ՇՈՈՒԻՆ (Տեսանյութ)

Երեւանյան ռեստորանային համալիրներից մեկում կայացավ Ուկրաինայից ժամանած հայկական արմատներով հայտնի երգչուհի եւ պարուհի ՎԱՐԴԱՅԻ (Վարդանուշ Մարտիրոսյանի) մասնակցությամբ սպասված բարեգործական համերգը: Երեկոյի առաջին հատվածում իրենց կատարումներով հանդես եկան հայաստանյան շոու-բիզնեսի ներկայացուցիչները, որոնց թվում էին Նարեկ Բավեյանը, Ալինա Կիրակոսյանը, Արսեն Գեւորգյանը (Սենչ), Վլադիմիր Պողոսյանը եւ այլք: Ու թեպետ երգիչ ԱՐՄՈ ՀՈՎԵՅԱՆԸ երգեց այն մասին, որ «Ուշ է հիմա, ես գնամ տուն, որ չլացի իմ սերը թաքուն», բայց, այնուամենայնիվ, հանդիսատեսը մնաց մինչեւ վերջ` անհամբեր սպասելով հենց Վարդայի շոույին: Եվ, իհարկե, կրքոտ գեղեցկուհին երկար սպասեցնել չտվեց ու հայ հանդիսատեսին ներկայացավ իր մի քանի երգերի կատարումներով, ապա pole dance պարով: Այ, հենց այստեղ է, որ նույնիսկ տեխնիկան չդիացավ կրքոտ շոույին ու երաժշտությունն անջատվեց: Արդյունքում մի քանի շրջան էլ անելով խողովակի վրա` Վարդան վայր իջավ ու շտապեց ասել, որ սա դեռ ամենը չէ: Այո, երգչուհին, իսկապես, փորձեց ամեն ինչ անել, որպեսզի երեկոյից գոհ մնան բոլորը, ինչը նրան հաջողվեց եւ անգամ տեխնիկական խոտանից հետո նա շարունակեց նույն ոգեւորությամբ: Իսկ կրակներով համարից հետո ներկա կանանց զգուշացրեց, որ եթե անգամ փորձեն անել այն ամենն, ինչ կատարվեց բեմում, հանկարծ չկրկնեն կրակներով համարն ու կրակ չարտաշնչեն իրենց ամուսնների վրա: Ի դեպ, թեպետ Վարդան շնորհակալություն հայտնեց ներկաներին եւ հրաժեշտ տվեց, բայց վերջում եւս մեկ անակնկալ էր սպասվում: Երգչուհին աճուրդի էր հանել իր իսկ կողմից ստեղծված Varda բրենդի լողազգեստներից մեկը, որի վաճառքից ստացված հասույթով էլ որոշվել էր տաքդիրներ գնել մանկատան երեխաների համար: Ուշագրավ էր այն, որ թեպետ սկզբում, կարծես թե, չկային համարձակներ, ովքեր «ալամ-աշխարհի» աչքի առաջ իրենց տիկնոջ կամ ընկերուհու համար ներքանազգեստ կգնեին, բայց, արի ու տես, որ կամաց-կամաց բավական թեժ պայքար գնաց: Ներքնազգեստը վաճառվեց 135 հազար դրամով: Այսքանից հետո, մնում է հորդորել երգչուհուն, որ Կիեւից վերջնականապես տեղափոխվի Երեւան, չէ՞ որ մի ներքնազգեստը 135 հազար դրամով վաճառելն արդեն իսկ հոյակապ սկիզբ է բիզնեսի համար:

Ինչեւէ, ամփոփելով «Վարդա շոուն», հիշեցնենք, որ համերգից ստացված ողջ հասույթը կտրամադրվի Գավառի մանկատան երեխաներից մեկի աչքի, Երեւանի «Մարի Իզմիրյան» մանկատան մի երեխայի ողնաշարի վիրահատությունների, ինչպես նաեւ դեղորայքի ձեռքբերման համար: Այս մասին առավոտյան կայացած ասուլիսի ժամանակ երգչուհին ընդգծել էր. «Շատ լավ կլինի, որ այսպիսի բարեգործական համերգներն ավանդույթ դառնան, եւ ամեն ամիս մեկ արտիստ կարողանա օգնել երեխաների»: