ԴՊՐՈՑԻ ՏՆՕՐԵՆ. «ԴՊՐՈՑՆ ԱՎԱԳ ԴԱՐՁՆԵԼՈՒՑ ԱՌԱՋ`ՊԵՏՔ Է ՈՒՍՈՒՄՆԱՍԻՐԵԼ ԸՆԴՀԱՆՈՒՐ ՎԻՃԱԿԸ»

ԴՊՐՈՑԻ ՏՆՕՐԵՆ. «ԴՊՐՈՑՆ ԱՎԱԳ ԴԱՐՁՆԵԼՈՒՑ ԱՌԱՋ` ՊԵՏՔ Է ՈՒՍՈՒՄՆԱՍԻՐԵԼ ԸՆԴՀԱՆՈՒՐ ՎԻՃԱԿԸ»

Այսօր ավագ դպրոցներից շատերն ունեն բազմաթիվ խնդիրներ, ամենագլխավորը`շենքային ոչ բարենպաստ պայմաններն են: Այդ դպրոցներից մեկն էլ Երեւանի Սերո Խանզադյանի անվան հ. 184 ավագ դպրոցն է, որն  իր մեծ ձեռքբերումներով հանդերձ, ունի շենքային բազմաթիվ  խնդիրներ: 2011 թվականից դպրոցը ներառվել է ավագ դպրոցների ցանկում, առանց հաշվի առնելու շենքային պայմանները. «Որոշ դպրոցներում ցանկություն հայտնեցին դառնալ ավագ դպրոց, իսկ որոշների դեպքում էլ հաշվի չառան շենքի պայմանները: Եթե իմ ցանկությամբ լիներ, ապա չէի ցանկանա, որ այս դպրոցը դառնար ավագ, քանի որ շենքը շատ փոքր է: Պետք է թույլ տային, որ ՀՀ ԿԳ նախարարությունն ընտրեր այն դպրոցներին, որոնք ունեին լավ պայմաններ: Պատահական սկզբունքով մեր դպրոցը դարձավ ավագ: Կոնկրետ մեր դպրոցին անրաժեշտ է լրացուցիչ եւս մեկ հարկ կառուցել, որպեսզի ունենանք լաբորատորիաներ, այժմ  այս բացը լրացնում ենք ԵՊՀ-ում, որի հետ ձեռք ենք բերել համագործակցության համաձայնություն: Դպրոցն այսօր չունի ֆիզիկական պատրաստության համար նախատեսված դահլիճ, աշակերտներն ֆիզկուլտուրայի դասընթացն անցկացնում են մոտավորապես 70 քմ. տարածքում, որը նախկինում ծառայել է որպես դասասենյակ, պատերը քանդել ենք եւ վերածել սպորտդալիճի»,- «Իրավունքի» հետ զրույցում նշեց դպրոցի տնօրեն ԱՇՈՏ ՀԱՐՈՒԹՅՈՒՆՅԱՆԸ: Նրա  խոսքով` դպրոցն ավագ դարձնելուց առաջ անրաժեշտ է ուսումնասիրել դպրոցների ընհանուր վիճակը, իսկ ավագ դպրոցի համակարգը կաշխատի միայն այն ժամանակ, երբ պետության կողմից տրամադրվեն համապատասխան միջոցներ`դպրոցի կարիքների համար:

2017 թվականին ավագ դպրոցներն անցնելու  են պարտադիր 12 –ամյա կրթական  համակարգի, ինչը Աշոտ Հարությունյանի կարծիքով ճիշտ մոտեցում չէ, քանի որ ոչ բոլորն են ավագ դպրոց գնում սովորելու համար: Ըստ նրա`պետք է երեխաներին ընտրության հնարավորություն տան, քանի որ կա միջնակարագ կրթություն, որն այս դեպքում լավագույն ընտրությունն կլինի:

Ըստ տնօրենի` բոլոր խնդիրներով հանդերձ Ս. Խանզադյանի անվան ավագ դպրոցը ապահովում է կրթական  մեծ որակ, ինչը փաստում են օլիմպիադաներում դպրոցի աշակերտների գրանցած հաջողությունները. «Նախորդ տարի դպրոցն ունեցել է 240 շրջանավարտ, իսկ այս տարի`236: 170 շրջանավարտ էլ կունենանք հաջորդ տարի: Առաջիկա 2-3 տարիների ընթացքում դպրոցի աշակերտների թիվը կնվազի, այնուհետեւ կավելանա»,-ընդգծեց դպրոցի տնօրենը եւ ավելացրեց, որ դպրոցն արդեն նախապատրաստվում են նոր ուսումնական տարվան:

ԶՎԱՐԹ ԽԱՉԱՏՐՅԱՆ

Բաժանորդագրվե՛ք https://t.me/iravunk

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝