ՊԱՏԳԱՄԱՎՈՐՆ ԻՐ ԸՆՏԱՆԵԿԱՆ ԲԻԶՆԵՍԻ 50%-Ն ԱՌԱՋԱՐԿՈՒՄ Է ԳԼԵՆԴԵԼԻ ՆԱԽԿԻՆ ՔԱՂԱՔԱՊԵՏԻՆ

ՊԱՏԳԱՄԱՎՈՐՆ ԻՐ ԸՆՏԱՆԵԿԱՆ ԲԻԶՆԵՍԻ 50%-Ն

ԱՌԱՋԱՐԿՈՒՄ Է ԳԼԵՆԴԵԼԻ ՆԱԽԿԻՆ ՔԱՂԱՔԱՊԵՏԻՆ

Գլենդելի նախկին քաղաքապետ Զարեհ Սինանյանը «Ռ-էվոլյուցիա» հաղորդման ժամանակ հայտարարեց, որ Սփյուռքը Հայաստանում տեղի չունի, որի վառ ապացույցը պետական մարմիններում սփյուռքահայերի  բացակայությունն է: Մինչդեռ 1990-ականներին պատկերն այլ էր: Համամի՞տ է  «Արեւմտահայոց ազգային համագումար» խորհրդի հիմնադիր անդամ,  պատգամավոր սփյուռքի հետ պարբերաբար շփվող եւ սփյուռքահայ Հրաչ Կապրիելյանից «քաշված» Արագած Ախոյանը պարզեց «Իրավունքը».

«Համաձայն չեմ այդ գնահատականին, քանի  որ ՀՀ-ում որեւէ պետական  պաշտոն զբաղեցնելու համար պետք է լինել  տվյալ երկրի քաղաքացի:  Թող գան աշխատեն, թող գան բիզնեսներ դնեն: Ինչ պարտադիր է ընդգրկված  լինեն պետական կառավարման համակարգում: Դուք մի մոռացեք գեոպոլիտիկայի  մասին: Գոյություն ունի պետական քաղաքական կուրս: Եթե մի քաղաքական գործիչ գալիս է, փորձում է  այդ կուրսը մի այլ ուղղությամբ տանել, բնականաբար, նրա ձեռքից բռնելու են»,- ասաց  պատգամավորը:

- Ինչպե՞ս  սփյուռքահայերը Հայաստանում բիզնես գործունեություն ծավալեն, եթե  մի քանի «քցված» սփյուռքահայերի  պատմություններն առայսօր հիշում են:

- Ես այդ դետալներին չեմ տիրապետում: Բայց  կան տասնյակ դեպքեր, երբ  նրանք փորձեցին մեր երկիրը խոպանի տեղ դնել:  Սա խոպան չէ, այլ  պետություն, եւ պարտավոր են ենթարկվել մեր պետության  բոլոր օրենքներին: Եթե սփյուռքահայերը մտածում են` կարող են գալ մի երկիր, որտեղ շատ բան կանոնակարգված չէ, եւ շանտաժ անել, դա  անընդունելի է:

- Բայց երբ համեմատում ենք «քցող» եւ «քցված» սփյուռքահայերին, ծանրության նժարը թեքվում է դեպի «քցվածների» կողմը:

- Ի՞նչ է նշանակում «քցված»:

- Ըստ որոշ մամուլի հրապարակումների` նույնիսկ բարձրաստիճան  մակարդակով են  խաբել որոշ սփյուռքահայերի:

- Չեմ կարծում: Նրանք հաստատ հիմնվել են ինչ-որ ընկերոջ կամ բարեկամի «հորս արեւ» էս կողմ, էն կողմ սկզբունքներով` առանց ուսումնասիրելու Հայաստանի բիզնես դաշտը: Բազմաթիվ սփյուռքահայեր գիտեմ, որ բիզնես են դրել եւ հաջողության  են հասել:

- Գլեդելի նախկին քաղաքապետը նաեւ ասում էր, որ  Հայաստանն ու Սփյուռքը դեռ նույն լեզվով չեն խոսում:

- Դա բնական եմ համարում: Ամեն մեկը դաստիարակվել է մի այլ երկրի կանոններով: Էդքանին համատեղելը եւ լեզու գտնելը բարդ բան է: Դրա համար պետք է հարգել բոլոր օրենքները:

- Իսկ եթե հարցադրումն այլ տեսանկյունից նայենք: ԱՄՆ-ից Հայաստան եկող սփյուռքահայը ցանկանում է  Հայաստանից  ժամանանակից  որոշ մոտեցումներ ներդնել մեզ մոտ եւ  իր կարծիքով մեր սխալ աշխատելաոճը փոխել: Այսինքն` առաջարկում է լավը:

- Իսկ ինքն ինչ է անում այդ առաջարկը այստեղ կիրառելու համար: Գալիս է եւ ասում` կընդունեք, կընդունեք, չէ, ես գնացի: Ու գնում, սկսում է քննադատել Հայաստանին: Ես ավելին ասեմ Ձեզ` մի շատ  հարուստ մարդ Հայաստանում չստերով փորձել է  մտնել լուրջ պաշտոնյայի մոտ: Նա իր պետության մեջ նման բան թույլ կտա՞ր:

- Որպես զրույցի եզրափակում`  Զարեհ Սինանյանին ի՞նչ կհորդորեք:

- Կհորդորեմ ամպագոռգոռ հայտարարություններ չանել, այլ մի բան անել հայրենիքում: Պրն Սինանյան, իմ ընտանիքի բիզնեսի 50%-բն օտարում եմ, եկեք  աշխատեք:  Շատ թանկ էլ չեմ ասում:

ՍՈՆԱ ԴԱՎԹՅԱՆ

Բաժանորդագրվե՛ք https://t.me/iravunk

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝