Զարմացած

Ցանկացած ոք, ով փորձում է վերհիշել վաղ մանկությունը, անպայման կհիշի դրվագներ, թե ինչպես մանկապարտեզում սովորեցնում են, որ սուտ ասել չի կարելի: Սակայն զարմանալիորեն պարզվում է, որ, երեւի թե, ՎԱՐԴԱՆ ՕՍԿԱՆՅԱՆԻՆ բաժին էր հասել վատ մանկապարտեզ, կամ միգուցե ծանր մանկություն: Ահա թե ինչ է խոսում Սիվիլիթասիչը Սահմանադրության նոր նախագծի մասին. «Ցանկացած ժողովրդավարության եւ պառլամենտարիզմի գրավականը կոալիցիոն կառավարություն ստեղծելու հնարավորությունն է: Նոր Սահմանադրության նախագիծն իսպառ բացառում է այդ հնարավորությունը եւ սահմանադրորեն ամրագրում քաղաքական մենաշնորհը: Սա ինքնին բավարար է, որ մենք ազգովի դեմ լինենք ներկայացված Սահմանադրության նախագծին»: Զարմանալի է, թե ինչպես հարգարժան պարոնը չտեսնելու է տալիս, որ նոր նախագծով կոալիցիաների հարցը լուծվում է ինքնաբերաբար եւ նույնիսկ պարտադիր` ԱԺ ընտրությունների երկրորդ փուլի միջոցով: Դե ինչ, եթե շատ պետք է մի բանը «քըխ» անվանել, ապա հանգիստ կարելի է սպիտակը սեւ անվանել, նայելով ուղիղ զրուցակցի աչքերին:

Օ՜ ժամանակներ, օ՜ բարքեր... Կայքերում եւ սոցցանցերում, սկսած այն պահից, երբ ցուցարարների զգալի մասը Բաղրամյան պողոտայից իջել էր Ազատության հրապարակ, անչափ տարածվել էին «դավաճան», «ծախված», «սրիկա» եւ այլ նման մակդիրները: Իսկ հենց որ հրապարակվեց Սահմանադրության տեքստը, դրանց քանակը դարձավ այնպիսին, որ մարդ վախենում է առանց հակագազի համացանց մտնել: Դրա առնչությամբ ՍԱՄՎԵԼ ՆԻԿՈՅԱՆԸ իրավացիորեն նկատում է. «Ժամանակներն այնպիսին են, որ նույն մարդուն կարող են մեծարել որպես ազգային, հայրենասեր գործչի, հերոսացնել, մի ժամ հետո դավաճանի պիտակ կպցնել: Այստեղ գործում է ամբոխային հոգեբանությունը, որից հնարավոր չէ խուսափել: Միմյանց ոչնչացնելը, կեղտոտելը, մրոտելը ավանդույթ է դարձել հայ իրականության մեջ, եւ դա շատ վատ է: Իմ ցանկությունն է, որ գոնե քաղաքացիական շարժումները զերծ մնան այդ միտումներից, գոնե իրենք իրենց խնայեն. ի վերջո, մեզանում պե՞տք է լինի մի մաքուր բան, որին հասարակությունը հավատա: Գոնե այդ հավատը դուք պահեք, սիրելի երիտասարդներ»: Ինչեւէ, ՀՀԿ-ական պատգամավորը ճիշտ է անում, որ դիմում է ակտիվ երիտասարդներին` իրար չհոշոտելու եւ չպիտակավորելու: Քաղաքական գործիչներին դիմելը անիմաստ է, քանզի կարմիր կովը, միեւնույնն է, կաշին չի փոխում:
Համացանցում հայտնվել են ամփոփ տվյալներ, թե Հայաստանում որոնք են ՄԱՀԱՑՈՒԹՅԱՆ հիմնական պատճառները: Առաջին տեղում սրտանոթային հիվանդություններն են, երկրորդը` քաղցկեղն է, հաջորդը` շնչառական եւ մարսողական համակարգերը, նոր միայն դժբախտ պատահարներն ու թունավորումները: Թե ինչու առաջին տեղերում սրտանոթայինն է եւ քաղցկեղը, թերեւս պետք է ակնհայտ լինի, քանզի զարմանալիորեն մեզանում չափազանց տարածված է փոխադարձ չարությունը, իսկ դրանք հենց չարություն տարածողների եւ չարության գրոհների ենթարկվողների մոտ ամենատարածված հիվանդություններն են: Նշենք զարմանալի փաստ` վարակիչ հիվանդությունները թերեւս վերջին տեղն են զբաղեցնում: Դե ինչ, մնում է զարմանքով արձանագրել, որ մեր հայրենակիցները թեեւ լավ են սովորել մարմնի հիգիենան, այդ պատճառով մանրէները սարսափելի չեն, սակայն ապշեցուցիչ համառությամբ այդպես էլ չեն ուզում սովորել հոգու հիգիենա` չկեղտոտել ե՛ւ սեփական, ե՛ւ դիմացինի հոգին մաղձով, նախանձով, ատելությամբ, չկամությամբ եւ այլ բացասական հույզերով:
Անշուշտ, մեր ուրախությունը հարեւան երկրի բռնապետ ԻԼՀԱՄ ԱԼԻԵՎՆ է: Մեզ այնքան է զվարճացնում տարատեսակ մարազմատիկ ելույթներով, որ շատ ափսոս կլինի, եթե նրա հետ մի բան պատահի, կամ նրան քշեն հեղափոխության կամ մայդանի պատճառով: Բավականին հետաքրքիր դրվագ Ալիեւի վերջին ելույթից նկատել է ԱԺ փոխխոսնակ Էդուարդ Շարմազանովը: Այն է` մազութային սուլթանատի բռնապետը երկար խոսում է Հայաստանի տնտեսական ծանր վիճակի, կաթվածահարության, ահավոր աղքատության եւ այլնի մասին: Եվ մի փոքր անց` որ հայերը կաշառել են բազում կոնգրեսականների եւ արեւմտյան չինովնիկների: Շարմազանովը իրավացիորեն հարցադրում է. «Ալիեւը հակասում է ինքն իրեն: Եթե Հայաստանը հազարավոր եվրոպացիների է կաշառել, ինչպե՞ս է աղքատ, եթե աղքատ է, ապա ինչպե՞ս է կաշառել»:
Ինչպես հայտնի է, մեր հայրենի գրանտածիծները շատ են սիրում «Սորոսի» հիմնադրամից փող ստանալ: Եվ ահա Գուգլ-թարգմանչի շնորհիվ զարմանքով տեղեկացանք, թե հունարենով ինչ է նշանակում ՍՈՐՈՍ բառը: Այն նշանակում է դագաղ: Դե ինչ, զարմանալիորեն հաստատվում է այն, որ աշխարհում պատահական ոչինչ չկա: Ուստի մնում է զարմանալով հանդերձ, այսուհետ «Սորոսի» հիմնադրամի դրամաշնորհները անվանել «դագաղային գրանտներ», իսկ ստացողներին էլ` դագաղչի:
Իսկ մեր բառապաշարի մեջ որոշակի շտկում կարող են մտցնել եւ ամերիկացիները: Օրերս ոստիկանությունը ձերբակալեց մի 59-ամյա ամերիկացու, ում բռնացրել են 12 ոտնաչափ երկարություն ունեցող ԿՈԿՈՐԴԻԼՈՍԻ հետ պարբերաբար սեռական հարաբերություն ունենալու վրա: Խեղճ կենդանուն կապկպում էր եւ բռնաբարում: Դե ինչ, եթե հիմարությամբ զբաղվողներին ու հատկապես որոշ քաղաքական գործիչների մենք` հայերս, կոչում ենք «էշ գուրգուրող» (նկատի ունենալով հարեւան Ադրբեջանում անչափ տարածված սովորույթը), ապա հատկապես արեւմտամետներին թերեւս սկսենք անվանել «կոկորդիլոս գուրգուրող»:

Զարմացած է  ՀՈՎՀԱՆՆԵՍ ԳԱԼԱՋՅԱՆԸ

Բաժանորդագրվե՛ք https://t.me/iravunk

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝