Զարմացած

Ուկրաինայում պաշտոն ստացած Վրաստանի նախկին նախագահ ՄԻԽԱՅԻԼ ՍԱՀԱԿԱՇՎԻԼԻՆ իր զարմանալի ելույթներով ու արարքներով թեեւ զվարճացնում է ամբողջ աշխարհին, սակայն սպասելի է, որ հարազատ երկրից հետո հիմա էլ Ուկրաինայի գլխին փորձանք կբերի: Եվ պատճառը ոչ միայն նրա, մեղմ ասած, անհավասարակշիռ պահվածքն է, այլեւ ապշեցուցիչ պարծենկոտությունը: Բրիտանական թերթերից մեկին տված հարցազրույցում նա գլուխ է գովել, որ քանիցս եղել է ռազմաճակատում (այսինքն` Դոնբասում), որպեսզի խրախուսի այդտեղ կռվող վրացի սպաներին եւ երկար ու բարակ նկարագրել, թե ինչ եզակի խիզախություն ունեն ուկրաինացի զինվորները, ու այդպիսի զինվորներով Ղրիմ գրավելը խաղուպար է լինելու: Մնում է զարմանալ, թե ինչպես է ռազմական սխրանքներից խոսում մեկը, ով ամբողջ աշխարհի աչքի առաջ ռուսների ահից խուճապահար աջ ու ձախ էր վազվզում եւ, ի վերջո, ճաշակում սեփական փողկապը:

Իսկ մեզանում ոչ պակաս զվարճանք է ստեղծում պառկացույցերի մեծն մասնագետ եւ սիրահար ՎԱՐԴԳԵՍ ԳԱՍՊԱՐԻՆ: Դե, քանի որ ցույցերը հազվադեպ են, հիմա էլ նա զարմանալի ունակություն դրսեւորեց, որպեսզի իրեն զոռով հեռացնեն դատարանից` իր իսկ դատավարության ժամանակ: Նա իր պաշտպանական ճառում որոշեց հիշատակել, թե իրեն ինչպես է հայհոյել ոստիկանապետ Վլադիմիր Գասպարյանը, ու բառացիորեն մեջբերել հայհոյանքների երկար շարան, որոնք հայտնի էլ չէ ոստիկանապետն իրականում ասել է, թե` ոչ: Ու այդ ամենը` կին դատավորի ներկայությամբ, ում նյարդերը տեղի տվեցին եւ կարգադրեց Գասպարիին դուրս բերել: Դե ինչ, Գասպարին Գասպարի չի լինի, եթե հնար չգտնի անել այնպես, որ ոստիկաններն իրեն հորիզոնական դիրքով տանեն:
Երբ որեւէ մասնագետ մտնում է այն ոլորտը, որն իրենից բավականին հեռու է, բավականին զարմանալի բաներ են ստացվում: Բոլորս ԱԼԲԵՐՏ ՆԱԼՉԱՋՅԱՆԻՆ ճանաչում ենք որպես փայլուն հոգեբան: Սակայն նա զարմանալիորեն որոշեց անդրադառնալ Սահմանադրությանը, ու է՛լ Ստալինի, Հիտլերի ու Բերիայի հետ համեմատություններ անցկացրեց, է՛լ, չգիտես ինչու, որոշեց, որ ՀՀ նախագահն անչափ իշխանատենչ է. «Եվ ի՞նչ պետք է անել դրա համար, քանի որ գործող Սահմանադրությամբ 3-րդ անգամ նախագահ ընտրվել չի կարող: Ուրեմն միակ ելքն է, որ պետական կարգն այնպիսի փոփոխությունների ենթարկվի, որպեսզի, օրինակ, վարչապետն ունենա ավելի շատ իշխանություն, քան հիմա նախագահն ունի»: Դե ինչ, միշտ էլ այդպես է լինում, երբ հացթուխը որոշում է կոշիկ կարել, իսկ կոշկակարը` հաց թխել:
Եվ վերջապես մեզ հույժ զարմացրեց ԱՄՆ փոխնախագահ ՋՈ ԲԱՅԴԵՆԸ: Նա Սպիտակ տան պաշտոնական միջոցառմանը մասնակցել էր դեմքը զարդարող մեծ կապտուկով, որի վերաբերյալ պաշտոնական տեսակետն այն է, որ կապտուկը ստացել է` Չեմպիոն մականունով իր շան հետ խաղալիս: Եվ հետաքրքիրն ու զարմանալին այն է, որ այդ շունը բավականին հանգիստ բնավորություն ունի, եւ քիչ չէին դեպքերը, երբ պաշտոնական մկջոցառումներին նա գալիս էր հենց շան հետ: Դե ինչ, զարմանալով հանդերձ, մնում է ենթադրել, որ Չեմպիոն մականունով շունը նաեւ բոքսի չեմպիոն է, ու հետաքրքրվել` այդ ի՞նչ է արել Բայդենը, որ սեփական շունն է իրեն բոքսել:

Զարմացած է
ՀՈՎՀԱՆՆԵՍ ԳԱԼԱՋՅԱՆԸ

Բաժանորդագրվե՛ք https://t.me/iravunk

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝