ԴՊՐՈՑՈՒՄ ԴՐԱՄԱՀԱՎԱՔՈՒԹՅԱՆ ՊԱՐՏԱԴՐԱՆՔՆ ԱՐԳԵԼՎՈՒՄ Է, ԲԱՅՑ...

ԴՊՐՈՑՈՒՄ ԴՐԱՄԱՀԱՎԱՔՈՒԹՅԱՆ ՊԱՐՏԱԴՐԱՆՔՆ ԱՐԳԵԼՎՈՒՄ Է, ԲԱՅՑ...

Ընդամենը օրեր անց կրկին կհնչեն դպրոցի զանգերն ու կազդարարվի նոր ուսումնական տարվա սկիզբը: Հենց այս առթիվ էլ «Իրավունքի» «Ուղիղ կապ» խորագրում այս անգամ հյուրընկալեցինք ՀՀ ԿԳ նախարարության հանրակրթության վարչության պետ ՆԱՐԻՆԵ ՀՈՎՀԱՆՆԻՍՅԱՆԻՆ: Բարձրացված խնդիրները հիմնականում վերաբերում էին դպրոցներում դրամահավաքության դեպքերին, աշակերտներին դասագրքերի տրամադրման կարգին, ինչպես նաեւ ավագ դպրոցներում առկա պրոբլեմներին:

«ԱՌԱՋԻՆԻՑ ՉՈՐՐՈՐԴ ԴԱՍԱՐԱՆՆԵՐԻ ԴԱՍԱԳՐՔԵՐԸ ԱՆՎՃԱՐ ԵՆ ՍՏԱՆՈՒՄ»

- Երկու երեխա ունեմ, որոնցից մեկն այս տարի առաջին դասարան է գնալու, մյուսը փոխադրվել է երրորդ դասարան: Այս դեպքում ինչպե՞ս է կարգավորվում դասագրքերի վարձակալության հարցը: (ՍԱՔՈ ՀԱՅՐԱՊԵՏՅԱՆ, Արարատի մարզ)
- Առաջինից չորրորդ դասարանի աշակերտներն անվճար են ստանում դասագրքեր: Իսկ արդեն բարձր դասարաններում դասագրքերի վարձավճարների մասին նախարարի հրաման ունենք, ըստ որի, հնարավոր չնչին վարձավճարով Ձեր երեխաներն այդ դասագրքերը կստանան: Այդ մուծումները կատարվում են արդեն շուրջ 10-ը տարի: Մեկ դասագրքի վարձավճարը 300-400 դրամ է, եւ մեկ ուսումնական տարվա դասագրքերի վարձավճարը կլինի 4 հազար դրամի սահմաններում:

- Քրոջս երեխան այս տարի 6-րդ դասարանից փոխադրվել է 7-րդ դասարան: Նախորդ տարի դասագրքերի գումարը բավականին մեծ էր: Ուզում էի ճշտել, թե որքան գումար հավաքեն սեպտեմբերի համար, որպեսզի կարողանան այս տարի էլ դասագրքերի գումարը վճարել: (ԱՆՆԱ, ք. Երեւան)

- Հինգերորդ դասարանից սկսած նախարարի հրամանով սահմանվել է դասագրքերի վարձավճար եւ այդ մուծումները կատարվում են արդեն շուրջ 10-ը տարի: Մեկ դասագրքի վարձավճարը 300-400 դրամ է եւ մեկ ուսումնական տարվա դասագրքերի վարձավճարը կլինի մոտ 4 հազար դրամի սահմաններում: Բայց, եթե Ձեր քույրը երկու դպրոցական տարիքի երեխա ունի, ապա դպրոցի տնօրինությունը կարող է զիջումներ անել:

- Որպես կանոն` դասարանում պետք է 36-ից ավելի լինի աշակերտների թիվը, որպեսզի դասարանը կիսվի: Բայց ինչպե՞ս եք պատկերացնում` 35 աշակերտ լինի դասարանում ու որակյալ կրթություն ստանան նրանք, երբ հատկապես տարրական դասարաններում անհատական մոտեցում է պետք երեխաներին: (ԱՐՓԻՆԵ ՀԱՐՈՒԹՅՈՒՆՅԱՆ, ք. Արմավիր)
- Շատ եմ սիրում այդ 35 հոգանոց դասարանները, կա մեթոդ եւ ձեւ այդ դասարաններում աշխատելու, եւ այսօր հաղթահարվում է այդ խնդիրը ուսուցիչների կողմից: Երբ բազմազան ու շատ են երեխաները, միայն կրթության խնդիր չի լուծվում, այստեղ նաեւ դաստիարակության, համագործակցության, հանդուրժողականության, շատ ընկերներ ունենալու խնդիրներն են լուծվում: Իհարկե, մեծ դասարանում կան նաեւ խնդիրներ, որոնք հաղթահարելի դժվարություններ են, բայց նաեւ շատ դրական լուծումներ են գտնվում` երեխայի հետագա զարգացման համար: Դժբախտաբար, 35 հոգանոց դասարանների թիվն այսօր շատ քիչ է: Այնպես որ, ծնողն ինքն է որոշում եւ կարող է ընտրել այնպիսի դպրոց, որտեղ դասարանները փոքրաթիվ են: Մինչդեռ ծնողները, սովորաբար, ընտրում են հենց այն դպրոցները, որտեղ մեծ թվով դասարաններ են: Երբ նույնիսկ ասում ենք, որ այստեղ շատ են երեխաները` 32-34 հոգի են արդեն, պատասխանում են` ոչինչ, մենք այդ դպրոցն ենք ուզում, այդ դասարանն ենք ուզում եւ թող մեր երեխան լինի 35-րդը:
- Ինչպես գիտենք, առաջին դասարան հաճախելը պայմանավորված է որեւէ հստակ թվականի ծնունդով, կապ չունի` տվյալ թվականի հունվարի 1-ին է ծնվել երեխան, թե դեկտեմբերի 31-ին: Ստացվում է, որ հինգ ու կես տարեկան երեխան հանրակրթության մասնիկն է դառնում: Հնարավո՞ր է վերանայել այս կարգը, որ գոնե 6 տարեկանը լրացած հաճախեն դպրոց: (ՄԱՐԻԱՄ ՄՈՒՇԵՂՅԱՆ, ք. Երեւան)
- Հարցը օրենքով է կարգավորվում, եւ այսօր չի քննարկվում, որ որեւէ փոփոխություն մտցվի: Իսկ այսօր օրենքն ասում է, որ մինչեւ դեկտեմբերի 31-ը, այսինքն` տվյալ օրացուցային տարում,  6 տարեկանը լրացած երեխան է գնում դպրոց:

«ԴԵՌԵՎՍ ԱՅՆՔԱՆ ԷԼ ՉԵՆ ՎՍՏԱՀՈՒՄ ԱՎԱԳ ԴՊՐՈՑԻՆ»

- Մտահոգությունս վերաբերում է հանրակրթական ուսումնական հաստատության ավագ դպրոցին: Այն արդարացնո՞ւմ է սպասելիքները, քանի որ ակնհայտ է` այն դեռեւս իր խարիսխը չի գցում ո՛չ աշակերտների, ո՛չ հասարակության գիտակցության մեջ: (ՍԱՄՎԵԼ ԱԼԵՔՍԱՆՅԱՆ, ք. Երեւան)
- Կան ավագ դպրոցներ, որոնք կայացել են, եւ որոնց պահանջարկն արդեն հասարակության մեջ կա: Եվ նույնիսկ այդ դպրոցներում շատ շուտ են սպառվում տեղերը եւ դժվարանում են նոր աշակերտներ ընդունել: Բայց կան դպրոցներ էլ, որոնք, ուղղակի, չեն կարողանա դիմակայել մրցակցությանը եւ գուցե մի օր կփակվեն: Այլ խնդիր է, որ հասարակությունը, ծնողը եւ երեխան դեռեւս այնքան էլ չեն վստահում ավագ դպրոցին: Նույնիսկ լավագույն երեխաները, որոնք շատ լավ գիտելիքներ ունեն, զուգահեռ, անպայման, չգիտես ինչու, լրացուցիչ պարապմունքների են գնում: Թեպետ մենք իրենց ասում ենք` երեք տարիների ընթացքում մեր ուսումնական ծրագրերը, մեր չափորոշիչները թույլ են տալիս ձեզ, որ դուք հանգիստ նախապատրաստվեք քննություններին եւ առանց կրկնուսույցների մոտ պարապելու` ընդունվեք բուհ: Ի դեպ, հատկապես մարզերում այս խնդիրը շատ լավ լուծված է:
- Ե՞րբ դպրոցներից իսպառ կվերանան դրամահավաքությունները, որոնց մասին Դուք էլ շատ լավ գիտեք, բայց անմեղ հայացքով շարունակում եք պնդել, թե` նման բան չկա: (ՎԱՐԴԱՆ ԳՐԻԳՈՐՅԱՆ, ք. Երեւան)
- Դրամահավաքությունն արգելված է դպրոցում եւ ուսումնական տարվա սկզբում, տոն օրերին բազմաբնույթ շրջաբերականներ են ուղարկվում այդ մասին դպրոցի տնօրեններին: Ես չեմ ասում, թե դրամահավաքություն չկա, կարող է լինել: Սակայն, կրկնում եմ` դրամահավաքության պարտադրանքն արգելում ենք: Բայց եթե դպրոցը որեւէ կարիք ունի եւ ծնողների հետ միասին որոշակի խնդիրներ են լուծում, դա իրենք են կարգավորում դպրոցի ներսում: Կա դպրոցի տնօրեն, ու յուրաքանչյուր ծնող կարող է ազատ նրա առջեւ այս հարցը բարձրացնել: Եթե դրամ է հավաքվում, եւ երեխաները էքսկուրսիաների են գնում կամ գնում են մշակութային որեւէ օջախ, ու բոլորը միասին համաձայն են, եւ կան մեկ-երկու հոգի, որոնք չեն համաձայնում, կարող են չմասնակցել այդ դրամահավաքությանը: Թող ծնողները համարձակ լինեն եւ այս խնդիրներն իրենց դպրոցի հետ լուծեն: Այնուամենայնիվ, եթե դրամահավաքությունը կառավարման խորհրդով չի որոշված, եթե ծնողական համայնքը դրան մասնակից չէ, ու արձագանք է լինում մեր «Թեժ գծին», եւ այն, իսկապես, իրականությանը համապատասխանում է, ապա անպայման այդ դպրոցի տնօրենը պատժվում է: Բայց, եթե նույն այդ դրամահավաքությունը կատարվում է ծնողների ցանկությամբ, մենք այն արգելել չենք կարող: Երբ, ասենք, դպրոցի ծնողներով որոշում եք կայացնում ավելի լավ գրատախտակ ունենալ, դա արդեն դպրոցի ներսի խնդիրներ են, ձեր մեջ պետք է կարգավորեք: Իսկ մենք արգելում ենք որեւէ պարտադիր դրամահավաքություն, որը զայրույթ է առաջացնում, որը ծնողի կամքով չէ:

ՀՐԱՆՏ ՍԱՐԱՖՅԱՆ

Հ. Գ.- Նյութի շարունակությունը կներկայացնենք առաջիկա օրերին Iravunk.com կայքում:

Բաժանորդագրվե՛ք https://t.me/iravunk

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝