ՀԱՅՈՒՀԻՆ ԱՐՑԱԽՅԱՆ ՏԱՐԱԶՈՎ ԿՀԱՅՏՆՎԻ ՏԻԵԶԵՐՔԻ ԳԵՂԵՑԿՈՒՀԻՆԵՐԻ ՇԱՐՔՈՒՄ

ՀԱՅՈՒՀԻՆ ԱՐՑԱԽՅԱՆ ՏԱՐԱԶՈՎ ԿՀԱՅՏՆՎԻ ՏԻԵԶԵՐՔԻ ԳԵՂԵՑԿՈՒՀԻՆԵՐԻ ՇԱՐՔՈՒՄ

Սեպտեմբերի 12-ին հարեւան Վրաստանի սրտում` Թբիլիսիում, առաջին անգամ կկայանա Miss Planet միջազգային գեղեցկության մրցույթը: Մեծ հռչակ ունեցող մրցույթն այս տարի կառանձնանա նրանով, որ առաջին անգամ մասնակցություն կունենա Հայաստանը: Այս մասին «Իրավունքի» հետ զրույցում նշեց մրցույթի ազգային տնօրենը` «Թոփ մոդել Հայաստան» ազգային ասոցիացիայի հիմնադիր ԳԵՎՈՐԳ ԱՍԱՏՐՅԱՆԸ, ապա մանրամասնեց. «Մրցույթի հաղթողը կարժանանա ոսկե թագի, իսկ առաջին երեք հաղթողները` հատուկ մրցանակների: Որպես ազգային տնօրեն` «Թոփ մոդել Հայաստան» ազգային ասոցիացիան որոշեց, որ Miss Planet 2015 մրցույթին Հայաստանը կներկայացնի մոդել, 18-ամյա ԴԱՅԱՆԱ ԴԱՎԹՅԱՆԸ, ով շատ հետաքրքիր նորաձեւության ցուցադրությունների է մասնակցել ու պատրաստ է այս մրցույթին»:

Նշենք, որ գեղեցկության մրցույթի մասնակիցները հանդես կգան նախ ազգային հագուստներով, ապա լողազգեստներով եւ 20 երկրների ներկայացուցիչներից կազմված ժյուրին կընտրի ամենագեղեցիկներին: Գ. Ասատրյանն անդրադառնալով այն հարցին, թե ի՞նչ կերպարով Դայանան կներկայանա մրցույթին` ընդգծեց. «Դիզայներ Ֆաինա Հարությունյանը երկու նոր հագուստ է պատրաստել հենց Դայանայի համար, որը հետագայում նրա նոր հավաքածուի մասը կկազմի, ինչպես նաեւ նախատեսել ենք եւս մեկ հայկական ավանդական հագուստ, որի հեղինակը Տերյան մշակութային կենտրոնն է: Հագուստի ձեւվածքները վերցված են Արցախի հայկական ավանդական հագուստից` 19-րդ դարի սկիզբ-20-րդ դարի վերջ: Եվս մեկ գաղտնիք բացեմ, արդեն իսկ արվել են  գեղեցիկ ֆոտոշարքեր Դայանայի մասնակցությամբ, որոնք շուտով կհրապարակվեն»:
Ի դեպ, ուսումնասիրելով երեք տասնյակից ավելի պետությունների մասնակիցների լուսանկարները, որոնք հրապարակված են մրցույթի պաշտոնական էջում, կարելի է հետեւություն անել, որ Հայաստանի անունը կլինի ոչ միայն Տիեզերքի գեղեցկուհիների շարքում, այլեւ առաջատար դիրքերում: Ուշագրավ է նաեւ այն, որ մրցույթի օրը համընկնում է Դ. Դավթյանի ծննդյան տարեդարձի հետ, ինչը, վստահ ենք, հաջողություն կբերի նրան:

ՀՐԱՆՏ ՍԱՐԱՖՅԱՆ

Բաժանորդագրվե՛ք https://t.me/iravunk

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝