ՕՍԿԱՆՅԱՆ-ՎԱՀԵ ՀՈՎՀԱՆՆԻՍՅԱՆ-ՔՈՉԱՐՅԱՆ ՁԵՎԱՉԱՓԸ ՇԱՐՈՒՆԱԿՈՒՄ Է ԼՌԵԼ

ՕՍԿԱՆՅԱՆ-ՎԱՀԵ ՀՈՎՀԱՆՆԻՍՅԱՆ-ՔՈՉԱՐՅԱՆ ՁԵՎԱՉԱՓԸ ՇԱՐՈՒՆԱԿՈՒՄ Է ԼՌԵԼ

Մամուլում լայնորեն շրջանառվեց, որ ԱԺ «Բարգավաճ Հայաստան» խմբակցության անդամներ Վարդան Օսկանյանը եւ Վահե Հովհաննիսյանը առաջիկայում կհայտարարեն նոր կուսակցություն ստեղծելու մասին: Ու դեռ ավելին` ըստ նույն տեղեկատվության, վերոնշյալ կուսակցությունը կոչված է լինելու քաղաքական դաշտում փոխարինել «Բարգավաճ Հայաստանին», որն այսուհետ կզբաղվի ՀՀ երկրորդ նախագահ Ռոբերտ Քոչարյանի քաղաքական վերադարձի լոբբինգով ու նրա համար քաղաքական դաշտում տեղ ազատելով:

Եվ թեպետ այս տեղեկատվությունը ջանասիրաբար հերքում էին ԲՀԿ-ական այլ պատգամավորները, բայց առ այսօր որեւէ արժանահավատ պարզաբանում չկա ո՛չ Վ. Օսկանյանից, ո՛չ էլ Վ. Հովհաննիսյանից: Թե ինչո՞վ է պայմանավորված խիստ տարօրինակ լռությունը, եւ որքանո՞վ է այս տեղեկատվությունը համապատասխանում իրականությանը, նախ փորձեցինք պարզել Վ. Օսկանյանից: Սակայն նրա հետ կապ հաստատել այդպես էլ մեզ չհաջողվեց, ուստի դիմեցինք Վ. Օսկանյանի օգնական ՄԱՆԵ ԳԵՎՈՐԳՅԱՆԻՆ: Բայց նա նույնպես ո՛չ հերքեց, ո՛չ էլ հաստատեց նոր կուսակցություն ստեղծելու մասին լուրերը. «Որեւէ բան չեմ կարող ասել, պարոն Օսկանյանը դեռ ոչինչ չի ասում, եւ ես որեւէ տեղեկություն չունեմ` դրա հետ կապված»: Մեզ միայն հաջողվեց պարզել, որ Վ. Օսկանյանը արձակուրդ դեռ չի գնացել: Ինչեւէ, փորձեցինք կապ հաստատել նաեւ Վ. Հովհաննիսյանի հետ, բայց վերջինիս հեռախոսահամարին կին էր պատասխանում, ով խնդրեց մեզ պարոն պատգամավորին զանգահարել մեկ ժամից: Այո, դուք հավանաբար կռահեցիք, վատ սովորության համաձայն, մեկ ժամ անց Վ. Հովհաննիսյանի հեռախոսահամարն այլեւս անջատված էր: Ի դեպ, ուշագրավ զուգադիպությամբ լռում էր նաեւ ՀՀ երկրորդ նախագահի գրասենյակի ղեկավար Վիկտոր Սողոմոնյանի հեռախոսահամարը: Արդյունքում այսքան գաղտնապահությունից հետո տպավորություն է, որ այս եռյակը ոչ թե կուսակցություն է պատրաստվում բացել, այլ մասոնական օթյակ:

ՀՐԱՆՏ ՍԱՐԱՖՅԱՆ

Բաժանորդագրվե՛ք https://t.me/iravunk

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝