Առաջարկվող կառավարման մոդելը ընդհանրություններ ունի գերմանական խորհրդարանական կառավարման մոդելի հետ

«ԱՌԱՋԱՐԿՎՈՂ ԿԱՌԱՎԱՐՄԱՆ ՄՈԴԵԼԸ ԸՆԴՀԱՆՐՈՒԹՅՈՒՆՆԵՐ ՈՒՆԻԳԵՐՄԱՆԱԿԱՆ ԽՈՐՀՐԴԱՐԱՆԱԿԱՆ ԿԱՌԱՎԱՐՄԱՆ ՄՈԴԵԼԻ ՀԵՏ»

Օրերս հրապարակված Սահմանադրության նախագծի 1-7 գլուխների նախնական տարբերակի վերաբերյալ հայտարարությամբ է հանդես եկել «Կողմ եմ սահմանադրական բարեփոխումներին» ֆեյսբուքյան խումբը, որն, ի դեպ, օնլայն տիրույթում սահամանդրական բարեփոխումներին նվիրված առաջին սոցցանցային էջն է: Հայտարարության մեջ մասնավորապես ասված է. «Սահմանադրության նախագծի 1-7 գլուխների նախնական տարբերակը միտված է ներկայացնել Սահմանադրությամբ կարգավորվող, Հայաստանի համար առանցքային նշանակություն ունեցող մի շարք հարցերի պատասխաններ: Առանցքային հարցադրումն այն է, թե երկրում կառավարման ինչ համակարգ պետք է գործի եւ ինչ կերպով պետք է կատարվի անցումը նոր համակարգին: Նախքան վերոնշյալ փաստաթղթի հրապարակումը, քննարկվում էր երկու տարբերակ. կամ բարեփոխել գործող կիսանախագահական կառավարման համակարգն ու խուսափել կառավարման ճգնաժամերից, կամ անցում կատարել խորհրդարանական կառավարման համակարգին: Վերջին տարբերակը ներկայումս զարգացած ժողովրդավարություն ունեցող երկրների կողմից առավել ընդունելի է եւ ճանաչվել է պետությունների կառավարման ընթացքում որպես առավել հաջողված կենսափորձ ունեցող կառավարման համակարգի ձեւ: Նախագծի նախնական տարբերակի հրապարակումից հետո պարզ դարձավ, որ սահմանադրական բարեփոխումների մասնագիտացված հանձնաժողովն իր հավանությունը տվել է խորհրդարանական կառավարման համակարգին, եւ, ըստ այդմ էլ, կազմվել է Սահմանադրության նախնական տարբերակը: Ուսումնասիրելով այն` հանգում ենք այն եզրակացության, որ նախագծով առաջարկվող խորհրդարանական կառավարման մոդելն իր բովանդակությամբ եւ ընդհանուր գծերով շատ ընդհանրություններ ունի գերմանական խորհրդարանական կառավարման մոդելի հետ, որը նաեւ կառավարման այդ ձեւի դասական մոդելին է հարում եւ քիչ հանդիպողներից է»: Ընդհանուր գծերով անդրադարձ կատարելով արդեն իսկ առաջարկվող հայաստանյան խորհրդարանական կառավարման մոդելին՝ սահմանադրական բարեփոխումներին կողմ արտահայտվող խումբը նշել է. «Այնուամենայնիվ, նախագծի նախնական տարբերակի մի քանի հոդվածների դրույթներ որոշակի մտավախության տեղիք են տալիս, եւ մի շարք հարցերի պատասխաններ դեռեւս պարզաբանված չեն: Որպես ասվածի ապացույց, կարեւոր է ուշադրություն դարձնել նախագծի 89-րդ հոդվածի 4-րդ մասին, որտեղ անհասկանալի է, թե ինչ նկատի ունեն «կայուն խորհրդարանական մեծամասնություն» ասելով: Կարելի է ենթադրել, որ հեղինակները նկատի են ունեցել 50+1 տարբերակը, որը կարող է իր մեջ պարունակել ռիսկեր: Հատկանշական է նաեւ նախագծի 148-րդ հոդվածի 2-րդ մասի վերջին նախադասությունը, որտեղ ասված է` «Ազգային ժողովը վարչապետին ընտրում է պատգամավորների ընդհանուր թվի ձայների մեծամասնությամբ»: Առավել ընդունելի է «որակյալ մեծամասնությամբ»  տարբերակը: Դեռեւս նախագծին վերաբերող մասնագիտական կարծիքներն իրարամերժ են, քանզի հստակ ձեւակերպումներ չկան տրված եւ երաշխիքները նույնպես բացակայում են», - ասված է հայտարարության մեջ:

ՀՐԱՆՏ ՍԱՐԱՖՅԱՆ

Բաժանորդագրվե՛ք https://t.me/iravunk

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝