«ՈՐՈՇ ՀԻՎԱՆԴՈՒԹՅՈՒՆՆԵՐԻ ԴԵՊՔՈՒՄ ԿՏՐԱԿԱՆԱՊԵՍ ԱՐԳԵԼՎՈՒՄ Է ԼԻՆԵԼ ԱՐԵՎԻ ՃԱՌԱԳԱՅԹՆԵՐԻ ՏԱԿ». Մաշկաբան
Արխիվ 12-16
«ՈՐՈՇ ՀԻՎԱՆԴՈՒԹՅՈՒՆՆԵՐԻ ԴԵՊՔՈՒՄ ԿՏՐԱԿԱՆԱՊԵՍ ԱՐԳԵԼՎՈՒՄ Է ԼԻՆԵԼ ԱՐԵՎԻ ՃԱՌԱԳԱՅԹՆԵՐԻ ՏԱԿ». Մաշկաբան
Եթե ծով եք մեկնել` առաջին մի քանի օրը զգուշացեք արեւի ուղիղ ճառագայթների տակ գտնվելուց: Ձեր օրգանիզմը պետք է սովորի նոր միջավայրին: Ցերեկային ժամերին խորհուրդ չի տրվում հայտնվել լողափում` առանց լայնեզր գլխարկի, արեւային ակնոցի ու անձրեւանոցի: Այս մասին «Իրավունքի» հետ զրույցում ասաց թիվ 2 բուժմիավորման մաշկաբան ՍԱՄՎԵԼ ԽԱՉԱՏՐՅԱՆԸ` հավելելով, որ ծովից դուրս գալուց հետո, անպայման, պետք է լոգանք ընդունել. աղի ջուրը նպաստում է մաշկի չորացմանը:
«Ժողովրդի մեջ տարածված կարծիք կա, թե արեւայրուքը շատ օգտակար է մարդու օրգանիզմի համար, ինչը սխալ է: Արեւայրուքի արդյունքում ընկնում է մաշկի դիմադրողականությունը: Մաշկը դառնում է չոր ու անառողջ: Արեւայրուքից պետք է զգուշանան հատկապես բաց մաշկ ունեցողները: Որոշ հիվանդությունների դեպքում կտրականապես արգելվում է լինել արեւի ճառագայթների տակ: Խոսքը մաշկային հիվանդություններ ունեցող մարդկանց մասին է, հատկապես` եթե ունեն օնկոլոգիական խնդիրներ, մեծ խալեր, վիտիլիգո հիվանդության դեպքում, սիրտանոթային, հիպերտոնիկ հիվանդությունների ժամանակ, ինչպես նաեւ վահանաձեւ գեղձի լուրջ դիսֆունկցիայի դեպքում»,- բացատրեց մաշկաբանը:
Ս. Խաչատրյանն ասաց, որ այրվածքի դեպքում ընդունված է օգտագործել մածունը, սակայն: «Խորհուրդ կտայի հրաժարվել այս անհեթեթ մեթոդից: Մածունից մաշկը կրկնակի չորանում է: Արդյունքում մարդը կրկնակի այրվածք է ստանում: Մածունն ունի միայն զովացնող ազդեցություն: Օգտակար է չիչխանի յուղը, եթե անմիջապես եք դնում մաշկի վրա: Այն բավականին կթեթեւացնի տուժածի վիճակը»:
Մաշկաբանը խորհուրդ է տալիս օգտագործել տեղային միջոցներ` կախված այրվածքի աստիճանից: «Եթե թեթեւ այրվածք է, այսինքն` առաջին աստիճանի, երբ մաշկի վրա առկա է կարմրություն, ապա խոնավացնող եւ փափկացնող միջոցների օգտագործումը լիովին բավարար կլինի: Երկրորդ աստիճանի այրվածքի դեպքում, երբ մաշկի վրա առկա են բշտիկներ, հարկ է մշակել մաշկը հատուկ դեղամիջոցներով: Այս դեպքում ինքնաբուժությամբ զբաղվելը ցանկալի չէ: Երրորդ աստիճանի այրվածքների դեպքում վնասված են լինում մաշկի խոր շերտերը: Այս դեպքում պետք է անհապաղ դիմել մասնագետի օգնությանը: Առաջին րոպեներին կօգնի մաշկի այրված մասը մոտ 10-15 րոպե սառը ջրի տակ պահելը»:
Վ. ՄՈՒՐԱԴՅԱՆ
Բաժանորդագրվե՛ք https://t.me/iravunk
1
31262 դիտում
2
6124 դիտում
3
2505 դիտում
4
1760 դիտում
5
1614 դիտում
2
19232 դիտում
3
17693 դիտում
4
11364 դիտում
5
8086 դիտում
5
8286 դիտում
