Վիկտոր Ռեբեց. «ԳՅՈՒՄՐԻՆ ԽՈՇՈՐ ԵՐԿԱԹՈՒՂԱՅԻՆ ՀԱՆԳՈՒՅՑ Է ԵՎ ԱՅՍՏԵՂ ԿԱ ՄԵԾ ԻՆՏԵԼԵԿՏՈՒԱԼ ՆԵՐՈՒԺ»

Վիկտոր Ռեբեց. «ԳՅՈՒՄՐԻՆ ԽՈՇՈՐ ԵՐԿԱԹՈՒՂԱՅԻՆ ՀԱՆԳՈՒՅՑ Է ԵՎ ԱՅՍՏԵՂ ԿԱ ՄԵԾ ԻՆՏԵԼԵԿՏՈՒԱԼ ՆԵՐՈՒԺ»

Երկաթուղայինների մասնագիտական տոնի առթիվ օգոստոսի 1-ին մեծ տոնակատարություն էր կազմակերպվել հայրաքաղաք Գյումրիում: «Հարավկովկասյան երկաթուղի» ՓԲԸ-ի տնօրեն ՎԻԿՏՈՐ ՌԵԲԵՑՆ այս մասին մեզ հետ զրույցում նախ նշեց.

- Բոլորովին էլ պատահականություն չէ, որ այս տոնակատարությունն անցկացվում է Գյումրիում, որովհետեւ Գյումրին խոշոր երկաթուղային հանգույց է եւ այստեղ կա մեծ ինտելեկտուալ ներուժ, ինչի առհավատչյան անցյալ տարի նոր տեխնոլոգիայի ներմուծումն էր այստեղ: Արդյունքում մենք կարողացել ենք վերանորոգել էլեկտրագնացները եւ այստեղի վագոնները, կարելի է ասել, իրենց տեխնիկական հագեցվածությամբ ամենաժամանակակիցն են թե՛ հանրապետությունում, թե՛ ողջ Անդրկովկասում: Իսկ այն նորությունները, որոնք ստեղծվում են այստեղ, հետագայում կիրառվում են այլ տարածքներում:

- Արդեն իսկ ստեղծված նորություններից, ո՞րը կառանձնացնեք այս պահին:

- Այն ձեր առջեւ է, այսօր առաջին անգամ ընդհանուր ցուցադրության ենք ներկայացրել TM տեխնոլոգիական մոտրիսը, որը կառուցվել է Գյումրիում մեր ինժեներների կողմից: Այն նախատեսված է ենթակառուցվածքի զննման եւ վիճակի գնահատման համար: Նոր տեխնիկայի կիրառումը նաեւ թույլ կտա նվազեցնել ծախսերը, քանի որ նախկինում զննումների անցկացման համար օգտագործվում էին 4 վագոնից կազմված էլեկտրագնացքներ: Հատկանշական է, որ մոտրիսը կառուցվել է սեղմ ժամկետներում` գաղափարի ծագման օրվանից մինչեւ շահագործման հանձնելը անցել է 7 ամիս: Նման շարժակազմի կիրառումը թույլ կտա էապես բարձրացնել անցկացվող ենթակառուցվածքի զննումների որակը: Մոտրիսը թույլ կտա նաեւ հսկել էներգամատակարարման համակարգը եւ կոնտակտային ցանցը, կիրականացնի անցկացվող զննումների տեսագրությունը եւ արխիվացումը` առավել մանրամասն ուսումնասիրություններ անցկացնելու համար:

- Այսինքն` այն որպես տրանսպորտային միջոց չի՞ ծառայի:

- Այն ամբողջությամբ նախատեսված է տեխնիկական անվտանգության ապահովման համար եւ ոչ թե ուղեւորներ փոխադրելու: Այս բոլոր միջոցներն ուղղված են երկաթուղում անվտանգության մակարդակի բարձրացմանը: Ի դեպ, ասեմ ձեզ, որ կիրառվող միջոցներն արդեն ակնհայտ արդյունք են տվել` էապես կրճատվել են գնացքների գծից դուրս գալու դեպքերը. եթե 2008 թվականին գրանցվել էր 97 նման դեպք, ապա 2014 թվականին՝ միայն 5:

- Պարոն Ռեբեց, հետաքրքիր է Ձեր տեսակետը Հայաստան-Իրան երկաթգծի կառուցման վերաբերյալ:

- Կարծում եմ, որ այն դուռ կբացի բեռնափոխադրումների համար: Բեռների մի մասը, որն այսօր ընկնում է սանկցիաների կիրառման տակ, դրանք չեն կարող ուղարկվել ներքին շուկաներ: Հետեւաբար այն տրամաբանորեն շատ հարմար է եւ ճիշտ է կառուցել ու դրան զուգընթաց տարբեր տրանսպորտային միջոցների կիրառման դեպքում` ավտոմոբիլ, երկաթուղային, բեռնափոխադրողները կգտնեն օպտիմալ սխեմա առաքման համար: Համոզված եմ, որ բեռնափոխադրման մի մասը կիրականացվի հենց այդ երկաթուղային տրանսպորտով:

- Իսկ որքանո՞վ է հավանական, որ այն մոտ ապագայում իրականություն կդառնա:

- Դուք գիտեք Նախագահի դիրքորոշումը եւ ընդհանրապես այդ ճանապարհի կարեւորությունն ապացուցված է: Հիմա պետք է ներդրողներ գտնել, քանի որ նախագիծը բավական թանկարժեք է: Այստեղ պետք է մի քանի ներդրողների միջոցներ համախմբել, սա է ողջ խնդիրը:

- Վերադառնալով օրվա խորհրդին` մի վերջին հարց. ի՞նչ է սպասվում երկաթուղայիններին մասնագիտական տոնի առթիվ:

- Մենք ավանդաբար նշում ենք այս տոնը եւ մեր մասնագետների մաքսիմալ ունեցած հաջողությունների արդյունքներն ամփոփելով`մեր աշխատակիցների մի մեծ խումբ պարգեւատրվում են: Նշեմ, որ ավելի քան 200 աշխատակից ստացել են խրախուսական մրցանակներ եւ պարգեւատրումները դեռ կշարունակվեն:

ՀՐԱՆՏ ՍԱՐԱՖՅԱՆ

Հ.Գ.- Հիշեցնենք, որ «Հարավկովկասյան երկաթուղի» ՓԲԸ տեղեկացմամբ օգոստոսի 2-ին` Երկաթուղայինների օրվա կապակցությամբ, երթեւեկությունը «ՀԿԵ» ՓԲԸ հանրապետության բոլոր էլեկտրագնացքներով կլինի անվճար:

Բաժանորդագրվե՛ք https://t.me/iravunk

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝