ԴԻԼԻՋԱՆՅԱՆ ԳԱՂՏՆԻՔՆԵՐԸ ԿԲԱՑԱՀԱՅՏՎԵ՞Ն

ԴԻԼԻՋԱՆՅԱՆ ԳԱՂՏՆԻՔՆԵՐԸ ԿԲԱՑԱՀԱՅՏՎԵ՞Ն

Մոտ մեկ ամիս առաջ առիթ էինք ունեցել անդրադառնալ Թեղուտի գյուղապետ Արարատ Թամրազյանի որդու՝ Արագած (Արգո) Թամրազյանի անվան հետ կապված մի ուշագրավ պատմության: Արգոն, ով հետախուզման մեջ է գտնվում, հերիք չէ, որ, ըստ մեր աղբյուրի՝ «իր համար հանգիստ, անվախ, անկաշկանդ Դիլիջանում ման է գալիս», այն էլ՝ «զենքը վրան խփած», դեռ հասցնում է անգամ՝ «բիզնեսներ «կանտրոլի» տակ է պահել»: Մասնավորապես՝ «դեպի Հաղարծին վանքային համալիր տանող ճանապարհին, «Դիլիջան ազգային պարկի» տարածքում գտնվող հանգստյան տաղավարները, որն ըստ փաստաթղթերի` տնօրինում է սպանված Արտավազդ Թամրազյանի կինը»: Խոսքը քսանից ավել տաղավարների մասին է, որոնց օրավարձը 20-25 հազար դրամ է: Եվ հաշվի առնելով, որ ամառային այս սեզոնին «կլիենտների» պակաս չկա, արդյունքում՝ ամսական լուրջ փողեր են ձեւավորվում:

Հետախուզվողի այս բիզնեսը հարկային դաշտո՞ւմ է: Դիլիջանի հարկայինի պետ ԳՈՌ ԵՆԳԻԲԱՐՅԱՆԸ, ի պատասխան մեր հարցմանը, այն ժամանակ տեղեկացրել էր, թե՝ «Տաղավարները օրինական չեն, բայց հարկ մեզ տալիս են»: Խոսքը նաեւ եկամտահարկի մասին է, բայց քանի որ պարոն Ենգիբարյանն այն կարծիքին էր, թե՝ «Այդ տաղավարներն աշխատում են միայն շաբաթ-կիրակի օրերին», պետք էր ենթադրել, որ հարկերն էլ հենց այդ չափով էին վճարվում:
Այլ բան, որ մեր աղբյուրը հավաստիացնում էր, որ տաղավարները գործում են շաբաթվա բոլոր օրերին, ենթադրելի էր, որ մնացած հինգ օրերի գումարները շրջանցում էին պետությանը:
Եվ ահա օրերս Դիլիջանի հարկայինի պետը նորից մեզ տեղեկացրեց, որ մեր տվյալներն ավելի ստույգ էին: Այսինքն՝ հիշատակված հրապարակումից հետո ստուգայց է իրականացվել այդ տարածքում, որի արդյունքում պարզվել է, որ իսկապես բոլոր տաղավարներն աշխատում են ողջ շաբաթ եւ օրը քսանչորս ժամ: Այս պահին էլ ստուգումները շարունակվում են, ու թե ինչ հարկային խնդիրներ ի հայտ կգան, պարոն Ենգիբարյանը խոստացավ առաջիկայում տեղյակ պահել:
Հավելենք նաեւ, որ «Դիլիջան ազգային պարկի» տարածքում գործող այդ առնվազն կասկածելի բիզնեսը նաեւ պարկի գործունեության հետ կապված է շատ հարցեր առաջ քաշում: Առավել եւս, որ «Ազգային պարկի» ղեկավարությանն ուղղվելիք հարցերի պակաս չկա. բավական է միայն տեսնել, մեղմ ասած, բավականին նոսրացած դիլիջանյան անտառները, եւ այդ հարցերը մեխանիկորեն են առաջ գալիս:
ԻԼՈՆԱ ԱԶԱՐՅԱՆ

Բաժանորդագրվե՛ք https://t.me/iravunk

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝