ՕԵԿ-Ը ՆԵՐՍԻՑ ՊԱՅԹԵԼՈՒ ԽՆԴԻՐ ՉՈՒՆԻ

ՕԵԿ-Ը ՆԵՐՍԻՑ ՊԱՅԹԵԼՈՒ ԽՆԴԻՐ ՉՈՒՆԻ

Սահմանադրական բարեփոխումների   նախնական տարբերակը` յոթ գլուխներն արդեն հրապարակվել են: Ընդդիմադիրները, սակայն,  նախնական տարբերակը համարում են իշխանության վերարտադրությունն ապահովող տարբերակներից մեկը: Իսկ ի՞նչ կարծիք ունի այս հարցի վերաբերյալ ՕԵԿ-ը, պարզեց «Իրավունքը» ՕԵԿ պատգամավոր Հովհաննես Մարգարյանից: «Սահմանադրական բարեփոխումների մասնագիտական հանձնաժողովին ՕԵԿ-ը  գրավոր տարբերակով հինգ առաջարկ է ներկայացրել: Առաջարկները քննարկել է հանձնաժողովը եւ  հանձնաժողովի նախագահի մակարդակով մեզ գրավոր պատասխանել է, որ սկզբունքնորեն դեմ չեն: Նախնական տարբերակում, սակայն, մեր առաջարկների մի մասը  տեղ չեն գտել այնպիսի ձեւակերպմամբ, ինչպիսին մենք էինք առաջարկել: ՕԵԿ-ը կքննարկի սահմանադրական  բարեփոխումների  նախնական տարբերակը, որից հետո կհայտնի իր կարծիքը»,- պատասխանեց  ՕԵԿ-ականը:

- Պրն Մարգարյան,  ընդդիմությանը  սահմանադրական բարեփոխումները հնարավորություններ են տալիս…

- Ես չեմ խոսում այն դրականի մասին, որը կա սահմանադրական բարեփոխումներում: Դե եկեք ուսումնասիրեք  գործող սահմանադրությունն ինչով էր վատ: Պետք է ամեն ինչ անել, որ լուծվի կարեւոր հարց` քաղաքական մենաիշխանության բացառումը, այլ ոչ թե ընդդիմությանը լիազորություններ տալ:

- Իսկ  համամասնական ընտրակարգի ներառումը չի?  վերացնում քաղաքական մենաիշխանությունը:

- Ոչ:

- Ըստ Ձեզ` իշխանությունը  չի՞  կարող այլ տարբերակով վերարտադրվել:

- Մեր նպատակն է ամրագրել այնպիսի նորմեր, որոնք սահմանադրորեն կապահովի քաղաքական մենիշխանության վերացում: Սա է կարեւոր: Մենք պետք է կարողանանք այնպես անել, որ մարզերից եւս պատգամավորներ լինեն ԱԺ-ում համամասնական ընտրակարգով: Իսկ սահմանադրական բարեփոխումների այս նախագծում խոսվում է  լողացող պատգամավորների թվով համամասնական ընտրակարգի մասին: Ես նման  բան որեւէ երկրում չեմ հանդիպել:

- «Ժառանգություն» կուսակցության փոխնախագահ Արմեն Մարտիրոսյանը մտավախություն ունի, որ  սահմանադրական  բարեփոխումների հաստատվելու դեպքում  ընդդիմադիր կուսակցությունները ներսից կպայթեն իշխանական «ագենտների» միջոցով:

- Յուրաքանչյուր քաղաքական ուժ պետք է կազմված լինի կայուն քաղաքական գործիչներից, որպեսզի նման խնդիր չառաջանա: Մեր քաղաքական ուժը օջախ է ու ընտանիք: Մենք ոչ պայթելու, ոչ վախենալու խնդիր չունենք:

Եվս մեկ հարց` թեմայից դուրս: Որտե՞ղ եք հանգստանալու:

- Գյումրիում:

ՍՈՆԱ ԴԱՎԹՅԱՆ

Բաժանորդագրվե՛ք https://t.me/iravunk

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝