ՀՅԴ-Ն ԻՇԽԱՆՈՒԹՅԱՆ ՀԵՏ ԿՈԱԼԻՑԻԱ ԿԱԶՄԵԼԸ ՉԻ ԲԱՑԱՌՈՒՄ

ՀՅԴ-Ն ԻՇԽԱՆՈՒԹՅԱՆ ՀԵՏ ԿՈԱԼԻՑԻԱ ԿԱԶՄԵԼԸ ՉԻ

ԲԱՑԱՌՈՒՄ

ՀՅԴ-ն  քաղաքական այն ուժերից  է, որը, բացի սահմանադրական բարեփոխումներից, որոշ հարցերում եւս  կարողանում է կառուցողական եզրեր գտնել  իշխանության հետ: Հետաքրքիր է, բացի սահմանադրական բարեփոխումներից, կա մի հարց, որի շուրջ ի ՀՅԴ-ն  տարաձայնություն ունի իշխանության հետ: Այս եւ այլ հարցերի շուրջ «Իրավունք»-ը զրուցեց  ՀՅԴ խմբակցության ղեկավար Արմեն Ռուստամյանի հետ:

- Պրն Ռուստամյան, բացի սահմանադրական բարեփոխումներից,  կա՞ որեւէ հարց, որի  շուրջ  ՀՅԴ-ն իշխանության հետ չի կարողանում համաձայնության գալ:

- Մենք ներկայացրել ենք մեր յոթ կետերը իշխանությանը: Խնդիրներ ենք տեսնում տնտեսության մեջ,  սոցիալական ոլորտում: Մենք խնդիրներ ենք առանձնացնում, որոնք լուծված չեն: Թեեւ նոր սահմանադրության նախագիծը  լավ հիմք ենք համարում այս հարցերի լուծման համար, բայց այսօրվա իրավիճակը մեզ չի գոհացնում:

- Քանի որ  նոր սահմանադրությունը համապատասխանում է ՀՅԴ-ի մոտեցումներին, հնարավո՞ր է ՀՅԴ-ն  իշխանության հետ կոալիցիա կազմի:

- Դրա մասին խոսակցություններ չկան: Ես ասել եմ  եւ ասում եմ` մեր  պահանջները եթե բավարարվում են, հրաժարվել սեփական պահանջներից միայն ինքնանպատակ ընդդիմություն մնալու համար, անիմաստ է: Եթե ընդունվում է մեր ուղղությունը, պատրաստ ենք թեւերը քշտել, մտնել, գործն իրականացնել:

- Այսինքն` իշխանության հետ կոալիցիա կազմելը ՀՅԴ-ն չի բացառում:

- Չենք բացառում:

- Որպես ՀՀ քաղաքացի եւ որպես պատգամավոր` ինչպես  եք գնահատում  ՀՀԿ անդամ Ռուբեն Հայրապետյանի եւ նրա թիկնապահների կողմից «Էյր Արմենիա»  ավիաընկերության տնօրեն Արսեն Ավետիսյանին ծեծի ենթարկելու փաստի մասին:

- Դատապարտելի  է մեզ համար: Սա մի դեպք չէ, երկու դեպք չէ:Այս հոռի բարքերը, անպատժելիության մթնոլորտը նորից բխում են նույն քաղաքական համակարգից:

- ՀՅԴ-ի ու իշխանության ռեսուրսները բավարա՞ր են  թույլ չտալու ընդդիմությանը հանրությանը տրամադրելու «հակա» նոր սահմանադրությանը: Աշնանը ՀԱԿ առաջնորդ Լեւոն Տեր-Պետրոսյանը ժողովրդին փողոց է հանելու` ընդդեմ այս բարեփոխումների:

- Հակաքարոզը  եթե հիմնավորված է, տրամաբանված, պատրաստ ենք բանավիճել:  Քանակ պետք չէ, որակ պետք:

- Ընդդիմությանը, ըստ Ձեզ, չի՞ հաջողվի հանրությանը տրամադրել ընդդեմ  բարեփոխումների:

- Կարծում եմ` ոչ, քանի որ ավելի  այլընտրանք  ընդդիմությունը չի կարող  ներկայացնել: Լավ, էս չանենք, էն չանենք, բա ի՞նչ անենք:

- Իշխանափոխություն...

- Ինչպե՞ս: Իրենք ասում են, ինչ էլ լինի (նկատի ունի` ինչ իշխանություն էլ գա-խմբ.), սրանցից լավը կլինի: Բայց ինչի ես դրան հավատամ: Եկել են, ու լավ չի եղել:

ՍՈՆԱ ԴԱՎԹՅԱՆ

Բաժանորդագրվե՛ք https://t.me/iravunk

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝