ԼԵՎՈՆ ԶՈՒՐԱԲՅԱՆԻ ՊԵՏԱԿԱՆ ԼԵԶՈՒՆ ԱՆԳԼԵՐԵ՞ՆՆ Է

ԼԵՎՈՆ ԶՈՒՐԱԲՅԱՆԻ  ՊԵՏԱԿԱՆ ԼԵԶՈՒՆ

ԱՆԳԼԵՐԵ՞ՆՆ Է

ՀԱԿ խմբակցության ղեկավար Լեւոն Զուրաբյանն այսօր Վենետիկի հանձնաժողովի անդամների հետ հանդիպման ժամանակ  իր ելույթը սկսեց անգլերենով, կարծես մոռանալով, որ Հայաստանի պետական լեզուն հայերենն է:

«Իրավունք»-ը Լեւոն  Զուրաբյանից  պարզեց` ինչո՞ւ  նա խոսեց անգլերեն, ոչ թե հայերեն: «Որովհետեւ թարգմանության մեջ շատ բան կորում է: Ավելին ասեմ` դրա մասին անգամ գրել է Վենետիկի հանձնաժողովն իր  եզրակացության մեջ: Հանձնաժողովը գրում է, որ որոշ դատողություններ կարող են սխալ լինել եւ այդ սխալները հիմնված  լինեն պաշտոնապես մեզ տրված թարգմանության սխալի վրա: Մենք հասկանում ենք, որ բազմաթիվ «ժուլիկություններ» են արել  թարգմանության մեջ»,- արդարանում էր ընդդիմադիր գործիչը:

- Երբ ես խոսում եմ Վենետիկի հանձնաժողովի հետ, չեմ ցանկանում, որ որեւէ  միտք կորսվի թարգմանության ժամանակ:

- Բայց մեր  պետական լեզուն հայերենն է, պրն Զուրաբյան:

-Ե՞վ: Դա նշանակում է, որ ես, բացի հայերենից, իրավունք չունե՞մ  այլ լեզվով խոսելու:

- Իհարկե, ունեք, բայց սկզբում հայերեն:

- Դուք սխալվում եք: Նման օրենք գոյություն չունի Հայաստանում:

- Հայաստանում տեղի ունեցող պաշտոնական միջոցառումների ժամանակ պետական լեզուն հայերենն է:

- Բերեք ցույց տվեք :

- ՀԱԿ խմբակցության քարտուղար  Արամ Մանուկյանն ԱԺ-ում   պարբերաբար է հիշեցնում մեր պետական լեզուն հարգելու մասին:

- Պետական լեզվի ստատուսը չի նշանակում,  որ ՀՀ քաղաքացիներն ու ՀՀ քաղաքական գործիչները, բացի հայերենից, իրավունք չունեն այլ լեզվով  խոսելու:

Հ.Գ. Հատուկ ձեզ համար, պրն Զուրաբյան, լեզվի մասին օրենքի համաձայն` Հայաստանի Հանրապետության պետական լեզուն հայերենն է, որը սպասարկում է հանրապետության կյանքի բոլոր ոլորտները, իսկ եթե այդ մասին չգիտեք գոնե լռե'ք, անհարմար է:

ՍՈՆԱ ԴԱՎԹՅԱՆ

Բաժանորդագրվե՛ք https://t.me/iravunk

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝