ԻՆՉՊԵ՞Ս Է ԵՐԹԵՎԵԿԵԼԻ ՓՈՂՈՑԸ ԴԱՐՁԵԼ ԲԱՑՕԹՅԱ ՇՈՒԿԱ

ԻՆՉՊԵ՞Ս Է ԵՐԹԵՎԵԿԵԼԻ ՓՈՂՈՑԸ ԴԱՐՁԵԼ ԲԱՑՕԹՅԱ ՇՈՒԿԱ

Երեկվանից «Մալաթիա» գյուղմթերքների տոնավաճառի բացօթյա տարածքում գյուղմթերքի վաճառքով զբաղվող մի քանի տասնյակ քաղաքացիներ հարկադրված տեղափոխվել են նույն շուկայի փակ տարածք: Բայց ահա բացօթյա տարածքում առեւտուր իրականացնողների մի զգալի մասն այդպես էլ չի համաձայնել փակ տարածքում առեւտրով զբաղվել` դժգոհելով առեւտրի սղությունից եւ պայմաններից:

Թե ինչն է հերթական աղմկահարույց այս պատմության պատճառը՝ ի վերջո մեկնաբանեց նաեւ շուկայի ղեկավարությունը. ըստ «Մալաթիա» տոնավաճառի փոխտնօրեն Աշոտ Հակոբյանի հրապարակային խոսքի. «Տոնավաճառի բացօթյա տարածքը երթեւեկելի փողոց է, եւ այդտեղ  չի թույլատրվում առեւտրով զբաղվել»:
Եվ իրոք. այդ բացօթյա հատված ասածը տոնավաճառին հարակից փողոցն է, որտեղ սակայն տարիներ շարունակ առեւտուր է իրականացվում: Բայց եթե փոխտնօրենն էլ է պնդում, որ դա ընդամենը «երթեւեկելի փողոց է», ուրեմն՝ վարձակալությամբ որպես շուկա օգտագործելու համար չտրամադրված քաղաքապատկան տարածքում այդ ինչպե՞ս է տարիներ շարունակ առեւտուր իրականացվել: Եվ վերջապես, եթե առեւտուր է կազմակերպվել չթույլատրված գոտում, ուրեմն ի՞նչ հարաբերություններ էին հարկային մարմինների հետ:
Մի խոսքով, եթե իրոք այդ «երթեւեկելի փողոցում» այսքան տարի փաստորեն գյուղացիներին շուկայի տարածքը տրվել է անօրինական ճանապարհով, դրանից բազում հետաքրքիր հարցեր են առաջ գալիս: Եվ առաջին հարցը՝ բացօթյա շուկան իրոք անօրինակա՞ն էր: Հարցի պատասխանը փորձեցինք պարզել «Մալաթիա»  տոնավաճառի ղեկավարությունից, եւ սեփականատեր Սիմոն Հակոբյանը տվեց նման պատասխան.
- Ինչի՞ միանգամից` անօրինական: Չէ, ուղղակի հիմա շուկայի փակ տարածքում տեղ կա, մենք էլ գյուղացիներին առաջարկել ենք նույն վարձավճարով գան ու իրենց առեւտուրը անեն ներսում՝ ավելի հանգիստ դրսի փոշուց, եղանակային պայմաններից հեռու: Մարդիկ էլ համաձայնել են հիմնականում, ոչ մի խնդիր չկա: Չեմ հասկանում էս աժիոտաժի պատճառը` գյուղացիներն ու տնօրինությունը իրար մեջ խնդիրը լուծել են, ի՞նչ կա ուրիշ:
- Բայց պարոն Հակոբյան, ամեն դեպքում մեր հարցին այդպես էլ չպատասխանեցիք. այս տարիների ընթացքում ինչպե՞ս է Ձեզ հաջողվել երթեւեկելի հատվածում առեւտուր կազմակերպել:
- Ճիշտն ասած, հիմա շատ զբաղված եմ, հետո ավելի մանրամասն կզրուցենք, բայց ոչ մի անօրինականություն չկա, հանգիստ եղեք:
Հուսանք, որ ամբողջական պարզաբանումներ շուկայի տնօրինությունից կստանանք, քանի որ պարոն Հակոբյանի ասածը միայն նոր հարցեր առաջ բերեց: Օրինակ, եթե բացօթյա շուկան օրինական էր, ուրեմն քաղաքապետարանը պաշտոնապես թույլ էր տվել փողոցը վերածել առեւտրի գոտո՞ւ: Բայց ուրեմն ինչո՞ւ են հիմա իրավիճակը փոխում՝ առեւտրականների զգալի մասին էս նեղ օրերին դարձնելով գործազուրկ: Կամ, եթե պարոն Հակոբյանի ասածի պես՝ «ոչ մի խնդիր չկա», ուրեմն ինչո՞ւ են առեւտրականներին ոստիկանների միջոցով «բացատրում»:
Բայց ահա Երեւանի քաղաքապետարանը երեկ տարածած իր պարզաբանմամբ որոշակի հստակեցումներ մտցրեց. «...Հերթական ստուգայցը Մալաթիա-Սեբաստիա վարչական շրջանի շուկայամերձ Վանթյան փողոցում էր, որտեղ սանիտարական ոչ պատշաճ պայմաններում, փողոցի ու հարակից մայթերի ողջ երկայնքով տասնյակ տարիներ իրականացվել է բացօթյա ապօրինի առեւտուր...»:
Սա տալիս է Ս. Հակոբյանի` «Ինչի՞ միանգամից` անօրինական...» դժգոհության հստակ պատասխանը՝ լավ էլ ապօրինի էր, քաղաքապետարանն է ասում: Չնայած՝ քաղաքապետարանի հայտարարությունն էլ իր հերթին պակաս «զարմանալի» չէ. «տասնյակ տարիներ իրականացվել է...»: Մի ամբողջ փողոց տասնյակ տարիներ վերածվել է ապօրինի առեւտրային գոտում ու պատկան պետական այրերից ոչ մեկը չի՞ տեսել: Բայց այդ ինչո՞ւ այսպես միանգամից տեսողությունները բացվեց: Իրականում՝ ամեն ինչ էլ հասկանալի է: Բայց ամեն դեպքում՝ այդ ապօրինի առեւտրի փաստը դեռ պարզաբանման սպասող բազում դրվագներ ունի:
ԻԼՈՆԱ ԱԶԱՐՅԱՆ

Բաժանորդագրվե՛ք https://t.me/iravunk

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝