ԱՐՑԱԽԸ ՈՍԿԵԴՐԱՄ ԿՈՒՆԵՆԱ՞, ԹԵ՞ ՈՉ

ԱՐՑԱԽԸ ՈՍԿԵԴՐԱՄ ԿՈՒՆԵՆԱ՞, ԹԵ՞ ՈՉ

Ինչպես արդեն նշել է «Իրավունքը», ռուս հայտնի գործարար Գերման Ստերլիգովը գտնվում է Արցախում եւ արդեն իսկ ԼՂՀ զարգացման պլան է մշակել: Իսկ թե որքանո՞վ են դրանք համահունչ ԼՂՀ իշխանությունների տեսակետի հետ, «Իրավունքը» պարզեց ԼՂՀ նախագահի խոսնակ ԴԱՎԻԹ ԲԱԲԱՅԱՆԻՑ:

–Պարոն Բաբայան, Ստերլիգովն ասել է, որ ԼՂ-ում աշխարհում առաջին բնապահպանական օֆշորը ստեղծելու համար, տեղի ղեկավարությունը պետք է 3 հրաման արձակի` պլաստիկ տոպրակների ու շշերի վաճառքի արգելքի մասին, քիմիականից բնական լվացող միջոցների անցման մասին, քիմիական նյութերի արգելման մասին: Արդյո՞ք ԼՂՀ իշխանությունները պատրաստ են ընդունել այս առաջարկը:
– Մասնավոր կարծիք է այդ, եւ որպեսզի նման կարծիքը  ոչ միայն Արցախի, այլ ցանկացած պետության հայեցակարգում դառնա գերակշիռ, պետք է բավական լուրջ ուսումնասիրություններ կատարվեն, թե ինչքանով է հնարավոր կամ` ոչ: Մեկ բան է ցանկությունը, բոլորովին այլ է իրականությունը: Բայց այն, որ Արցախում հատուկ ուշադրություն են դարձնում բնապահպանությանը, ճիշտ է, եւ կարծում եմ, որ առհասարակ, մեր ամենամեծ նյութական հարստությունը բնությունն է` մեր գետերն են, մեր անտառներն են, որը պետք է պաշտպանենք եւ պահպանենք: Եթե այդ պահպանումը չլինի, ապա բնական է, որ մեր ապագան կլինի շատ բարդ:
– Իսկ որքանո՞վ է իրատեսական ռուս գործարարի մեկ այլ առաջարկը, ըստ որի, նա գտնում է, որ ԼՂՀ-ում պետք է շրջանառության մեջ դրվի ոսկեդրամը:
– Սա էլ վերոնշյալի հետ նույն կատեգորիայի մեջ է մտնում: Պետք է ուսումնասիրել, թե ոսկեդրամը տնտեսապես կկարողանա՞ իրեն արդարացնել, թե` ոչ: Կամ ինչքանով մենք հնարավորություն կունենանք այն, ինչն ինքն ասում է, իրականություն դարձնել: Սրանք շատ բարդ խնդիրներ են, եւ մեկ օրվա պատասխան չկա: Ժամանակին եղել է հենց ոսկե ստանդարտ, բայց դրանից կամաց-կամաց հրաժարվել են եւ անցել են նրան, ինչ այս պահի դրությամբ ունենք: Վերադառնալ հնարավոր է դրան, թե` ոչ, շատ բարդ հարց է, հետեւաբար ներկա դրությամբ այս հարցը չի ընդգրկված մեր հայեցակարգի մեջ:
– Ի վերջո, մամուլում լայն արձագանք գտած Ստերլիգովի այցի բուն նպատակը կարողացա՞ք պարզել:
– Ինքն է ասել իր նպատակը, որ իրեն դուր է եկել մեր երկիրը, եւ նա որպես զբոսաշրջիկ է եկել: Որեւէ քաղաքական ենթատեքստ այստեղ չեմ տեսնում:

ՀՐԱՆՏ ՍԱՐԱՖՅԱՆ

Բաժանորդագրվե՛ք https://t.me/iravunk

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝