ՕԴԻ ՋԵՐՄԱՍՏԻՃԱՆԸ ԿՀԱՏԻ 40 ԱՍՏԻՃԱՆԻ ՇԵՄԸ

ՕԴԻ ՋԵՐՄԱՍՏԻՃԱՆԸ ԿՀԱՏԻ 40 ԱՍՏԻՃԱՆԻ ՇԵՄԸ

Այսօր, ՏԿԱԻՆ հիդրոմետ ծառայության օդերևույթաբանության կենտրոնի պետի տեղակալ Գագիկ Սուրենյանը լրագրողների հետ հանդիպման ժամանակ ներկայացրեց հուլիս ամսվա ընթացքում գրանցված օդի ամենաբարձր ջերմաստիճանը: Պարզվում է, որ  Երևանում ամենատաք օրը եղել է հուլիսի 10-ին, երբ օդի ջերմաստիճանը ստվերում բարձրացել է մինչև 40,5 աստիճան: Մասնագետի խոսքով գրանցված ցուցանիշը, սակայն չԻ գերազանցել նախորդ տարիներին գրանցված ամենաբարձր ցուցանիշները՝ 2010 թ.-ի օգոստոսի 3-ին Երևանում գրանցվել է 42 աստիճան, իսկ  2011 թվականի հուլիսի 31-ին Մեղրիում գրանցել է 43, 7 աստիճան:

Եղանակային կանխատեսումների համաձայն սպասվում է, որ օգոստոս ամսին բավականին շոգ է լինելու: Վերջին երեք օրերին մայրաքաղաքում և Արարատյան դաշտավայրում առավելագույն ջերմաստիճանները տատանվել է 38-39 աստիճանի սահմաններում, իսկ Ուրցաձորում գրանցվել է 40 աստիճան:

«Այս բարձր ջերմային ֆոնը կպահպանվի մինչև հուլիսի 30-ը, իսկ հուլիսի 30-ից եղանակային պայմանները կփոխվեն: Կովկասին մոտենում է նոր տաք օդային ալիք, ինչը նշանակում է, որ եղանակը կտաքանա ևս 2-3 աստիճանով»,- տեղեկացրեց Սուրենյանը:

Ամենաշոգ օրերը կլինեն հուլիսի 31-ին և օգոստոսի 1-4-ը ընկած ժամանակահատվածում: Մայրաքաղաքում, Սյունիքի հովիտներում և Տավուշում եղանակը կբարձրանա մինչև 40 աստիճան: Մասնագետի խոսքով առանձին ոչ ծառածածկ, ասֆալտապատ տարածքներում կգրանցվի 41 աստիճան տաքություն:

Սուրենյանը հավելեց նաև, որ երեկոյան ժամերին էլ օդի ջերմաստիճանը շատ չի իջնի, քանի որ առաջիկա օրերին կդադարեն երեկոներն ակտիվացող քամու հոսանքները:

ԱՐՄԻՆԵ ԳՐԻԳՈՐՅԱՆ

Բաժանորդագրվե՛ք https://t.me/iravunk

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝