ԱՐԹՈՒՐ ԱԲՐԱՀԱՄ. «ԻՆՉՊԵՍ ԽՈՍՏԱՑԵԼ ԷԻ` ՀԱՂԹԵՑԻ»

ԱՐԹՈՒՐ ԱԲՐԱՀԱՄ. «ԻՆՉՊԵՍ ԽՈՍՏԱՑԵԼ ԷԻ` ՀԱՂԹԵՑԻ»

Հուլիսի 18-ին, գերմանական Հալլե քաղաքում կայացել է հայ պրոֆեսիոնալ բռնցքամարտիկ, WBO վարկածով աշխարհի չեմպիոն Արթուր Աբրահամի եւ Ռոբերտ Շտիգլիցի թվով 4-րդ հանդիպումը: Մենամարտի 6-րդ ռաունդում Արթուր Աբրահամը նոկաուտի ենթարկեց Ռոբերտ Շտիգլիցին` պաշտպանելով սուպերմիջին քաշային կարգում WBO վարկածով աշխարհի չեմպիոնի տիտղոսը: Այսպիսով, Արթուրը մարզական կարիերայի 47-րդ մենամարտում 43-րդ հաղթանակը տոնեց: Մարզապալատում եւ ռինգում Արթուրի հետ հաղթանակը տոնել է նաեւ Հայաստանի ազգային հավաքականի եւ Դորտմունդի «Բորուսիայի» ֆուտբոլիստ Հենրիխ Մխիթարյանը: «Իրավունքի» հարցերին պատասխանեց Արթուր Աբրահամը:

-Արթուր, շնորհավորում ենք Ձեզ` գեղեցիկ հաղթանակի կապակցությամբ:
- Շատ շնորհակալ եմ: Կրկնակի շնորհակալություն, որ ինձ եւ իմ մարտերը միշտ պահում եք ձեր ընթերցողների ուշադրության կենտրոնում:
- Այս անգամ փայլուն հաղթանակ տարաք Շտիգլիցի նկատմամբ` տալով հնարավոր բոլոր հարցերի պատասխանները: Կիսվեք մեր ընթերցողների հետ Ձեր տպավորություններով:
- Շտիգլիցը մարտը սկսեց հարձակումներով, բայց ես նրան ձախ հարվածներով պահում էի, որ չկարողանար ինձ մոտենալ: Հետո սկսեցի նրան ծանր հարվածներ հասցնել, եւ նա զգաց, որ էլ չի կարողանում ինձ համար վտանգավոր լինել: Այդպես, ծանր հարվածներով նրան կոտրեցի եւ 6-րդ ռաունդում նոկաուտի ենթարկեցի: Մի խոսքով, եղավ այն, ինչ եղավ: Ակնհայտ էր, որ Շտիգլիցը լավ պատրաստված էր, ամուր էր, բիրտ մարտ էր ընթանում, սակայն ես հասա իմ նպատակին, ինչպես խոստացել էի` հաղթեցի: Եվ կարեւոր է նաեւ, որ հաղթեցի նոկաուտով:
- Շտիգլիցի հետ հանդիպում էիք արդեն չորրորդ անգամ, թեեւ մենամարտերից ոչ մեկը նախորդի կրկնությունը չէր, բայց, այնուամենայնիվ, նույն մրցակիցը չի՞ հոգնեցնում:
- Ոչ, չէի ասի, թե հոգնեցնում է: Շտիգլիցի համառությունն ինձ դուր է գալիս:
- Ռեւանշ մենամարտեր պահանջելը Շտիգլիցի համար սովորություն է դարձել, սպասե՞նք հինգերորդ մենամարտին:
- Կարծում եմ, որ Շտիգլիցն այլեւս չի ցանկանա մենամարտել ինձ հետ: Ամեն դեպքում, ես պատրաստ եմ:
- Ի՞նչ ծրագրեր կան առաջիկայում:
- Կհանգստանամ, որից հետո կսկսեմ նախապատրաստվել հաջորդ մենամարտիս, որի մասին դեռ որեւէ հստակ տեղեկություն չկա: Այս օրերին բազմաթիվ հանդիպումներ, հարցազրույցներ եմ ունենում, բացի այդ` Գերմանիայում պետք է նկարահանվեմ նաեւ մի նախագծի մեջ` թողարկվելու է ֆիթնեսի համար նախատեսված ուղեցույց-տեսասկավառակ, որը մարդիկ նայելով` կկարողանան մարզվել:
- Անցած տարի հանգստի համար ընտրեցիք Սինգապուրը, ո՞րն է այս տարվա ընտրությունը:
- Ինչպես միշտ` Հայաստանը, նաեւ որեւէ ծովափնյա երկիր: Ծովն ու արեւը հիմա ինձ շատ են հարկավոր:

ՔՐԻՍՏԻՆԵ ՊԵՏՐՈՍՅԱՆ

Բաժանորդագրվե՛ք https://t.me/iravunk

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝