«ՔՐԵԱԿԱՆ ԱՇԽԱՐՀՈՒՄ ԻՐԱՎԻՃԱԿԸ ԹԵԺ Է»
Արխիվ 12-16
«ՔՐԵԱԿԱՆ ԱՇԽԱՐՀՈՒՄ ԻՐԱՎԻՃԱԿԸ ԹԵԺ Է»
Վերջին ժամանակներս հայաստանյան քրեական հեղինակությունները կամ սպանվում են կամ` հայտնվում իրավապահների ուշադրության կենտրոնում: Դա խոսում է մեկ բանի մասին, որ քրեական աշխարհում խորքային հակամարտություն է ծավալվում: Վերջին թարմ դեպքերից մեկը քանքեռցի հայտնի մականունով Տույի ձերբակալումն է, իսկ երեկ հրազենային վնասվածքով թիվ 1 համալսարանական հիվանդանոց է տեղափոխվել Չուգուն մականվամբ Արթուր Հովհաննիսյանը, որտեղ էլ նա մահացել է:
Քրեական աշխարհին քիչ թե շատ քաջատեղյակները նշում են, որ քրեական աշխարհը հակամարտության այս փուլ մտավ Երրորդմասցի Լյովիկի եւ նրա մտերիմների սպանությունից հետո, թեեւ հակասություններն ավելի խորքերն են գնում: Եվ ամեն ինչ պայթեց հենց Երրորդմասցի Լյովիկի դեպքից հետո` հաշվի առնելով նաեւ նրա ազդեցիկ դիրքերն ու Պզոյի հետ ունեցած հարազատական կապերը: Գումարած դրան՝ Լյովիկը ընդարձակ կապեր ուներ նաեւ քաղաքական, իշխանական շրջանակներում, եւ նրա սպանությունը նաեւ ազդակ էր` ոչ միայն քրեական, այլ նաեւ տնտեսական ազդեցության ոլորտների բաժանման մասին:
Թե ինչքան կխորանա արդեն քրեական պատերազմ հիշեցնող այս իրավիճակը, անգամ քաջատեղյակ անձինք են դժվարանում կանխատեսել: Իսկ ահա դատական, քրեական հոգեբան ԷԼԴԱ ԳՐԻՆԸ մեզ հետ զրույցում նկատեց.
- Իհարկե, քրեական աշխարհում լարված իրավիճակը հարաբերական իմաստ ունի, որովհետեւ բացարձակ ձեւով մենք չենք կարող ասել: Բայց որոշ, այսպես ասած, քրեական զանգվածներում իրավիճակն իրոք լարված է, կողմերը չեն կարողանում ընդհանուր հայտարարարի գալ: Բախման, իրավիճակի լարված լինելու մեջ առկա են բազմաթիվ գործոններ, բայց զանգվածային ձեւով, այո, կարող ենք փաստել, որ քրեական աշխարհում իրավիճակը թեժ է, բայց ոչ համատարած բնույթի:
- Իսկ ի՞նչն է, ըստ Ձեզ, հիմնական լարվածության պատճառը:
- Պատճառները տարբեր են, բայց հիմնական բախումների պատճառը միմյանց չհասկանալն է: Ամեն մեկը քրեական հեղինակություններից ունի իր սպասելիքը, իր ամբիցիաները եւ այդ իսկ պատճառով չեն կարողանում ընդհանուր հայտարարի գալ, ինչից էլ սկիզբ է առնում բախումը:
- Տիկին Էլդա, առհասարակ վերջին շրջանում հաճախակիացել են ընտանեկան սպանությունները, երբ ամուսինը սպանում է կնոջը, ծնողը՝ զավակին, հակառակը եւ այլն: Ո՞րն է այս ամենի պատճառը:
- Չեմ կարող կանխատեսումներ անել, թե երբ եւ ինչպես կավարտվեն այս միմյանց հաջորդող սպանությունները, քանի որ այսօր անգամ այնպիսի մարդկանց մոտ է ագրեսիա հասունանում, որոնցից երբեւէ չէիր սպասի ինչ-որ բռնություն, սպանություն: Հիմա առկա են այնպիսի դեպքեր, որ զարմանում ես, որ մարդը գնացել է այդ քայլին: Իհարկե՝ նման դեպքեր միշտ էլ կային ու կլինեն, բայց կարող եմ ասել, որ այսօր դրանց քանակը ավելի շատ է: Սպանությունների, բռնությունների հաճախակիացման վրա ազդում են տարբեր գործոններ` ամբիցիաները, նյութական պայմանները, դավաճանությունները, որոնք հիմա մոդայիկ են եւ այլն:
ԻԼՈՆԱ ԱԶԱՐՅԱՆ
Բաժանորդագրվե՛ք https://t.me/iravunk
1
31262 դիտում
2
6216 դիտում
3
2505 դիտում
4
1760 դիտում
5
1614 դիտում
2
19232 դիտում
3
17693 դիտում
4
11364 դիտում
5
8086 դիտում
5
8286 դիտում
