ՍԷՖԻԼՅԱՆԱԿԱՆ ՍԱԴՐԻՉՆԵՐԸ ԱԶԱՏՈՒԹՅԱՆ ՀՐԱՊԱՐԱԿՈՒՄ. ՄԱՍ 1

ՍԷՖԻԼՅԱՆԱԿԱՆ ՍԱԴՐԻՉՆԵՐԸ ԱԶԱՏՈՒԹՅԱՆ ՀՐԱՊԱՐԱԿՈՒՄ. ՄԱՍ 1

Բաղրամյան պողոտայում վերջին օրերին «հայկական մայդանի» առաջամարտիկների ջանքերով ձեւավորվել էր այսպես կոչված` նստացույցը համակարգող խումբ, որը պողոտան բացելուց հետո սահուն կերպով տեղափոխվեց Ազատության հրապարակ: Այդ համակարգող խմբում փորձում է առաջնային դիրքեր գրավել հանրահայտ մայդանչի Դավիթ Սանասարյանը, ինչից կարելի էր ենթադրել, թե Բաղրամյանում ղեկը իրենց ձեռքն են վերցնում ժառանագականները, բայց... Կա մի բայց, որը ստիպում է մտածել այլ ուղղությամբ: Բանն այն է, որ առաջին օրերից Բաղրամյանում վխտում էին «Հիմնադիր խորհրդարան» կոչված ապազգային կառույցի անդամները, սկզբում` աննկատ, հետո արդեն` ավելի նկատելի: Սէֆիլյան Ժիրայրը, դրսեւորելով հատուկ ծառայություններին բնորոշ հմտություններ` բավականին լուրջ ծրագիր է մշակել, կամաց-կամաց իր մարդկանց միջոցով սողոսկելով տարբեր խմբավորումներ եւ այնտեղ ներդնելով իր գործակալներին` այդպիսով վերահսկելով իրավիճակն ամենուր:
Այսպես` նստացույցը համակարգող խմբում ընդգրկված է ոմն Գագիկ Եղիազարյան, ով ներկայանում է որպես շարքային ՀՀ քաղաքացի:

Այնինչ, պարզվում է, որ նա իրականում հանդիսանում է «Հիմնադիր խորհրդարանի» անդամ եւ իր բոլոր քայլերը համաձայնեցնում է անձամբ Սէֆիլյանի հետ: Եվ ահա, հուլիսի 6-ին «Հիմնադիր խորհրդարանի» անդամ Գագիկ Եղիազարյանը Ազատության հրապարակում հավաքվածների համար ընթերցեց մի հայտարարություն, համաձայն որի` այս պահից սկսած շարժումը պետք է տանել բացառապես քաղաքական ուղղվածությամբ եւ շահագրգիռ քաղաքական ուժերին հրավիրեց Ազատության հրապարակ` քաղաքական պատասխանատվություն ստանձնելու եւ շարժումը ղեկավարելու համար:
Փաստորեն, Սէֆիլյանն այս երիտասարդին կոնկրետ ներդրել է համակարգող խումբ, որպեսզի նրա միջոցով թելադրի իր կամքը եւ շարժումը տանի իրեն ձեռնտու ուղղությամբ, ինչն էլ իրեն ուշացնել չտվեց: Կասկած չկա, որ այդ «քաղաքական տեքստը», որն ընթերցեց Գ.Եղիազարյանը, նրան էր փոխանցել հենց Սէֆիլյանը: Ի դեպ, դա զգացվում էր նաեւ տեքստի ընթերցման ժամանակ, երբ հստակ երեւաց, որ դրանում ընդգրկված հիմնական մտքերն անծանոթ էին նույնիսկ այն ընթերցող Գագիկ Եղիազարյանին:
Շատ համակարգված ու խորամանկ են աշխատում սէֆիլյանականները, եւ այսպիսի կազմակերպչական խաղերը միանշանակ վկայում են, որ սրանք ունեն հստակ քաղաքական նպատակներ` սոցիալական բողոքի ալիքը օգտագործել` երկրում վիճակը ապակայունացնելու եւ իրենց երազած «մայդանը» անելու համար: Սէֆիլյանն, իհարկե, շատ լավ գիտակցում է, որ իր քայլերը սպառնալիք են երկրի անվտանգությանը, սակայն փորձն արդեն ցույց է տվել, որ նա եւ իր կողմնակիցները, մեղմ ասած, թքած ունեն երկրի անվտանգության վրա: Նրանց համար կարեւորը անձնական խնդիրներ լուծելն է, ինչն էլ հիմա փորձում են անել իրենց սադրիչների միջոցով:
Ի դեպ, Գագիկ Եղիազարյանը համակարգող խմբում ներդրված միակ սադրիչը չէ, նրա հետ միասին այդ «հույժ կարեւոր» հանձնարարականը կատարում են եւս մի քանիսը, որոնց կանդրադառնանք առաջիկայում:
«100-ամյակը առանց Ժիրայր Սէֆիլյանի» ֆեյսբուքյան էջ

Բաժանորդագրվե՛ք https://t.me/iravunk

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝