ԵՐԲ ՄԵՐ ԿՈՂՔԻՆ Է, ՀԱՋՈՂՈՒԹՅՈՒՆՆ ԱՊԱՀՈՎՎԱԾ Է

ԵՐԲ ՄԵՐ ԿՈՂՔԻՆ Է, ՀԱՋՈՂՈՒԹՅՈՒՆՆ ԱՊԱՀՈՎՎԱԾ Է

ՀՀ շախմատի ֆեդերացիայի փոխնախագահ, վաստակավոր մարզիչ Հովիկ Խալիկյանը հուլիսի 6-ին նշեց ծննդյան 60-րդ տարեդարձը: Մեծ է նրա ներդրումը ինչպես հայկական շախմատային միջավայրի կազմակերպչական ոլորտում, այնպես էլ հայ լավագույն շախմատիստների պատրաստման գործում: Հայ ամենահայտնի ու հաջողակ շախմատիստների մեծ մասն անցել է Հովիկ Խալիկյանի դպրոցը. նա` որպես մարզիչ կամ խորհրդատու, մնայուն տեղ է զբաղեցնում նրանցից շատերի կենսագրություններում: Լավագույն ընկերոջ եւ ուսուցչի մասին, ծննդյան տարեդարձի կապակցությամբ, զրուցեցինք հայ նշանավոր շախմատիստներից մի քանիսի հետ:

ՌԱՖԱՅԵԼ ՎԱՀԱՆՅԱՆ- Շախմատի կենդանի լեգենդ,  Երեւանի պատվավոր քաղաքացի

Հովիկ Խալիկյանն արտակարգ դրական անձնավորություն է: Տասը տարի միասին խաղացել ենք Հայաստանի թիմում: Եվ եթե նա շարունակեր, բազմաթիվ հաջողություններ կգրանցեր պրակտիկ խաղում, պարզապես նախընտրեց կազմակերպչական, մարզչական աշխատանքները: Նա միշտ մեծ օգնություն է ցույց տվել երիտասարդ շախմատիստներին, որոնցից մեկն էլ Լեւոն Արոնյանն է, ում հաջողություններում մեծ է Խալիկյանի մասնակցությունը:
Հովիկի բնավորության գծերից մեկն է` հատկապես ֆենոմենալ. ցանկացած թեմայով նրա մոտ կարելի է խոսակցություն բացել, եւ նա տեղյակ է… Ընդ որում` տեղյակ է ոչ թե մակերեսորեն, այլ բոլոր մանրամասներով: Ամեն անգամ ես ապշած եմ մնում, որովհետեւ երբեք չեմ տեսել նրան, օրինակ, ինտերնետում նորություններ կարդալիս: Երբ հարցնում եմ, թե որտեղից գիտի այդքան շատ բան, կատակով պատասխանում է. «Երբ քնում եմ, ամբողջ ինֆորմացիան այդ ժամանակ եմ ստանում»:

ԿԱՐԵՆ ԳՐԻԳՈՐՅԱՆ- Հայաստանի չեմպիոն, գրոսմայստեր

Հովիկ Խալիկյանը շատ հետաքրքիր ու յուրօրինակ մարդ է: Մի մարդ, որի հետ երբեք չես ձանձրանա: Շնորհավորելով նրա ծննդյան տարեդարձը` կուզեի ասել, որ միշտ կողքիս լինի. իր կարիքը շատ ունեմ:
Ես շատ լավ եմ խաղում, հատկապես երբ միասին ենք գնում մրցաշարերի:

ԶԱՎԵՆ ԱՆԴՐԻԱՍՅԱՆ- աշխարհի մինչեւ 20 տարեկանների չեմպիոն (2006 թ.), գրոսմայստեր

Մի քանի տարի առաջ ակումբային առաջնության ժամանակ Հովիկ Խալիկյանի հետ միասին էինք խաղում, եւ առաջին անգամ տեսա նրա խաղը, մոտեցումները, որոնք բավականին հետաքրքիր էին: Ինձ համար սովորելու շատ բաներ գտա: Եթե խոսելու լինեմ Խալիկյանի մասին` որպես մարդու, կառանձնացնեմ նրա բնավորության գծերից ամենից վառ արտահայտվածը` կողքինին ի սրտե եւ անշահախնդիր օգնելու ցանկությունը:
Կուզեմ մի դեպք պատմել, որն էլի շատ լավ է բնորոշում Հովիկ Խալիկյանին: Տարիներ առաջ Հունաստանում խոշոր մրցաշարի էինք մասնակցում, Խալիկյանը, առաջին քայլը խաղալով a3, որը բավականին զվարճալի է պրոֆեսիոնալ շախմատիստի համար, երկու անգամ հաղթեց բավականին ուժեղ գրոսմայստերների: Երբ խաղաց a3, ու մենք բոլորս ծիծաղեցինք, Խալիկյանն ասաց. «Սպասե՛ք, անգիրներից եմ շեղում»:

ԷԼԻՆԱ ԴԱՆԻԵԼՅԱՆ- Հայաստանի վեցակի չեմպիոն, գրոսմայստեր

Հովիկ Խալիկյանին ես մանկությանս տարիներից եմ ճանաչում. նա է եղել իմ առաջին մարզիչը, երբ տեղափոխվեցի Հայաստան: Իմ բոլոր խաղերը միանշանակ լավ են ընթացել, երբ կողքիս է եղել Խալիկյանը. նրա ղեկավարությամբ ես գրանցեցի իմ առաջին խոշոր հաջողությունները: Խալիկյանն ինձ շատ-շատ լավ է ճանաչում. չնայած առհասարակ նա մարդկանց լավ է ճանաչում, բայց իմ դեպքում` անգամ նստածս դիրքից, կարող էր հեռվից ասել, թե ինչ է կատարվում շախմատի տախտակին... Միաժամանակ, շատ հոգատար է` որպես մարդ: Իմանալով, որ ես բանան շատ եմ սիրում, մրցաշարերին իր վրա էր վերցնում կիլոգրամներով բանան` ապահովելու գործը (ծիծաղում է- Տ. Մադաթյան): Ջերմորեն շնորհավորելով նրա ծննդյան օրը` ցանկանում եմ, որ միշտ մնա նույն այն Խալիկյանը, որին ճանաչում եմ:

ՏԱԹԵՎ ՄԱԴԱԹՅԱՆ

Բաժանորդագրվե՛ք https://t.me/iravunk

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝