Թուրքիան և ԵՄ-ն բանակցություններ են վարում անվիզա ռեժիմի ներդրման վերաբերյալ Տասը տարի՝ ռուսական արվեստի թանգարանի վերափոխման ճանապարհին Գերմանիան հրաժարվել է Լեհաստանով տանկային շարասյուներ տեղաշարժելուց Լավրովը կասկածի տակ դրեց Գերմանիայի և Բրիտանիայի պաշտպանության նախարարների ադեկտվատությունը Զելենսկի. ԱՄՆ-ն Ուկրաինային չի փոխանցում նույնիսկ Եվրոպայի կողմից վճարված Patriot հրթիռները Նեթանյահուն չկարողացավ համոզել ԱՄՆ-ին Վաշինգտոնի վրա Իրանի հարձակման սպառնալիքի մասով 22 տարի՝ անհայտության մեջ․ Վռուբելի գողացված կտավի առեղծվածը Վեճեր, սադրանքի փորձեր եւ վստահության քվե՝ Հայաստանի Նկարիչների միությունում Այսօր կայանալիք ֆուտբոլային հանդիպումները Ինչ է պատմում Իսաբեկյանը՝ Նկարիչների միության նախագահի ընտրությունից

6-ՐԴ ՀԱՄԱՀԱՅԿԱԿԱՆ ԽԱՂԵՐՆ ԱՆՆԱԽԱԴԵՊ ՑՈՒՑԱՆԻՇՆԵՐ ԵՆ ԳՐԱՆՑԵԼ

Արխիվ 12-16

6-ՐԴ ՀԱՄԱՀԱՅԿԱԿԱՆ ԽԱՂԵՐՆ ԱՆՆԱԽԱԴԵՊ ՑՈՒՑԱՆԻՇՆԵՐ ԵՆ ԳՐԱՆՑԵԼ

 

Օգոստոսի 2-ին կմեկնարկեն Համահայկական ամառային 6-րդ խաղերը, որոնք նվիրված են Հայոց ցեղասպանության 100-րդ տարելիցին:

Համահայկական Առաջին խաղերը կայացել են Երեւանում` 1999 թվականին, եւ այս տարիներին մարզաձեւերի թիվը մշտապես ավելացել է: Այսպես, եթե առաջին խաղերի ծրագրում ընդգրկվել են 7 մարզաձեւեր, ապա վերջին տարիներին, մասնավորապես՝ 2011 թվականին կայացած հինգերորդ խաղերին մարզաձեւերի թիվն ավելացել է երեքով, իսկ 6-րդ ամառային խաղերում նախկին տասը մարզաձեւին` ֆուտբոլ, ֆուտզալ, բասկետբոլ, վոլեյբոլ, աթլետիկա, թենիս, սեղանի թենիս, շախմատ, բադմինտոն, լող, ավելացել է եւս յոթը՝ լողափնյա վոլեյբոլ, սպորտային պարեր, գոլֆ, հանդբոլ, բազկամարտ, հեծանվասպորտ եւ հրաձգություն:
Զգալիորեն ընդլայնվել է նաեւ խաղերի աշխարհագրությունը: Դրանք այս տարի կանցկացվեն Երեւանում, Ստեփանակերտում, Գյումրիում, Վանաձորում, Աբովյանում եւ Արտաշատում: Ստեփանակերտում կանցկացվեն ֆուտբոլի եւ վոլեյբոլի, Գյումրիում, Աբովյանում` ֆուտբոլի, Վանաձորում` հանդբոլի, Արտաշատում` աթլետիկայի մրցումներ: Հեծանվասպորտի վազքուղի է ընտրվել Երեւան-Էջմիածին մայրուղին:
6-րդ խաղերի գլխավոր մրցավար է նշանակվել Հայաստանի ազգային օլիմպիական կոմիտեի փոխնախագահ, միջազգային կարգի մրցավար Դերենիկ Գաբրիելյանը:
Համահայկական ամառային 6-րդ խաղերին կմասնակցեն ռեկորդային քանակությամբ՝ 36 երկրներից եւ 165 քաղաքներից ավելի քան 6200 մարզիկներ: Մինչդեռ 5-րդ համահայկական խաղերում մասնակցում էին 33 երկրի 125 քաղաքի 3244 մարզիկներ, որտեղ արտերկրից ժամանած մարզիկները 1872 էին:
Առաջին անգամ մասնակիցների կեցության բոլոր ծախսերը հոգալու է Համահայկական խաղերի համաշխարհային կոմիտեն ¥ՀԽՀԿ¤, որն իր վրա է վերցրել նաեւ Սիրիայի քաղաքների միացյալ պատվիրակության բոլոր ծախսերը (ճանապարհածախս, հյուրանոց, օրապահիկ):
Համահայկական խաղերի ջահը վառվել է Վանա լճի Աղթամար կղզու Սուրբ Խաչ եկեղեցում եւ անցնելով հայկական Ջավախքով՝ տարվել Գյումրի, ապա Ախուրյան եւ Արաքս գետերի ափերով հասել է Սարդարապատ, եւ հուլիսի 27-ին Մայր Աթոռ Սուրբ Էջմիածնում ջահն օրհնեց Գարեգին Բ Ամենայն հայոց կաթողիկոսը: Օգոստոսի 2-ին արդեն ջահը կհասնի Երեւան` ազդարարելով համահայկական ամառային 6-րդ խաղերի մեկնարկը: Խաղերի բացման արարողությունը տեղի է ունենալու Երեւանի «Հրազդան» ստադիոնում, փակման արարողությունը՝ Երեւանի Ազատության հրապարակում:
Այսպիսով, Համահայկական խաղերում ասպարեզ են դուրս գալու հետեւյալ 17 մարզաձեւերի ներկայացուցիչները.
Աթլետիկա (կանայք եւ տղամարդիկ)- ծրագրում ընդգրկված են 27 մարզաոճ` 13 կանանց եւ 14 տղամարդկանց:
Բադմինթոն (կանայք եւ տղամարդիկ)-  անհատական եւ զուգամրցումներ:
Բազկամարտ (կանայք եւ տղամարդիկ)- անհատական մրցումներ:
Բասկետբոլ (կանայք եւ տղամարդիկ)- թույլատրվում են նաեւ պրոֆեսիոնալները:
Գոլֆ (կանայք եւ տղամարդիկ)- անհատական մրցումներ:
Թենիս (կանայք եւ տղամարդիկ)- մենախաղեր եւ զուգախաղեր:
Լող (կանայք եւ տղամարդիկ)- 24 մարզաոճ` 12 կանանց եւ 12 տղամարդկանց:
Լողափնյա վոլեյբոլ (կանայք եւ տղամարդիկ)- թիմի կազմը` 3 մասնակից, այդ թվում 2 մարզիկ եւ 1 պատասխանատու անձ:
Հանդբոլ (տղամարդիկ)- թիմի կազմը` 18 մասնակից` այդ թվում 14 մարզիկ եւ 4 պատասխանատու անձ:
Հեծանվասպորտ (կանայք եւ տղամարդիկ)- անհատական եւ խմբակային:
Հրաձգություն (կանայք եւ տղամարդիկ)- անհատական մրցումներ:
Ֆուտզալ- այն մարզիկներին, ովքեր ունեն արհեստավարժի լիցենզիա, չի թույլատրվում մասնակցել: Բացառություն են կազմում միայն այն արհեստավարժ մարզիկները, որոնց տարիքը 46 եւ ավելի է:
Շախմատ (կանայք եւ տղամարդիկ)- մասնակիցները պետք է ունենան մինչեւ 2300 միավոր արհեստավարժի վարկանիշ:
Սեղանի թենիս (կանայք եւ տղամարդիկ)- թիմային մրցումներ, մենախաղեր եւ զուգախաղեր:
Սպորտային պարեր (կանայք եւ տղամարդիկ)- անհատական եւ զույգերով մրցումներ:
Վոլեյբոլ (կանայք եւ տղամարդիկ)- թիմի կազմը` 15 մասնակից, այդ թվում 12 մարզիկ եւ 3 պատասխանատու անձ:
Ֆուտբոլ (տղամարդիկ)- Այն մարզիկներին, ովքեր ունեն արհեստավարժի լիցենզիա, չի թույլատրվում մասնակցել: Բացառություն են կազմում այն արհեստավարժ մարզիկները, որոնց տարիքը 36 եւ ավելի է:
ՔՐԻՍՏԻՆԵ ՊԵՏՐՈՍՅԱՆ

Հավանեցի՞ր հոդվածը, կիսվիր ընկերներիդ հետ