ՀԻՆ ՀԱՅԿԱԿԱՆ ԵՐԱԺՇՏՈՒԹՅԱՆ ՈՐՈՇ ՆՄՈՒՇՆԵՐ ՁԱՅՆԱԳՐՎԵԼ ԵՎ ՆՈՏԱՅԱԳՐՎԵԼ ԵՆ

ՀԻՆ ՀԱՅԿԱԿԱՆ ԵՐԱԺՇՏՈՒԹՅԱՆ ՈՐՈՇ ՆՄՈՒՇՆԵՐ ՁԱՅՆԱԳՐՎԵԼ ԵՎ ՆՈՏԱՅԱԳՐՎԵԼ ԵՆ

Մեկ ու կես տարվա հետեւողական աշխատանքերից հետո  «Մշակութային վերածնունդ» հիմնադրամը հանրությանն է ներկայացնում «Հայկական ազգային երաժշտական գանձարան» նախագիծը, որը նպատակ ունի աջակցել արվեստի տարբեր ճյուղերի, իսկ առաջին հերթին` հայկական երաժշտությանը: Նախագծի երաժշտական պրոդյուսեր ԱՐՄԵՆ ՄԱՐՏԻՐՈՍՅԱՆԻ խոսքով`երաժշտությունը կազմում է մշակույթի զգալի մասը. «Այսօր երաժշտության պահպանությունն ու տարածումը գլոբալ խնդիր է, մի ազգի համար, որը մի կողմից ցանկանում է պահպանել իր մշակութային ժառանգությունը` փոխանցելով այն սերունդներին, իսկ մյուս կողմից`ցանկանում է իր մշակույթով պատշաճ կերպով ներկայանալ միջազգային հանրությանը: Խնդրի լուծման համար ճանապարհներ փնտրելիս հասկացանք, որ պետք է սկսենք հսկայական ծրագիր: «Մշակութային վերածնունդ» հիմնադրամը սկսեց իրականացնել «Հայական ազգային երաժշտական գանձարան» նախագիծը»,-նշեց բանախոսը: Նրա խոսքով` սկզբնական փուլի համար ընտրվել են կոմիտասյան այն երգերն ու երաժշտության նմուշները, որոնք ունեն բուն հայկական ծագում: Այնուհետեւ դրանք ձայնագրվել ու թվայնացվել են, որից հետո տեղադրվել վեբ-կայքում: Ըստ Ա. Մարտիրոսյանի` հայ ժողովուրդն ամնեզիա է ապրում, ով մոռացել է իր ազգային երգն ու երաժշտությունը. «Ազգայինն այնքան պետք է տարածել եւ այնպիսի ձեւեր ընտրել, որ այդ երաժշտությունը դառնա հանրամատչելի»,-ավելացրեց կոմպոզիտորը:

Երգերը ձայնագրելուց հետո, նախագծով կատարվել է նաեւ հրատարակություններ եւ նոտայագրություններ.«Ձայնագրված բոլոր ստեղծագործությունները նոտագրվել են ժամանակակից չափանիշներով: Նոտագվել է մոտ  800 էջանոց «Ժամագիրքը», Մ. Եկմալյանի «Պատարագը» եւ Կոմիտասի «Հազար ու մի խաղը»: Կոմիտասն իր ամբողջ ստեղծագործություններից ընտրել է 100 երգ` հայ ժողովրդին ու աշխարհին ներկայացնելու համար: Այդ 100 երգով նա ցանկանում էր ասել, որ սա է մեր տեսակը եւ բնույթը: Սակայն, գումար չունենալու պատճառով այդ երգերը չհրատարակեց, հրատարակեց միայն մի փոքրիկ գրքույկ, որտեղ միայն երգի բառերն էին: Ընտրված այս 100 երգը նույնպես նոտայագրել ենք, այդ ստեղծագործություններն արտահայտում են արեւելյան եւ արեւմտյան Հայաստանի ամբողջ երաժշտական ժառանգությունը»,-փաստեց կոմիտասագետ ԱՐԹՈՒՐ ՇԱՀՆԱԶԱՐՅԱՆԸ:

Ձայնագրված եւ նոտայագրված բոլոր երգերն ունեն իրենց անձնագրերը եւ դրանց հեղինակային իրավունքները պատկանում է «Մշակութային վերածնունդ» հիմնադրամին:

ԶՎԱՐԹ ԽԱՉԱՏՐՅԱՆ

Բաժանորդագրվե՛ք https://t.me/iravunk

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝