ԿՈՌՈՒՊՑԻՈՆ ՇՂԹԱՅԻ ԲԱՑԱՀԱՅՏՈՒՄ ՃԱՆԱՊԱՐՀԱՅԻՆ ՈՍՏԻԿԱՆՈՒԹՅՈՒՆՈՒՄ
Արխիվ 12-16
ԿՈՌՈՒՊՑԻՈՆ ՇՂԹԱՅԻ ԲԱՑԱՀԱՅՏՈՒՄ ՃԱՆԱՊԱՐՀԱՅԻՆ
ՈՍՏԻԿԱՆՈՒԹՅՈՒՆՈՒՄ
ՀՀ քննչական կոմիտեն Երևանի քննչական վարչությունում քննվող քրեական գործի շրջանակներում բացահայտել է հակաօրինական գործունեությամբ զբաղվող մի շղթա: Այն ձևավորվել և գործել է Ճանապարհային ոստիկանության որոշ աշխատակիցների կողմից, ինչը դարձել է նոր կոռուպցիոն սկանդալի պատճառ:
«Փաստինֆո»-ի տեղեկացմամբ կոռուպցիոն երևույթի հիմքում գերապահով խավի կողմից կատարած ճանապարհատրանսպորտային երթևեկության խախտումների վերահասցեագրումն է եղել անվճարունակ անձանց անունով: Շղթան գործել է հետևյալ սխեմայով՝ վճարունակ անձանց անունով գրանցված մեքենաների կողմից թույլ տրված ճանապարհային երթևեկության խախտումների դեպքում նրանց անունով վարչական իրավախախտում ձևակերպելու և տույժ նշանակելու մասին որոշումները Ճանապարհային ոստիկանության որոշ պաշտոնատար անձանց միջոցով վերահասցեագրվել են այլ մարդկանց անուններով:
Բացի այդ, քննության ընթացքում բացահայտվել է նաև, որ Ճանապարհային ոստիկանության որոշ աշխատակիցներ երթևեկության կանոնների խախտումներին պատշաճ կերպով չեն արձանագրել, չեն ծանուցել, տույժ նշանակելու մասին որոշումները պատշաճ կերպով չեն կազմել, ինպես նաև խախտել են դիմումների քննարկման սահմանված կարգը։
Այս աղմկահարույց հարցի մասին պարզաբանում ստանալու համար «Իրավունք»-ը դիմեց ոստիկանության լրատվության և հասարակայնության հետ կապերի վարչությանը, սակայն այնտեղից մեզ տեղեկացրեցին, որ քանի դեռ Քննչական կոմիտեում շարունակվում է քրեական գործի քննությունը, ուստիև իրենց կողմից տրված մեկնաբանությունը օրենքի խախտում կլինի: Քննչական կոմիտեի լրատվական ծառայությունից էլ «Իրավունք»-ին տեղեկացրեցին, որ նշված գործի մասին կոմիտեն առաջիկայում հանդես կգա առանձին հայտարարությամբ:
Այստեղ ամենակարևորը ոչ թե կոռուպցիոն այս սկանդալի բացահայտման փաստն է, այլ հետագա քայլերի ձեռնարկումը: Պարզից էլ պարզ է, որ որևէ միջին օղակի պաշտոնյա ինքնագլուխ չէր էլ կարող նման «շղթա» մտածել ու այն կյանքի կոչել: Մնում է հասկանալ, թե ու՞մ «հրամանով» է նման զազրելի քայլ մոգոնվել, որպեսզի ֆինանսապես գերապահով խավի միլիարդները հանկարծ միլիոններ չդառնան, իսկ ինչ վերաբերում է հարուստների կատարած խախտումները հասարակ քաղաքացիների վրա բարդելուն, ապա ըստ այդ «հրաշագործների» խմբի մտքի թռիչքի՝ հասարակ քաղաքացին խելոք է, կդիմանա, շատ-շատ այս ու այն կողմ կվազի ու քանի որ գլխով բետոնե պատ քանդել հնարավոր չէ, ստիպված կլինի իր անվամբ «ամրագրված» գումարը վճարել, սեփական առողջությունը փրկելու համար:
Այնպես, որ կոռուպցիոն ռիսկեր պարունակող ցանկացած շղթայի բացահայտման մասին կցկտուր տեղեկությունից ուրախանալու հիմքեր առանձնապես չկան ու չեն էլ կարող լինել այնքան ժամանակ, քանի դեռ կոնկրետ չեն հնչեցվել նման կոռուպցիոն շղթաների ձևավորմամբ զբաղվող իրական հեղինակների անունները:
ԱՐՄԻՆԵ ԳՐԻԳՈՐՅԱՆ
Բաժանորդագրվե՛ք https://t.me/iravunk
1
31209 դիտում
2
3752 դիտում
3
2334 դիտում
4
1760 դիտում
5
1608 դիտում
2
19213 դիտում
3
17693 դիտում
4
11364 դիտում
5
8086 դիտում
5
8286 դիտում
