ՄՈՎՍԻՍՅԱՆԸ ՆՈՐ ՄՐՑԱԿԻՑ ԳՏԱՎ

ՄՈՎՍԻՍՅԱՆԸ ՆՈՐ ՄՐՑԱԿԻՑ ԳՏԱՎ

Բարդ մրցաշրջանից հետո Յուրա Մովսիսյանը փորձում է ուշքի գալ եւ վերականգնվել նոր մրցաշրջանից առաջ: Եվ երբ թվում էր, թե մոսկովյան ակումբից հայ ֆուտբոլիստի հեռանալու միակ հիմնավոր պատճառը` Մուրատ Յակինը, այլեւս իրենից սպառնալիք չի ներկայացնում, «Սպարտակը» իրականացնում է տրանսֆեր, որը դարձյալ Մովսիսյանին կարող է նստեցնել պահեստայինների նստարանին:

Այսպես, օրեր առաջ մոսկովյան ակումբը պորտուգալական «Բրագայից» ձեռք է բերել Կաբո Վերդեի հավաքականի 24-ամյա հարձակվող Զե Լուիշին, ով արդեն Շվեյցարիայում միացել է ռուսական ակումբի հավաքին: Անմիջապես այս ձեռքբերումից հետո, ռուսական մամուլում սկսեցին բուռն քննարկումներ Մովսիսյան-Զե Լուիշ մրցակցության մասին: «Սպարտակի» նախկին պաշտպան Յուրի Կովտունը այդ մրցակցությունը օգտակար համարելով` նշել է. ««Սպարտակի» հարձակման գծում կա Մովսիսյան ու երիտասարդ տղաներ: Գուցե եւս մեկ մրցակցի գալով` նրանցից մեկը դուրս կմնա: Հնարավոր է, որ Մովսիսյանի համար Զե Լուիշը կդառնա ավելի լավ խաղալու շարժառիթ: Մրցակցությունը միշտ օգտակար է լինում»,- Կովտունի խոսքը մեջբերում է Eurofootball.ru-ն:
Իսկ ֆուտբոլային ռուս փորձագետ ու նախկին ֆուտբոլիստ Ալեքսանդր Բուբնովը անդրադառնալով Զե Լուիշի տրանսֆերին` նշել է, որ Մովսիսյանն այս մրցակցությանը չի դիմանա. «Զե Լուիշը լավ մակարդակի խաղացող է, սակայն «Սպարտակ» շատ են եկել ոչ վատ մակարդակի ֆուտբոլիստներ, իսկ հետո ի՞նչ է ստացվել: Ալենիչեւը լավ ծանոթ է պորտուգալական ֆուտբոլին եւ վատ խաղացողի չէր հրավիրի: Յուրա Մովսիսյանը ռուսերեն չի խոսում, նա դաստիարակվել է այլ հասարակությունում: Իսկ թե ինչպես է նա հայտնվել «Սպարտակում», հնարավոր է` Ջեւան Չելոյանցի շնորհիվ: Ակնհայտ է, որ Յուրան կարգով զիջում է Զե Լուիշին: Մովսիսյանը չի դիմանա նրա հետ մրցակցությանը»,- Բուբնովի խոսքը մեջբերում է sovsport.ru-ն:
Ինչ վերաբերում է թիմի գլխավոր մարզչին, ում խոսքն այս պարագայում շատ ավելի կարեւոր է, ապա Դմիտրի Ալենիչեւը չի բացառում Մովսիսյանին ու Զե Լուիշին միաժամանակ խաղադաշտ դուրս բերելու տարբերակը. «Հույսեր կապում եմ երիտասարդ Վյաչեսլավ Կրոտովի ու Դենիս Դավիդովի հետ: Պետք չէ մտածել, որ Զե Լուիշի հայտնվելուց եւ Յուրա Մովսիսյանի վերադարձից հետո այդ 2 հարձակվողներն այլեւս շանս չեն ստանա. հնարավորություն կլինի անպայման: Ինչ վերաբերում է Զե Լուիշին ու Մովսիսյանին միաժամանակ խաղադաշտ դուրս բերելուն, ապա` ինչու ոչ: Ես դա չեմ բացառում»:

ՔՐԻՍՏԻՆԵ ՊԵՏՐՈՍՅԱՆ

Բաժանորդագրվե՛ք https://t.me/iravunk

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝