ՀԵՆՐԻԽ ՄԽԻԹԱՐՅԱՆԸ՝ ԲՈՒՆԴԵՍԼԻԳԱՅԻ ՀԵՐՈՍ

ՀԵՆՐԻԽ ՄԽԻԹԱՐՅԱՆԸ՝ ԲՈՒՆԴԵՍԼԻԳԱՅԻ ՀԵՐՈՍ

Գերմանիայի առաջնությունը դեռ նոր է մեկնարկել, իսկ Հայաստանի ազգային հավաքականի եւ Դորտմունդի «Բորուսիայի» կիսապաշտպան Հենրիխ Մխիթարյանը հասցրել է դառնալ Բունդեսլիգայի հերոս: Վերջին օրերի ընթացքում գերմանական մամուլի էջերը ողողված են հայ ֆուտբոլիստի մասին հոդվածներով, եւ դա հուշում է, որ սա ամենահաջող եւ աղմկոտ մեկնարկն էր Մխիթարյանի կարիերայում:

Հենց առաջին տուրում Մխիթարյանը դուբլի հեղինակ դարձավ Մյոնխենգլադբախի «Բորուսիայի» դեմ խաղում: Kicker-ը Մխիթարյանին ճանաչել է հանդիպման եւ առաջին տուրի լավագույն ֆուտբոլիստ, տալով նրան ամենաբարձր՝ 1 գնահատականը: Ըստ Kicker-ի՝ անհնար է չսիրահարվել Հենրիխ Մխիթարյանի խաղին. «Հանդիպումից հետո Մխիթարյանին խնդրեցին խոսել «Բորուսիայում» ունեցած իր դերի մասին: Հայ կիսապաշտպանը համեստորեն նշեց, որ միայն ձգտում է արդարացնել մարզչի սպասումները, մինչդեռ իրականում նրան հաջողվեց շատ ավելին: Իր հիանալի ու գեղեցիկ խաղով Հենրիխը պատառոտեց Մյոնխենգլադբախի «Բորուսիայի» պաշտպանությունը, որը հիշեցնում էր մի անորակ շապիկ: Այս մրցաշրջանում Հենրիխն առաջին անգամ չէ, որ մեծ ներդրում է ունենում թիմի ընդհանուր հաջողությունում: Նա արդեն խփել է 6 գնդակ եւ կատարել է 3 գոլային փոխանցում»: Մխիթարյանին լավագույնն են ճանաչել նաեւ Der Westen-ը, Goal.com-ը, Bild-ը: Դորտմունդի «Բորուսիայի» մարզական տնօրեն Միխայել Ցորկը Բունդեսլիգայի մեկնարկից հետո անդրադարձել է Մխիթարյանին` նշելով. «Մինչեւ այս` Մխիթարյանը հիանալի խաղեր էր անցկացնում, բայց հիմա նա արտակարգ մարզավիճակում է: Հենրիխը շատ հանգիստ է գործում եւ վստահ է իր ուժերին: Հուսով եմ, նա կշարունակի նույն ոգով»: Իսկ ահա Spox.com-ը հայ ֆուտբոլիստի մասին գրել է. «Մխիթարյանը կատարեց հսկայական աշխատանք, նա անկասելի էր: Հաջողությամբ խաղաց նաեւ պաշտպանությունում, իսկ գերազանց խաղն ամրապնդեց դուբլով»:
Բունդեսլիգայի պաշտոնական կայքը եւս չի շրջանցել Մխիթարյանի հիանալի մեկնարկը, եւ ընդարձակ հոդվածով անդրադարձել է հայ ֆուտբոլիստին:
Արդյունքում՝ Մխիթարյանի անունը նորից դարձավ տրանսֆերային խոսակցությունների հիմնական թեմաներից մեկը: «Լիվերպուլը» Metro.co.uk-ի փոխանցմամբ` հայ ֆուտբոլիստի տրանսֆերի համար պատրաստ է վճարել 21,5 միլիոն եվրո: Մխիթարյանին ձեռք բերելու համար «Լիվերպուլը» կպայքարի Թուրինի «Յուվենտուսի» հետ: Բայց նաեւ շրջանառվում է այն վարկածը, որ անկախ այս պայքարից՝ Մխիթարյանը դեռ «Բորուսիան» լքելու որեւէ ցանկություն չունի:
ՔՐԻՍՏԻՆԵ ՊԵՏՐՈՍՅԱՆ
Հ.Գ. Երեկ Եվրոպայի լիգայի որակավորման փլեյ-օֆֆ փուլի առաջին խաղում Դորտմունդի «Բորուսիան» Նորվեգիայում մրցեց տեղի «Օդդի» հետ: Խաղն ավարտվեց 3:4 հաշվով` հօգուտ դորտմունդցիների: Հաղթական գոլը դորտմունդցիների կազմում խփեց Հենրիխ Մխիթարյանը:

Բաժանորդագրվե՛ք https://t.me/iravunk

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝