«ՌՈՒԲԵՆ ՀԱՅՐԱՊԵՏՅԱՆԻ ԱՆՈՒՆԻՑ ՀԱՇՏՈՒԹՅԱՆ ԱՌԱՋԱՐԿՈՎ ՄԱՐԴԻԿ ԵՆ ԵԿԵԼ»
Արխիվ 12-16
«ՌՈՒԲԵՆ ՀԱՅՐԱՊԵՏՅԱՆԻ ԱՆՈՒՆԻՑ ՀԱՇՏՈՒԹՅԱՆ ԱՌԱՋԱՐԿՈՎ ՄԱՐԴԻԿ ԵՆ ԵԿԵԼ»
«Դեռ հիվանդանոցում գտնվելու երկրորդ օրվանից Ռուբեն Հայրապետյանի անունից Արսենի հետ հաշտության առաջարկով մարդիկ են եկել: Եվ այսօր, այո, ամուսինս հաշտության ձեռք մեկնած Ռուբեն Հայրապետյանի դեմ բողոք չի ներկայացնում»,- մեզ հետ զրույցում անդրադառնալով Ռուբեն Հայրապետյանի կողմից «Էյր Արմենիա» ՓԲԸ համասեփականտեր Արսեն Ավետիսյանին ծեծի ենթարկելու եւ հաշված օրեր անց հաշտվելու պատմությանը՝ ասաց Արսեն Ավետիսյանի կինը` ԻԶԱԲԵԼԱ ՄԵԼՔՈՒՄՅԱՆԸ: Մեր զրուցակիցը հավելեց նաեւ, որ ամուսինը այս պահին թեպետ հիվանդանոցում չէ, բայց դեռ ամբողջությամբ չի կազդուրվել: Նա համաձայն չէ նաեւ մամուլում հնչող այն տեսակետների հետ, որ Ավետիսյանին իբր ձեռնտու էր այդ միջադեպը.
-Թող մի հատ պատկերացնեն էլի՝ ոնց կարա մարդը ինքն իրեն նման բանի մեջ գցի, ինչ-որ բան փոխվե՞ց: Ո՛չ, «Էյր Արմենիայի» պարտքերը նույն ձեւի մնում են, ոչինչ չի փոխվել: Ավելին՝ այս դեպքից հետո միայն ամուսնուս առողջական վիճակը վատացավ, էլ չեմ ասում մեր բոլորիս հոգեկան վիճակի մասին: Զարմանում եմ, որ բոլորը սեւեռվել են Ռուբեն Հայրապետյանի վրա, բայց մոռանում են Գառնիկ Պապիկյանի` «Տարոն» ընկերության հիմնադիրի գործոնի մասին: Քանի որ հենց ինքն է այս ամենի դերակատարը, հենց ինքն է դիմել Ռուբեն Հայրապետյանին: Չգիտեմ ինչ-ինչ ճանապարհներով, բայց ոչ ոք նրա մասին չի խոսում:
Գործարարի կինը չցանկացավ մանրամասնել դեպքի մասին, եւ թե իրականում ինչ է եղել այդ օրը, բայց միանշանակ նկատեց.
- Ամուսինս, չնայած հաշտություն է կնքել, բայց ուզում եմ հանրությանը պարզ դառնա, որ Արսենը ոնց որ մինչ այդ որեւէ հարաբերություն չի ունեցել Հայրապետյանի հետ, չեն ճանաչել միմյանց, այնպես էլ հիմա որեւէ հարաբերություն չունեն: Ուղղակի, ելնելով ինչ-ինչ պատճառներից, Արսեն Ավետիսյանը որոշել է չբողոքել, այսքանը:
Հիշեցնենք, որ այս հաշտության արդյունքում էլ ՀՀ Գլխավոր դատախազությունը տեղեկացրեց, որ դիմողի բողոքի բացակայության հիմքով մերժվում է Ռ. Հայրապետյանի նկատմամբ քրեական գործի հարուցումը: Եվ հասկանալի է, որ Ա. Ավետիսյանը հազիվ թե առանց լուրջ պայմանավորվածությունների որոշեր բողոք չներկայացնել:
ԻԼՈՆԱ ԱԶԱՐՅԱՆ
Բաժանորդագրվե՛ք https://t.me/iravunk
1
31200 դիտում
2
3367 դիտում
3
2309 դիտում
4
1760 դիտում
5
1608 դիտում
2
19213 դիտում
3
17693 դիտում
4
11364 դիտում
5
8086 դիտում
5
8286 դիտում
