ԷՍ ՇՈԳ ՈՒ ԿՐԱԿԻՆ ՄԱՐԴԿԱՆՑ ԱՌԱՆՑ ՋՐԻ ԵՆ ԹՈՂԵԼ

ԷՍ ՇՈԳ ՈՒ ԿՐԱԿԻՆ ՄԱՐԴԿԱՆՑ ԱՌԱՆՑ ՋՐԻ ԵՆ ԹՈՂԵԼ

Վերջերս առիթ էինք ունեցել անդրադառնալ Արարատի մարզի մի շարք համայնքների բնակիչների դժգոհություններին, որ այս շոգ օրերին զրկված են խմլու ջրից: «Ոնց որ անապատում լինենք, մի բաժակ ջուր ավել խմելու համար տնեցիներով կռիվ ենք տալիս. դե պատկերացրեք` ինչ վիճակում ենք: Դիմել ենք գյուղապետին, ինքն էլ պատասխանում է, որ իրեն էլ ասել են, որ էդպես պետք է լինի, պետք է հարմարվենք, որ չորս օրը մեկ էլ տալիս են, պետք է գոհ ու երջանիկ լինենք: Ջրի եղածն ինչ է, որ էդ էլ են կտրում ամբողջ օրը արեւի տակ համբալություն անող գյուղացուց»,- մեզ հետ զրույցում բավական վրդովված ասել էր Փոքր Վեդու բնակչուհի տիկին Ռոզան:

Խոսքը, թեեւ, մարզի ոչ թե մեկ, այլ՝ տասից ավել գյուղերի մասին է: Խոստումների պակաս չկա, թե՝ այսօր-վաղը ջուր կունենաք: Բայց թե ինչու այդ խոստումներն այդպես էլ իրականություն չեն դառնում, փորձեցինք պարզել «Հայջրմուղկոյուղի» ՓԲԸ հյուսիս-արեւմտյան մասնաճյուղի տնօրեն ԱՐՄԵՆ ԶԱՔԱՐՅԱՆԻՑ:
- Կասե՞ք, թե որն է խնդիրը, որ Արարատի մարզի Այգավան, Ջրահովիտ, Արեւաբույր եւ մի շարք այլ գյուղերում գյուղացիները այս տապին մի քանի օրը մեկ կամ շաբաթը մեկ են խմելու ջուր ունենում:
- Փորձեմ կոնկրետ Ձեր նշած գյուղերին վերաբերող խնդրից սկսել. Այգավանում, օրինակ, կան ծորակներ, եւ մարդիկ հիմնականում խմելաջուր ստանում են դրանցից օգտվելով: Երկու-երեք տարի առաջ եղել է ծրագիր, բայց համայնքի նախկին ղեկավարը չի համաձայնել, որ փոխվի խմելու ջրի ցանցը: Բայց հիմա` բառացիորեն մի քանի օր առաջ, հանդիպել ենք նոր գյուղապետի հետ եւ պայմանավորվել, որ նոր ծրագրով Այգավան գյուղը կունենա ջրի նոր ցանց: Արեւաբույրում, այո, եւս կա խնդիր, օրեր առաջ գյուղացիները ճանապարհը փակել էին, մեծ վթար էր եղել, բայց մենք անմիջապես արձագանքել ենք, եւ չորս ժամ հետո այդ գյուղը ջուր է ունեցել:
- Բայց նույն Ձեր նշած գյուղում այսօր էլ կա ջրի խնդիր:
- Այո, համաձայն եմ, մարզում ջրի հետ կապված խնդիրներ կան եւ ոչ քիչ: Բայց խնդիրը հետեւյալն է. մի գյուղն ունի մի քանի փողոցներ, եւ, այո, հնարավոր է, որ մի փողոցից մյուսը կարող է ջուրը ուշ հասնել: Բայց դա կապված է նրա հետ, որ այս սեզոնին սպառումը շատացել է: Սակայն եղած խնդիրներին, եթե ոչ ամբողջությամբ, բայց ամեն դեպքում լուծում տալիս ենք: Հիմնականում շատ քիչ է լինում, աշխատում ենք՝ առհասարակ  չլինեն նման դեպքեր, որ մարդիկ օրերով մնան անջուր:
- Պարոն Զաքարյան, Դուք եւս նշեցիք, որ աշխատանքներ են իրականացվում, մի ամիս առաջ մարզպետարանի համապատասխան պաշտոնյան էլ նույն բանն ասաց: Բայց այդ աշխատանքների արդյունքը ինչո՞ւ տեսանելի չէ:
- Խնդիրներ լինում են այս մեկ ամսվա ընթացքում` շոգ օրերին: Իհարկե՝ կարելի է ծրագրեր, գործընթացներ իրականացնել, որպեսզի ընթացիկ խնդիրները լուծվեն: Երբ ծրագիրը եղավ, Ձեր նշած համայնքները, ինչպես նաեւ առաջնահերթություն ունեցող այլ համայնքներ իրենց լուծումները կստանան:
- Լավ, կարո՞ղ եք ասել՝ ե՞րբ գյուղացիները ջրի խնդիր այլեւս չեն ունենա:
- Հիմա համայնքի ղեկավարները «Հայջրմուղկոյուղի» հայտ են ներկայացրել, թե որ փողոցներում է հրատապ խողովակաների փոխարինումը: Դա ամենաուշը մեկ ամիս հետո կկարգավորվի, մինչեւ մեկ ամսվա ընթացքում խմելաջրի հետ հետ կապված բոլոր խնդիրները կլուծվեն:
Նկատենք, որ մեր զրուցակիցը եւս հարցը տանում է ոչ թե նրան, որ կա մատակարարման ենթակա ջրի պակաս, այլ՝ դեպի հնամաշ ցանցեր: Արդյունքում՝ այն տպավորությունն է, որ «Հայջրմուղկոյուղին», տեսնելով ջրատար ցանցի վատ վիճակը, պարզապես անցել է «հովհարային անջատումների»՝ ավելորդ կորուստներ չունենալու համար: Ու եթե պատճառը դա է, ապա թե արդյունքում հայաստանյան քանի օրենքներ են խախտվել, նույնիսկ դժվար է ասել: Այն պարզ հիմնավորմամբ, որ սպառողը որեւէ մեղք չունի Ջրմուղի սեփականությունը հանդիսացող խողովակների լավ կամ վատ լինելու հարցում: Փոխարենը՝ նույն սպառողն ունի համապատասխան քանակով եւ որակով ջուր ունենալու իրավունք, եւ եթե համապատասխան ընկերությունը չի կարողանում դա գոնե նվազագույն մակարդակով ապահովել, ապա արդեն բոլորովին այլ հարց է: Լավ, մեկ ամիս էլ սպասենք:
ԻԼՈՆԱ ԱԶԱՐՅԱՆ

Բաժանորդագրվե՛ք https://t.me/iravunk

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝