«ԿՈՉ ԵՄ ԱՆՈՒՄ ՀՀ ՔԱՂԱՔԱՑԻՆԵՐԻՆ ԵՎ ՍՓՅՈՒՌՔԱՀԱՅՈՒԹՅԱՆԸ ԿՈՒԼ ՉԳՆԱԼ ՍԱԴՐԻՉ ՀԱՅՏԱՐԱՐՈՒԹՅՈՒՆՆԵՐԻՆ»
Արխիվ 12-16
«ԿՈՉ ԵՄ ԱՆՈՒՄ ՀՀ ՔԱՂԱՔԱՑԻՆԵՐԻՆ ԵՎ ՍՓՅՈՒՌՔԱՀԱՅՈՒԹՅԱՆԸ ԿՈՒԼ ՉԳՆԱԼ ՍԱԴՐԻՉ ՀԱՅՏԱՐԱՐՈՒԹՅՈՒՆՆԵՐԻՆ»
Այցելելով Ջավախք` «Իրավունքը» աշուղ Ջիվանու հայրենի գյուղում` Կարզախում, հանդիպեց Վրաստանի խորհրդարանի մեծամասնական կարգով ընտրված պատգամավոր ՍԱՄՎԵԼ ՊԵՏՐՈՍՅԱՆԻ հետ, ումից հետաքրքվեցինք նախ` Ջավախքում առկա խնդիրների մասին, ապա` անդրադարձանք նաեւ հայ-վրացական, ռուս-վրացական խնդիրներին ու Հայաստան-Վրաստան սոցիալ-տնտեսական իրավիճակին:
ՀԱՅԿԱԿԱՆ ՀԱՐՑԵՐԸ ՎՐԱՑ ԽՈՐՀՐԴԱՐԱՆՈՒՄ
–Պարոն Պետրոսյան, Դուք Վրաստանի խորհրդարանում երեք հայազգի պատգամավորներից մեկն եք, հետաքրքիր է` վերջին շրջանում ջավախքահայերին վերաբերող ի՞նչ խնդիրներ եք կարողացել բարձրացնել երկրի օրենսդիր մարմնում:
– Մենք բավական լուրջ եւ կարեւոր խնդիրներ ունենք, որոնք աշխատում ենք լուծել: Թե ինչքանով է այն ստացվում, թող գնահատեն լրատվական մարմիններն ու ժողովուրդը: Կարեւոր խնդիրներից է այստեղ հայապահպանական գործընթացներ իրականացնելը եւ իհարկե առաջնահերթ է մեզ համար Ցեղասպանության ճանաչման հարցը: Այդ հարցերը մենք այս տարի հնչեցրել ենք խորհրդարանի նիստում: Ինչպես նաեւ, երեւի տեղյակ եք, որ Վրաստանում քաղաքացիության մասին օրենք ընդունվեց, եւ մոտ 3 հազար հայ քաղաքացիությունից զրկվեցին: Մեզ հաջողվեց Վրաստանի արդարադատության նախարարի հետ շատ ակտիվ աշխատել եւ կարողացանք այդ ուղղությամբ հարցեր լուծել: Մենք բարձրացրեցինք կացության հարցը, ու հիմա այն մարդիկ, ովքեր զրկվել էին քաղաքացիությունից ստացան կացության կարգավիճակ:
«ՈՐՊԵՍ ԷԹՆԻԿ ՀԱՅ`ՄԵՆՔ ՊԵՏՔ Է ՍՈՎՈՐԵՆՔ ՈՒ ՉՄՈՌԱՆԱՆՔ ՄԵՐ ԼԵԶՈՒՆ»
–Գաղտնիք չէ, որ Ջավախքում հայալեզու դասագրքերի խնդիր կա, եւ ինչ-ինչ պատճառներով դրանք պարզապես չեն կարողանում հատել սահմանը: Ինչպիսի՞ լուծում եք տեսնում այս խնդրին:
– Մենք այդ հարցը բարձրացրել ենք նաեւ Վրաստանի կրթության եւ գիտության նախարարի եւ տեղակալի առջեւ: Իրենք մեզ խոստացել են, որ անպայման կապ կպաշտպանեն ՀՀ ԿԳ նախարարության հետ եւ կաշխատեն այդ հարցերը լուծել: Մենք ասում ենք, որ վրացերենը Վրաստանի պետական լեզուն է, եւ միանշանակ բոլորս պետք է իմանանք այն, բայց որպես էթնիկ հայ` պետք է սովորենք ու չմոռանանք մեր լեզուն: Ոչ ոք այսօրվա դրությամբ Վրաստանում մեզ չի ասել, թե դուք սխալ եք մտածում: Իրենք պարզապես ասում են, որ դուք պետք է սովորեք վրացերեն, հիմա դա որքանով կստացվի` չգիտեմ:
– Վրաստանի խորհրդարանում 3 հայ պատգամավորներդ ներկայացված եք որպես ազգային փոքրամասնության ներկայացուցիչներ: Արդյո՞ք հաջողվում է ազատ պատգամավորական գործունեություն ծավելել, թե, այնուամենայնիվ, ինչ-որ հարցում կաշկանդված եք:
– Ինձ համար ոչ մի անգամ դժվար չի եղել այն կարեւոր հարցերը, որոնք կան, հնչեցնել խորհրդարանում: Ինչքան հնարավորություն ունեցել եմ` թե՛ հայոց լեզվի, թե՛ Ցեղասպանության եւ թե՛ տեղի հայերի սոցիալական հարցերի հետ կապված, աշխատել եմ բարձրաձայնել: Հարց կա, որը լուծվել է, հարց էլ կա, որի լուծումը դեռ ընթացքի մեջ է:
«ՀԱՅԱՍՏԱՆ-ՎՐԱՍՏԱՆ ՀԱՐԱԲԵՐՈՒԹՅՈՒՆՆԵՐՆ ՕՐԵՑՕՐ ԽՈՐԱՆՈՒՄ ԵՆ»
–Իսկ ի՞նչ կասեք Վրաստանի դեպի Եվրամիություն կողմնորոշման եւ Հայաստանի` ԵՏՄ անդամակցման մասին:
– Չնայած Հայաստանի հետ այսօր մեր վեկտորները տարբեր են, բայց, այնուամենայնիվ, Հայաստան-Վրաստան հարաբերություններն օրեցօր խորանում ու ամրապնդվում են: Կարեւորն այն է, որ այդ տարբեր վեկտորները չեն խանգարում հայ-վրացական բարեկամությանը:
– Արդյո՞ք Վրաստանը շահեց` անդամակցելով Եվրամիությանը:
– Սպասում ենք արդյունքի:
«ԵՐԿԱԹԳԻԾԸ ՊԵՏՔ Է ԲԱՑՎԻ, ՈՐ ԱԲԽԱԶԸ, ՕՍՆ ՈՒ ՎՐԱՑԻՆ ՇՓՎԵՆ»
–Անդրադառնանք նաեւ Աբխազիայի երկաթգծի բացման խնդրին: Ինչպիսի՞ն է այս հարցում Վրաստանի պատգամավորների դիրքորոշումը:
– Միանշանակ ասեմ, որ պատգամավորների մի մասը երկաթգծի բացումը դրական է համարում, ինչպես եւ ես: Բայց կան պատգամավորներ էլ, ովքեր դրան բացասաբար են վերաբերվում: Անպայման Աբխազիայի երկաթգիծը պետք է բացվի: Նրանց, ովքեր դեմ են դրան, մենք բացատրում ենք, որ եթե դուք ուզում եք Աբխազիան էլի մնա Վրաստանի կազմի մեջ, շփում պետք է լինի: Իսկ այդ շփումը երկաթգիծն է, այն պետք է բացվի, որպեսզի աբխազը, օսն ու վրացին իրար հետ շփվեն: Չէ որ, երբ շփվեն ու Աբխազիան տեսնի, որ այստեղ լավ է, իրենք կձգտեն դեպի Վրաստան:
– Ի վերջո, ռուս-վրացական սառույցը հնարավո՞ր է հալվի:
– Հեռու չգնանք, բայց շատ հավանական է: Վրաստանը տրամադրված է լավ հարաբերություններ ունենալ Ռուսաստանի հետ: Թեպետ Վրաստանը նայում է դեպի Արեւմուտք, բայց ուզում է Ռուսաստանի հետ լավ հարաբերություններ ունենալ:
ՎՐԱՍՏԱՆԸ ՆՈՒՅՆՊԵՍ ԿԳՆԱ ՍՈՒԲՍԻԴԱՎՈՐՄԱՆ ՃԱՆԱՊԱՐՀՈՎ
–Վերջերս վրացական իշխանությունների կողմից հայտարարվեց, որ կապված ՀՀ-ում էլեկտրաէներգիայի սակագնի բարձրացման հետ` թանկացում կլինի նաեւ Վրաստանում: Ի՞նչ կասեք այս մասին:
– Էլեկտրաէներգիան Վրաստանում օգոստոսի 1-ից պետք է թանկանա 5 տետրիով: Պարզ է, որ սուբյեկտիվ կամ օբյեկտիվ պատճառներով այդ թանկացումը պիտի բացասական ազդի ժողովրդի սոցիալական վիճակի վրա, բայց պետությունն այսօրվա դրությամբ նախատեսել է սուբսիդիա, որով կկարողանան կարգավորել այդ հարցը: Այն ընտանիքները, որոնք սոցիալական ծանր պայմաններում են ապրում, պետությունն իրենց անպայման կօգնի:
– Այս թանկացումը կարո՞ղ է բողոքի ալիք բարձրացնել Վրաստանում կամ խթանել արտագաղթին:
– Չեմ կարծում, որ 5 տետրիի պատճառով այստեղ արտագաղթ սկսվի:
«ՀԱՅԱՍՏԱՆԸ ՏՆՏԵՍԱԿԱՆ ԵՎ ՍՈՑԻԱԼԱԿԱՆ ԱՌՈՒՄՈՎ ԱՎԵԼԻ ԲԱՐՎՈՔ ՎԻՃԱԿՈՒՄ Է»
–Եվ վերջում` որպես քաղաքական գործիչ, ով Հայաստանի սոցիալ-տնտեսական պատկերը կարող է գնահատել դրսից, կցանկանայի Ձեր տեսակետն իմանալ այս մասին:
– Մեկ-մեկ ասում են, թե Հայաստանում սոցիալական վիճակը վատ է, բայց հավատացած եղեք, որ Ձեզ մոտ բավականին լավ է: Իհարկե կան խնդիրներ, սակայն Հայաստանն այսօրվա դրությամբ հետխորհրդային տարածքում գտնվող երկրների շարքում վերջին տեղում չէ: Ավելին` նույնիսկ կարելի է ասել, որ առաջին տեղերում է գտնվում: Նրանք, ովքեր քննադատում են Հայաստանին, միանշանակ կարող եմ ասել, որ երրորդ պետության` ադրբեջանական լոբբիստներ են: Հետեւաբար կոչ անում ՀՀ քաղաքացիներին եւ սփյուռքահայությանը` կուլ չգնալ սադրիչ հայտարարություններին: Հայաստանը ե՛ւ տնտեսական, ե՛ւ սոցիալական առումով ավելի բարվոք վիճակում է, քան մյուս պետությունները:
ՀՐԱՆՏ ՍԱՐԱՖՅԱՆ
Ջավախք-Երեւան
Բաժանորդագրվե՛ք https://t.me/iravunk
1
31296 դիտում
2
10942 դիտում
3
2733 դիտում
4
1783 դիտում
5
1675 դիտում
2
19318 դիտում
3
11374 դիտում
5
8094 դիտում
3
17693 դիտում
