Զարմացած

Չէ, աշխարհն ակնհայտորեն շուռ է եկել: Պատկերացնո՞ւմ եք, թե ինչ է հայտարարել լոնդոնասեր ՍՏՅՈՊԻԿ ՍԱՖԱՐՅԱՆԸ հեռուստաեթերում. «Կոնչիտան էլ, կոնչիտայատերն էլ, ես Կոնչիտայի մասնագետը չեմ»: Հետաքրքիր է, Բրիտանական դեսպանատնից թույլտվություն վերցրե՞լ է այդպիսի բան ասելու, որպեսզի շահի հանրության սիրտը, թե ինքնագլուխ է արել, եւ վաղը նրանից պատասխան կուզեն, թե ինչպես է համարձակվել այդպես անպատվել եվրոպական հիմնական արժեքին: Բայց Ստյոպիկը Ստյոպիկ չէր լինի, եթե այդ առաջին դրական տպավորությունը տեղում չփչացներ. «Ազգովի դատապարտեցինք Զվարթնոցում փարթիների անցկացումը: Իսկ Գառնիում Վարդավառ փարթի կարելի՞ է»: Դե ինչ, միանգամից զարմանքով եւս արձանագրում ես, որ եթե մեկը էությամբ չհայ է, թեկուզ աշխարհը շուռ տա, այդպիսին էլ կմնա: Եթե Սաֆարյանի համար Վարդավառը «փարթի» է, էլ ինչ ասես... Ո՛չ բնությանն է պիտանի, ո՛չ մարդկությանը:

Կա որոշակի տեսակ` հայկական ազգանուններ կրելու, ովքեր Հայաստանում կուռկուռի ձագ էին, սակայն հեռավոր եվրոպաներում եւ ամերիկաներում խիզախությունը մեջները բարձրացել իրենց է ուտում: Այդպիսին է, օրինակ, եւ ժամանակին հոկտեմբերի 27-ի գործում շատ կասկածելի դերակատարություն ունեցած եւ ԱՄՆ փախած-փրկված ՆԱԻՐԻ ԲԱԴԱԼՅԱՆԸ. «Սպասում եմ այն օրվան, որ էն Եվրամիության դրոշ պատառոտող ու ոտնատակ տվող ու ամբախ-զամբախ Ամերիկա հայհոյող թափթփուկը մի հատ ցուցադրություն կազմակերպի` հրապարակայնորեն մի տեղ հավաքելով ու հեռուստակամերաների առաջ վառելով իրենց iPhone-ները, Samsung-ները, LG-ները, HP-ները, MacBook-ները, Nokia-ները, Siemens-ները, Sony-ները, կոմպյուտերները, հագած Adidas-ները, Puma-ները, Nike-ները, իրենց պապաների ու պատրոնների քշած Mercedes-ները, BMW -ները, Opel-ները... հրապարակայնորեն երդվեն, որ մեկընդմիշտ հրաժարվում են կոմպյուտեր ու ֆեյսբուք-թվիթերներից... Թե չէ մի տեսակ համոզիչ չեք, թուլեք: Ավելին, անհամոզիչ եք: Էլ ավելին` ակնհայտ ֆեյկ եք: Էլ ավելին` թուլա եք»: Դե, իհարկե, հեռավոր Ամերիկայում կարող է այդպես հոխորտալ եւ մեծ-մեծ փրթել, շատ լավ իմանալով, որ Հայաստանում այդ նույն իր սիրած եվրոպական դրոշի կոթը հատկապես իր որ մարմնամասում կհայտնվեր: Ինչեւէ, զարմանալով հանդերձ, մնում է հորդորել իշխանություններին, որ մյուսների նկատմամբ չկրկնեն այն սխալը, որը գործել էին դավաճան եւ մարդկային թափոն Վահե Ավետյանի պարագայում, վերջինիս ազատելով օրենքի հետ ունեցած բոլոր պրոբլեմներից:
Հանրահայտ է, թե վատ պարողին հատկապես ինչն է խանգարում, ժամանակին ընդդիմադիրներին նկատի ունենալով դրա վերաբերյալ արտահայտվել էր եւ հրապարակավ «կլիզմաներ» բաժանող եւ «տղամարդ» փնտրող Ռոբերտ Սեդրակիչը: Սակայն «Հանրապետություն» կուսակցության առաջնորդ ԱՐԱՄ Զ ՍԱՐԳՍՅԱՆԸ պարին խանգարող կատեգորիան այնքան ընդարձակեց, որ մնացինք շվար. «Երբ որ մի տեղ կանգնում ես, անկախ նրանից` Բաղրամյան պողոտան է, Օպերան է, տեղի է ունենում մաշում եւ ուժերի վատնում»: Պատկերացնո՞ւմ եք, մարդուն հեղափոխություն անելու սուրբ գործում խանգարում են մի ամբողջ օպերա եւ մի ամբողջ պողոտա: Դե ինչ ասես... Թարսի պես հենց այդ երկու օրը աչքովս ընկավ հեղափոխական Չե Գեւարայի հիշատակին նվիրված երգը, ու միանգամից զարմանքով ակամա մտածում ես` հա՛մ այդ մեծությունն էր հեղափոխական, հա՛մ այս մանրապճեղ քաղգործիչնե՞րն են հեղափոխական համարվում:

Զարմացած է
ՀՈՎՀԱՆՆԵՍ ԳԱԼԱՋՅԱՆԸ

Բաժանորդագրվե՛ք https://t.me/iravunk

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝