ԿԽՄԿ-ի տվյալներով` Ղարաբաղյան հակամարտության հետեւանքով անհայտ կորածների թիվը գերազանցում է 4500-ը
Արխիվ 12-16
ԿԽՄԿ-Ի ՏՎՅԱԼՆԵՐՈՎ` ՂԱՐԱԲԱՂՅԱՆ ՀԱԿԱՄԱՐՏՈՒԹՅԱՆ ՀԵՏԵՎԱՆՔՈՎ ԱՆՀԱՅՏ ԿՈՐԱԾՆԵՐԻ ԹԻՎԸ ԳԵՐԱԶԱՆՑՈՒՄ Է 4500-Ը
Ուղիղ 33 տարի առաջ օգոստոսի 30-ը Լատինական Ամերիկայում համարվեց Անհայտ կորածների միջազգային օր, ապա այն նաեւ ամրագրվեց ՄԱԿ-ի օրացույցում: Այսօր արդեն անհայտ կորածների միջազգային օրը նշվում է բազմաթիվ երկրներում, այդ թվում Հայաստանում, որովհետեւ թերեւս չի գտնվի, որեւէ մի ազգ կամ պետությունը, որը բախված չլինի նման խնդրի հետ: Օրվա խորհրդին ընդառաջ Կարմիր խաչի միջազգային կոմիտան հաղորդագրություն է տարածել եւ կոչ արել առավել ջանք գործադրել անհայտ կորածների ճակատագրերի մասին տեղեկություններ գրանցելու գործում ու ընդգծել. «Կառավարությունները եւ քաղաքացիական հասարակության ներկայացուցիչները պետք է անեն ավելին` հակամարտության կամ այլ հանգամանքներում անհայտ կորած անձանց հետ կատարվածը կամ նրանց գտնվելու վայրի մասին տեղեկությունները փաստագրելու ուղղությամբ եւ աջակից լինեն նրանց ընտանիքներին»: Իսկ անհայտ կորածների հարցերով զբաղվող ԿԽՄԿ խմբի ղեկավար Մարիան Պիկասուն շեշտել է. «Ընտանիքների վիշտը նույնն է, անկախ նրանից` իրենց հարազատն անհայտ կորել է պատերազմի, արտագաղթի, թե աղետի ժամանակ: Հույժ կարեւոր է հավաքագրել անհայտ կորածների վերաբերյալ այսօր հասանելի բոլոր տեղեկությունները (օրինակ՝ թե երբ եւ ինչ հանգամանքներում են կորել)` hետագայում ընտանիքներին պատասխան տրամադրելու ժամանակ օգտագործելու նպատակով»: Անդրադառնալով` անհայտ կորածների ընտանիքներին` տիկին Պիկասուն հավելել է. «Հաճախ, հատկապես հակամարտության իրավիճակներում, անհայտ կորածների խնդիրն ուշադրությունից դուրս է մնում։ Կառավարությունները եւ մյուս դերակատարները պետք է ապահովեն, որ այս հիմնախնդիրը մշտապես լինի օրակարգում, եւ անեն ավելին` ընտանիքների նյութական եւ հոգեբանական կարիքները հոգալու ուղղությամբ»:
Ի դեպ, որ ԿԽՄԿ-ի տվյալներով` Ղարաբաղյան հակամարտության հետեւանքով անհայտ կորածների թիվը գերազանցում է 4500-ը, որից շուրջ 400-ը գրանցված են Հայաստանում: ԿԽՄԿ-ն աջակցում է իշխանություններին՝ անհայտ կորածների ճակատագրերը պարզելու եւ ընտանիքներին աջակցելու ուղղությամբ՝ Հայաստանում, Ադրբեջանում եւ Լեռնային Ղարաբաղում։ Այն ներառում է նաեւ անհայտ կորած անձանց ընտանիքի անդամներից կենսաբանական նմուշների հավաքումը, ինչը հետագայում կօգտագործվի նույնականացման գործընթացում եւ կմեծացնի աճյունների ինքնության ճանաչման հավանականությունը:
ՀՐԱՆՏ ՍԱՐԱՖՅԱՆ
Բաժանորդագրվե՛ք https://t.me/iravunk
1
31127 դիտում
2
19198 դիտում
3
1750 դիտում
4
1659 դիտում
5
1561 դիտում
3
17693 դիտում
4
11364 դիտում
5
8086 դիտում
5
8286 դիտում
