«ԵՎՐՈՊԱՅԻ, ԱՄՆ-Ի ԵՎ ՌԴ-Ի ՇԱՀԵՐԸ ՏԱՐԱԾԱՇՐՋԱՆՈՒՄ ՄՆՈՒՄ ԵՆ ԱՆՓՈՓՈԽ»

«ԵՎՐՈՊԱՅԻ, ԱՄՆ-Ի ԵՎ ՌԴ-Ի ՇԱՀԵՐԸ ՏԱՐԱԾԱՇՐՋԱՆՈՒՄ ՄՆՈՒՄ ԵՆ ԱՆՓՈՓՈԽ»

ԵԱՀԿ Մինսկի խմբի համանախագահները նախօրեին Վաշինգտոնում մասնակցեցին բարձր մակարդակի հանդիպումների, նրանք հանդիպումներ ունեցան Պետդեպարտամենտում, Պենտագոնում եւ Ազգային անվտանգության խորհրդում: Ահա այս հանդիպումներից հետո Մինսկի խմբի ամերիկացի համանախագահ Ջեյմս Ուորլիքը երեկ` հուլիսի 14-ին մեկնեց Մոսկվա՝ ղարաբաղյան հակամարտության կարգավորման վերաբերյալ խորհրդակցությունների համար: Նախատեսված է, որ այս այցելություններից հետո ԵԱՀԿ Մինսկի խմբի համանախագահները հուլիսի վերջին կայցելեն նաեւ տարածաշրջան:
«Իրավունքը» զրուցեց հայաստանյան որոշ վերլուծաբանների հետ եւ փորձեց պարզել, թե ինչ է նշանակում Ջ. Ուորլիքի հերթական ակտիվությունը, եւ արդյոք այս հանդիպումներով պայմանավորված` ԼՂՀ հակամարտության կարգավորման շուրջ տեղի կունենա՞ն որոշակի զարգացումներ:

Քաղաքագետ ԱԼԵՔՍԱՆԴՐ ՄԱՆԱՍՅԱՆԻ խոսքով` ԵԱՀԿ Մինսկի խմբի համանախագահներից յուրաքանչյուրն աշխատում է ԼՂՀ հակամարտության կարգավորման գործում ցուցաբերել որոշակի ակտիվություն եւ նախաձեռնություն, ինչը բոլոր համանախագահներին հատուկ վարք է. «Այս փուլում այդպիսի վարք է դրսեւորում նաեւ Ջ. Ուորլիքը: Չեմ կարծում, որ այս այցելությունները ԼՂՀ հիմնախնդրի կարգավորման հարցում վճռական նշանակություն ունենան: Նրա մոսկովյան այցն ավելի շատ պետք է հետապնդի ինչ-որ քայլերի համաձայնեցում Ռուսաստանի հետ: Այնուամենայնիվ, ԱՄՆ-ը ԼՂՀ հարցում փորձում է ներկայացնել մի իրավիճակ, որտեղ բոլոր համանախագահող երկրները կարծես իրար հետ համաձայն են բոլոր ձեռնարկվող քայլերում: Նույնիսկ այս համատեքստում, եթե Ուորլիքն է գնում Մոսկվա, ապա նախաձեռնության շուքն ընկնում է նրա վրա, ինչը էական նշանակություն չի կարող ունենալ: Թե՛ Եվրոպայի, թե՛ ԱՄՆ-ի եւ թե՛ Ռուսաստանի արմատական շահերը տարածաշրջանում մնում են անփոփոխ»:

Քաղաքագետ ԱՐԱ ՊԱՊՅԱՆԸ փաստեց, որ ԵԱՀԿ Մինսկի խմբի համանախագահներից յուրաքանչյուրը սկսել է իրեն մեծ խնդիրներ վերապահել, ինչը սկսվեց Ռուսաստանի նկրտումներով, որին բնականաբար պետք է հակադարձեին ե՛ւ Ֆրանսիան, ե՛ւ ԱՄՆ-ը. «Իմ կարծիքով` ամերիկյան ակտիվությունն ավելի շատ պայմանավորված է Իրանի հետ բանակցություններով, եւ համաձայնության գալով: Այսինքն՝ Իրանը պետք է մտնի համաշխարհային ավելի մեծ շուկա եւ ԱՄՆ-ը դրա համար ամենահավանական ուղիներից մեկը համարում է Հայաստանը: Այստեղ բացի Իրանից, կա նաեւ Թուրքիայի գործոնը. Թուրքիան գնալով դառնում է ավելի հակաամերիկյան, փոխարենը մենք տեսնում ենք համագործակցության պատրաստ Իրան, հետեւաբար տեղի է ունենում ուժերի հետաքրքիր վերադասավորություն: Այս պարագայում, եթե կարողանանք խելամիտ քաղաքականություն վարել, ապա հնարավոր է ինչ-որ բաներ շահենք, քանի որ Հարավային Կովկասում ԱՄՆ-ը դառնում է խաղարարական ուժերից մեկը»:

Հարցի վերաբերյալ մեկնաբանություն ստանալու համար «Իրավունքը» դիմեց նաեւ Հայաստանի արտաքին գործերի նախարարություն: Սարօրինակ է, սակայն նախարարության խոսնակ ՏԻԳՐԱՆ ԲԱԼԱՅԱՆԸ նախ զարմացավ, թե ինչ մեկնաբանություն է պետք տալ հարցին: Այնուամենայնիվ՝ տվեց «գերհանճարեղ» մեկնաբանություն. «Այս այցելություններն ու հանդիպումները տրամաբանական են եւ դիտարկվում են տրամաբանության մեջ: Այսքան բան»:

ԶՎԱՐԹ ԽԱՉԱՏՐՅԱՆ

Բաժանորդագրվե՛ք https://t.me/iravunk

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝