ՀԱՅ ԳՐՈՍՄԱՅՍՏԵՐՆԵՐԸ ՉԻՆԱՍՏԱՆՈՒՄ

ՀԱՅ ԳՐՈՍՄԱՅՍՏԵՐՆԵՐԸ ՉԻՆԱՍՏԱՆՈՒՄ

Գրոսմայստերներ Զավեն Անդրեասյանը եւ Էլինա Դանիելյանը «Շենժեն» թիմի կազմում մասնակցեցին Չինաստանի ակումբային առաջնության B դիվիզիոնի մրցաշարին: Հայ գրոսմայստերներին հաջողվել է ոչ միայն թիմին օգնել՝ գրավել առաջին տեղը, այլեւ գրանցել լավագույն արդյունքը նաեւ իրենց անհատական խաղատախտակների վրա: Մրցաշարի մասին «Իրավունքին» ավելի մանրամասն պատմեց գրոսմայստեր ԶԱՎԵՆ ԱՆԴՐԵԱՍՅԱՆԸ.

-Չինաստանի երկրորդ լիգան էր, որին մասնակցեցինք Էլինա Դանիելյանի հետ: Թիմում էինք երեք տղա եւ երկու աղջիկ: Մրցաշարին մասնակցում էին 32 թիմ, առաջին երկու հորիզոնականը զբաղեցրած թիմերը հնարավորություն էին ստանում անցնել բարձրագույն լիգա: Մեր թիմը շատ լավ հանդես եկավ, 11 պարտիա էր, որից 10-ը հաղթեցինք եւ մեկը ավարտեցինք ոչ-ոքի: Այդպիսով՝ 22 հնարավորից 21 միավորով գրավեցինք առաջին տեղը: Էլինա Դանիելյանը կանանց խաղատախտակի վրա գրավեց առաջին տեղը՝ 11 հնարավորից վաստակելով 10,5, իսկ ես տղամարդկանց պայքարում 11 հնարավորից վաստակեցի 9,5 միավոր ու գրավեցի առաջին տեղը:
Ի դեպ` Լիլիթ Մկրտչյանը նույնպես մասնակցում էր այս առաջնությանը` մեկ այլ թիմի կազմում. Լիլիթը իր խաղատախտակի վրա ցույց տվեց 3-րդ արդյունքը՝ վաստակելով 11-ից 9-ը միավոր:
- Համեմատելով այս առաջնությունը մյուսների հետ, որոնց մասնակցել եք, ի՞նչ կասեք սրա կարգի եւ կարեւորության մասին:
- Կարեւոր էր այնքանով, որ մեր թիմն իր պատմության մեջ առաջին անգամ հնարավորություն ստացավ հանդես գալ բարձրագույն լիգայում: Մշտապես մասնակցել ենք Չինաստանի ակումբային առաջնությանը, բայց ոչ այս թիմի կազմում: «Շենժեն» թիմն այս անգամ մեզ հրավիրեց, որպեսզի օգնենք իրենց գրավել առաջին տեղը, ինչն էլ հաջողվեց:
- Իսկ ի՞նչ կասեք Ձեր թիմակիցների մասին, բարձր կարգով շախմատիստնե՞ր էին:
- Գիտեք, շատերին առաջին անգամ էի տեսնում, բավականին հետաքրքիր շախմատիստներ էին, կարգով միջազգային վարպետին մոտ …
- Խոսենք նաեւ առաջիկա մրցաշարերից:
- Հստակ կարող եմ ասել, որ երկու մրցաշարի եմ որոշել մասնակցել. մնացածը դեռ հստակ չէ: Մեկը աշխարհի արագ եւ կայծակնային առաջնությունն է, մյուսն էլ՝ Եվրոպայի առաջնությունը, որը կանցկացվի Մինսկում:
- Ի՞նչ անելիքներ են դեռ մնացել 2015 թվականի համար:
- Դեռ ամեն բան ընթացքի մեջ է, քանի որ տարվա միայն կեսն է անցել: Տարվա սկզբին կայացավ Էրեբունի շախմատային դպրոցի բացումը, որի տնօրենն եմ: Այս տարին ավելի շատ կազմակերպչական աշխատանքներով զբաղվեցի, որն ինձ համար նորություն էր. փորձում եմ հասկանալ՝ ինչ է պետք եւ փորձ ձեռք բերել: Կենտրոնացած եմ դպրոցի վրա, դրա համար էլ այդքան շատ մրցաշարերի չեմ մասնակցում՝ համեմատած մյուս տարիների հետ:

ՔՐԻՍՏԻՆԵ ՊԵՏՐՈՍՅԱՆ

Բաժանորդագրվե՛ք https://t.me/iravunk

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝