Օռնելլա Մուտին ժամանեց Երեւան ու բողոքեց հայերից. «Ե՞րբ իրենք կսովորեն իմ անունը ճիշտ գրել»

Օռնելլա Մուտին ժամանեց Երեւան ու բողոքեց հայերից. «Ե՞ՐԲ ԻՐԵՆՔ ԿՍՈՎՈՐԵՆ ԻՄ ԱՆՈՒՆԸ ՃԻՇՏ ԳՐԵԼ»

Ժամեր առաջ իտալացի կինոդիվա ՕՌՆԵԼԼԱ ՄՈՒՏԻՆ ժամանեց Երեւան: «Զվարթնոց» օդանավակայանի VIP սրահում նրան դիմավորեցին «Ոսկե Ծիրան» կինոփառատոնի ստեղծագործական անձնակազմը` փառատոնի տնօրեն Հարություն Խաչատրյանի գլխավորությամբ: Հատկանշական է, որ 60-ամյա կինոաստղը բառից բուն իմաստով շշմեցրեց ներկաներին, քանի որ առավելագույնը 40 տարեկան կնոջ արտաքին ուներ եւ բոլորովին էլ չէր խամրել նրա սեքսուալ ու կանացի կերպարը: Ի դեպ, ադրբեջանական կայքերը նույնպես չեն կարողացել անտարբեր մնալ գերաստղի հմայքի հանդեպ ու ակտիվորեն լուսաբանում են նրա երեւանյան այցը: Սակայն, քմահաճ դերասանուհին, թեպետ ժամանելով Երեւան առաջին հանդիպածներին բազում ժպիտներ պարգեւեց, բայց երբ հասավ հյուրանոց, շտապեց իր ֆեյսբուքյան պաշտոնական էջում բողոքել հայերից. «Ե՞րբ իրենք կսովորեն իմ անունը ճիշտ գրել»: Վերջինիս վրդովվեցրել էր այն, որ նրա այցը յութուբյան տեսանյութում հրապարակվել էր «Օռնելլա ՄուտՏին Երեւանում է» վերնագրով, մինչդեռ մեկ «Տ»-ն լիովին բավարար է քմահաճ տիկնոջը:

Հիշեցնենք, որ Օռնելլա Մուտին «Ոսկե Ծիրան» Երեւանի 12-րդ կինոփառատոնի պատվավոր հյուրերից է: Անդրադառնալով նրա ստեղծագործական անցած ճանապարհին` նշենք, որ իտալացի դերասանուհին իր կինոդեբյուտն արեց 1970 թվականին` «Ամենագեղեցիկ կինը» ֆիլմով: Հայտնի գեղեցկուհին հիմնականում նկարահանվել է եվրոպական ֆիլմերում: Առավել հայտնի աշխատանքներից են գերմանական նոր կինոյի հայրերից մեկի` Ֆոլկեր Շլյոնդորֆի «Սվանի սերը» (1984) ֆիլմում կերտած նրա կերպարը: «Սվանի սերը» Մարսել Պրուստի «Կորուսյալ ժամանակների որոնումներում» առաջին գրքի էկրանավորումն է, որտեղ Մուտիի խաղընկերներն են Ջերեմի Այրոնսը եւ Ալեն Դելոնը: 1985-ին կինոնկարն առաջադրվեց ԲԱՖՏԱ մրցանակաբաշխության երկու անվանակարգում:

Մուտին նկարահանվել է նաեւ անվանի իտալացի ռեժիսորներ Մարկո Ֆերրերի եւ Դինո Րիզզիի ֆիլմերում:Սակայն հայ հանդիսատեսին առավելապես ծանոթ է «Անսանձի սանձահարումը» (1980) կատակերգական ֆիլմից, որտեղ նա խաղում է Ադրիանո Չելենտանոյի հետ:

Իր հոլիվուդյան դեբյուտը դերասանուհին ունեցավ 1980 թվականին՝ մարմնավորելով  արքայադուստր Աուրային «Ֆլեշ Գորդոն» ֆիլմում: Ամերիկյան ֆիլմերից հայտնի են նաեւ ռեժիսոր Ջոն Լենդիսի «Օսկար» Էքսցենտրիկ կատակերգությունը` Սիլվեսթր Սթալոնեի մասնակցությամբ: Մուտին տասից ավելի անգլալեզու ֆիլմերում է նկարահանվել, բայց նրա կարիերան հիմնականում զարգացել է իտալական կինոյի մատույցներում՝ ավելի քան հարյուր դերերով կինոյում եւ հեռուստատեսությունում:

Հավելենք նաեւ, որ «Ոսկե ծիրանի» շրջանակներում տեղի կունենա դերասանուհու մասնակցությամբ «Սվանի սերը» կինոնկարի Երեւանյան պրեմիերան, իսկ հուլիսի 12-ին, ժամը` 14:00-ին կկայանա լեգենդար դերասանուհու հանդիպումը հայաստանյան լրագրողների հետ:

ՀՐԱՆՏ ՍԱՐԱՖՅԱՆ

Բաժանորդագրվե՛ք https://t.me/iravunk

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝